نثر

   ملک ایراندی گولوم بوردا آلیر جان اؤلولر

بئزدیریر جانلیلاری اؤلسه ده چوخدان اؤلولر

کوهنه مییت لریلن قول بویون اوینور دیریلر

ایله شیب تخته توتور مخلوقا دیوان اؤلولر

اوره گی کار کاسیبین تا بیر آز ایستیر آچیلا

قیزدئریر اورتالیغی تئزجه سالیر قان اؤلولر

بیر دوداق گولمه یه ده وئرمیر امان ماللا بیزه

سلطه یه غمله قویوب اؤ لکه نی ویران اؤلولر

 

 

درد اکیر ناله   ده ریر غصه بیچیر  آه چکیر

کند لینین چاره سی یوخ چونکی اولوب خان اؤلولر

ئولمه یینجه دیرینین یوخ د ه یه ری  آدی  سانی

گونو گوند ن قازانیر منزلت و شان  اؤلولر

یا وفات دیر یا وفات آخشامی یا ائرته سی گون

خلقی اویدورماق اوچون سویلورو دستان اؤلولر

قرنلر اؤنجه اؤلوب توپراق اولانلار یاشانیر

جهل مشّاطه لرین بسله ییر هر آن اؤلولر

اؤلولر دولتینین یوخ دیریلرله  آراسی

اول سببدن دیر اولور ایش باشی عنوان اؤلولر

ماللا سلطان اولالی اولمادی اسگیه غمیمیز

دیریلیق گئیدی قارا خوتلادی گوردان اؤلولر

اولدو اصحاب عزا مالک ما یملک وجان

اوخودو جانلیلارا سوره رحمان اؤلولر

آشکار ائتدی جهالت قمه قدّاره سینی

قانمایان قاری لری قیلدی قودورقان اؤلولر

تله دیر توولامادیر واعظین اویما فئلینه

خلقین اغفالی اوچون چیخدی مزاردان اؤلولر               اسماعیل جمیلی