نثر

(تريبون دان ايضاح: چوخ تأسسوفله، يازيلماسيندان بير عصيردن آرتيق اؤتوب كئچمش آشاغيداكي ميصراعلار، عتيقه حيس اولمورلار. سبب، زامانين دونوب ثابيت قالماسي يوخ، بيزيم زاماندان گئري قالماغيميزدير. گونئي آذربايجاندا حاكيم اولان وضعيتي آنلاماق چتين دئيلدير، اوردا بير راسيست تئوكراتيك حاكميت، آريامهري راسيستي بيريسيني عوض ائتميشدير. آمما خاريجده دونيانين ان دموكراتيك و ان وارلي اؤلكه لرينده 20-30 ايل ياشاميشلارين، يئني شريعت بساطي قوروب، مؤمن/كافير، اينانميش/رافضي، توركچو/فارسچي، آذربايجانچي/توركچو(!؟)،  آذربايجانچي/ايرانچي و بوكيمي فيتوالار وئرمك مشقينه دوشموش وجودلاري نئجه باشا دوشمك اولار؟ آشاغيداكي شعر، بير نئچه سؤزو عوض ائتمكله، تام آكتوئل سسلنير. سانكي بؤيوك صابير، يالنيز اؤز دؤورونون قولاغي توكلو مورتجع موللالاريني يوخ، بوگونكو فيتوالار قارشي سيندا بيعت طلب ائدن فيقورلاري دا گؤرورموش...)

 

 

بوسبوتون مخلوقه اعلان اٸتمه لي بوندان سونرا

نو اصولون شرعه برعكس اولدوغون ايضاح اٸديب

كؤهنه ني تطبيق قورآن اٸتمه لي بوندان سورا

خاصه بو ژورنال غازٸت امرينده بر فيتوا تاپيب

سدي راهي نشري عورفان اٸتمه لي بوندان سورا

بؤيله ايش بؤيله غازٸت٬ بونجا مازٸت اولماز جانيم

بونلاري محكومي بوطلان اٸتمه لي بوندان سورا

 

دين گٸدير مذهب گٸدير قدري ايتير موللالارين

چاره يي امري موسلمان اٸتمه لي بوندان سورا

هر يٸتن كتدن موحررير عد اٸديب مين سؤز يازير

بونلاري مطر ودي اوطان اٸتمه لي بوندان سورا

كسمه لي هر نوع ايله اولسا نفوذون٬ حؤرمتين

سربسر آواره يي نان اٸتمه لي بوندان سورا

جيرمالي دفترلرين سينديرمالي چٸرنيل قابين

فيكري ترويجي قلمدان اٸتمه لي بوندان سورا

مومكون اولسا لاپ كؤكوندن قالديريب بير ظن ايله

جومله مطوعاتي ويران اٸتمه لي بوندان سورا

سييما شاعيرلري حتمن و حؤكمن زوريله

خاريج از ايسلام عنوان اٸتمه لي بوندان سورا

موختصر هر كيم كي٬ گؤردوك فهمي وار٬ بير سؤز قانير

كوفرايله مشهوري دؤوران اٸتمه لي بوندان سونرا

آرقاداشالار٬ الآمان٬ گل تٸز وٸريب ده ال اله

هم بو يولدا عهدي پيمان اٸتمه لي بوندان سورا

عاٸيد اولمور ايندي بونلاردان بيزه بير منفعت

پول وٸررلرسه موسلمان اٸتمه لي بوندان سورا