نثر

گونتاي گنجالپ

هم ديل اورونو اولاراق، هم ده دويقو و دوشونجه درينليگي باخيميندان «ايسمين يئددينجي حالي» روماني گونوموزون ان اؤنملي اثرلريندن بيريدير. اثرين ديل ائستئتيکاسيني آنلايا بيلمک اوچون تک سئچنک اونو ديقتله اوخوماقدير. چوخ ائتکيلگيجي و آخيجي ديلله رومانين ايچينده کي دوشونجه لر، دويقولار، آجيلار و فاجيعه لر آچيقلانماقدادير. شئيرييتله ايچ-ايچه اولان اثر دوشونودوروجولوکدن باشقا بير ده اوخوجويا درين ذؤوق ياشادير. اوخوجو اؤز حياتيندا اونوتدوغو يوخولاريني خاطيرلايير بير چوخ يئرلرده. متنين ايچينده کي گيزلينجه هؤرولموش موسيقي سسلريني ايچدن-ايچه دويماق اولور. اثرين اوخونوشو سيراسيندا گؤزلريميزين اؤنونده سؤزلرله تصوير ائديلن تابلوولار سرگيلنمه يه باشلايير. اينسانلارين داورانيشلاري، آرزو و ايستکلري تصوير ائديلير. ماجرالار بير-بيريني اؤيله سينه ايزله مکده دير کي، اوخوجو کيتابي اليندن بوراخماق ايستمير. دَییشيک دونيالارين، دونياگؤروشلرين و جانسيخيجي تؤره لرين آچيقلانماسي اوخورون سوسيال دوروملارلا باغلي هم بيلگيلريني آرتيرير، هم ده اثرده کي شخصلرين آغريلاري ايله تانيش ائدير.

 

***

اثرده دَییشيک صورتلر واردير. آنجاق رومان گئنلده قادين آجيلاري آغيرليقدير. هر بير صورتين اؤزلليکلري و دونياگؤروشلري حاقيندا آيري-آيريليقدا اينجلمه لرده بولونماق مومکوندور. آنجاق بو، اثر اوزرينه يازيلميش ديرلنديرمه نين حجميني چوخ اوزادا بيلر. بو اوزدن ده من، يالنيز کيتابين اساس صورتي «سارا» حاققيندا دانيشماغا چاليشاجاغام. حياتي سيرلر و ماجرالارلا، آجيلارلا دولو اولان سارا بيرينجي حياتيني پورتاقالييادا، ايکيجي حياتينا دا آذربايجاندا ياشاماقدادير. پورتاقالييادا خريستيان، آذربايجاندا ايسلام کولتورو اوراتاميندا ياشايان سارا بو ايکي اينانيش گؤزلليکلريني اؤز روحوندا و داورانيشلاريندا سرگيله مه نين ياني سيرا، هم ده هيند مدنييتي نين صورتي کيمي قارشيميزا چيخماقدادير. بو يوللا دا اثرين اساس صورتي کيمي سارا بوتون مدنييتلره منسوب اولان و بوتون اينسانليغي دوشونن چوخيؤنلو بير خانيم کيمي گؤرونمکده دير. بيرينجي حياتي ايله ايکينجي حياتي آراسينداکي خاطيرلر تامام فرقليدير. او، آذربايجان حياتيندا اسکي تؤره لرين، باسقيلارين و قيزلارا هاق تانيمامانين قارشيسيندا ديرنه رکن بيرينجي حياتينداکي مدنييتيندن ايلهام آلماقدادير. آنجاق بو ايلهام آلما شوورلو شکيلده دئييلدير. روحوندان داورانيشلارينا اؤز-اؤزونه آخيب گه لر بو معنوي تميزليک. بيرينجي حياتيندا اينانيلماز آجيلار ياشايان سارا آجيلار و آغريلار ايچينده اولقونلاشميشدير. بو اولقونلوق دويغولاري نين ايکينجي حياتيني ائتکيله مه سي نين اؤزو ده بيلينجينده دئييلدير. بو اولوشوملارين بيلينجينده اولان تک آدام وار، او دا يازارين اؤزودور. بلکه يازار اؤزو ده بونون فرقينده اولمادان بو شکيلده قلمه آلميشدير. چونکو سارا اثرين بير يئرينده آذربايجانا نئجه گلديگيني مثله سيني يازارا حواله ائدير، بو سوالا، يالنيز يازار جابا وئره بيلر. اونون بيرينجي و ايکينجي حياتينداکي اولايلاري سارا اؤزو ده بيلمير، بونو تک بيلن ياراديجيدير، اثرين ياراديجيسي. رومانين ان ماراقلي اؤزلليکلريندن بيري ده يازارين اؤزونون ده آرادا ديالوقلارا قاتيلماسيدير. يارادجيليقدان چيخيب اثرده ياراديلان صورتلردن بيرينه دؤنوشمه سيدير. بير خيال کيمي آرا-سيرا يازار اثرين درينليکلرينه اوغراماقدادير.

سارانين تمسيل ائتديگي قادين اوبرازي ائورنسل بير صورتدير. چونکو او، هم بيرينجي حياتينداکي قرب قيزي و ايکينجي حياتينداکي شرق قيزي صورتيني بيرلشديرميش اولور. آيريجا، رومانين آنلاتيم شکليندن بللي اولور کي، داها اؤنجه کي حياتلاريندا دا باشقا مدنييتلره منسوب اولوبموش. بو ندنله ده سارا اؤز سئوگيسينده و وارليقلا ايليشکيسينده خريستيانليق و ايسلام عيرفاني نين ياني سيرا هيند عيرفانيني دا سرگيله مکده دير. هيند عيرفاني ديله گتيريلمه سه ده حياتلارين بير-بيرينه سيرلي شکيلده تاثيري بونو اورتايا قويماقدادير. روحوندا بوتون وارليغين گؤزلليکلريني داشيماقدادير سارا. بو گؤزلليکلري ايسه آجي چکه رک قازانميشدير. اثرده اونون اوست اينسان اولاراق گؤرونمه سي نين تک سببي چکديگي آجيلاردير. بيرينجي حياتينداکي سئوگيسي آنلاتيليرکن اوخوجو اونون روحونون آغريلاريني کؤنوللو اولاراق پايلاشماق ايسته يير. بو اوزدن ده رومانين بعضي يئرلرينده اوخورون گؤز ياشلاري اؤز-اؤزونه آخيب گئتمک زوروندا قالير. آنجاق بو آجيلار ايچينده روحو آيدينلانان سارا باسقيلارا، آشاغيلانمالارا معروض قالان آذربايجان قيزلاري نين گوونه جگي تک سيغيناجاق يئرينه دؤنوشر. آذربايجدا گئري قالميش تؤره لرين قيزلاري کيچيک ياشلاريندا مکتبدن آييريب اره وئرمه لري بير شکيلده اونلارين فاحيشه اولمالارينا ايمکان يارادير. چونکو بير طرفدن ده ايقتيصادي باسقيلار اوزوندن ارلر آروادلاريني بوراخيب روسييايا چاليشماغا گئتمک زوروندا قاليرلار. اثرده يئنه ده باشقا بير اوبرازين سيرلي شکيلده ايکي اوبرازا دؤنوشمه سينه تانيق اولوروق. آنجاق بونو سئزمک چوخ چتيندير و چوخ ديقت طلب ائدير. نازنه نين و چيچک اسلنده بير تک صورت، آنجاق پارچالانميش صورتلر. بورادا عيرفاندا يايقين اولان «ووجودلارين وحدتي» فلسفه سي ايله قارشيلاشيريق. اصلینده بوتون اينسانلار «بير»دن قوپموش اولان فرقلي صورتلرديلر. بيريني قتل ائتديگيميزده، اصلینده اؤزوموزو قتل ائديريک. بو دوشونجه ني داها درين بير بيچيمده اثرده گؤرمکدگيک. فاحيشه نازه ني نين فاحيشه ليگي نين سوراغي روسييايا گئديب چيخار. باجيسيني چوخ اوشاقکن کندده بوراخيب آتاسي ايله بير يئرده روسييايا چاليشماغا گئدن نازه ني نين قارداشي هم ده آرتيق عسگر قاچاغيدير. آنجاق باجيسي نين فاحيشه ليک خبريني دويدوغوندا کنده گليب باجيسيني اؤلدوره رک ناموسلاريني تميزله مک ايستر. قيزا پارا تکليف ائده رک اورمانليغا چاغيرير. قارانليقدا قيزا اونون قارداشي اولدوغونو سؤيله يير و اونو اؤلدورمک اوچون گلديگيني دئيير. قيز نه قدر يالوارسا دا کي، اونون قارداشي يوخدور، اوغلان قولاق آسمير و قيزي اؤلدورور. اوغلاني قاتيل کيمي ياخالاييرلار و او، تو ائکرانلاريندا ناموسلاريني تميزله مک اوچون باجيسيني اؤلدوردويونو دئيير. سونرا بللي اولور کي، اؤلدوردويو قيز اونون باجيسي نازه نين دئييلميش، نازا آديندا باشقا بير فاحيشه ايميش. رومانين اوخوجويا و اينسانلارا ان درين مساژ وئرديگي يئرله دن بيري ده بو صحنهدير. بو دوشونجه اورتايا چيخير کي، اؤلدورمک دويقوسو اينسانين ويجدانيني کور ائتديگي زامان کيمي اؤلدوره جگي اصلا اؤنملي دئييل. ايستر باجيسي اولسون، ايستر يابانجي. اينسانين ويجداني اؤلدورمه دويقوسو طرفيندن ايشغال ائديلممه ليدير. ايشاغ ائديلکدندن سونرا اؤلدوره جگيميز هر اينسان بيزيم قارداشيميز، يا دا باجيميزدير.

بو ماجرالار اسرارانگيز بيچيمده بير-بيرينه هؤرولور. اثرده ديل اوزرينه ده گئنيش بيلگيلر وئريلير. بيزيم ديليميزده بؤيوک اثرلر يازيلا بيلمز، چونکو ديلين بونا ايمکانلاري يوخدور ايديعالري چوخ درين بير منطيقله چورودولور. «بيزيم يازارلارين ديل يوخ، تفککور کاسيبليغي وار، بير ده تبيي کي، داخيلي بير روح آزادليغي قيسيرليغي.» بو منطيقله آنا ديليميزده ده بؤيوک اثرلر يازا بيلمه نين شيفره لري چؤزولموش اولور: تفککور کاسيبليغي و و داخيلي روح آزادليغي قيسيرليليغي اورتادان قالديريليديغيندا هر ديل ياراديجيليق اوچون بير ايمکانلار مئيدانينا دؤنوشر. هئچ بير سماوي ديل يوخدور، اينسان روحونون و دوشونجه درينليگي نين ديله يوکلنمه سي ديلين داياناق محوري و گوون قايناغيدير. سارا بؤيوک بير اينانجلا آذربايجان کلاسيکلريني بو باخيمدان نينکي دونيا کلاسيکلريندن آشاغي، هم ده اوستون گؤرمکده دير. اورتادا اولان سادجه بير آشاغيليق کومپلئکسيدير. آذربايجاندا يازار اولان آزاد اوبرازي ايله سارانين ديالوقلاريندا ياراديجيليق، ديل کيمي بير چوخ سورونلار آيرينتيلاري ايله آلينير. حقیقته واران اينسان البتته ساوونماجي اولا بيلمز. بؤيوک آجيلاردان سونرا حقیقته وارميش اينسانين داورانيشي سالديرقان اولور. ياخشي و گؤزل بير سالديرقانليق. ايشيغين قارانليغا سالديريب قارانليقلاري آيدينلاتماسي کيمي بير سالديرقانليق نؤوو. سارانين سادجه بير حياتيندا دئييل، ايکي حياتينداکي آغريلاري و آجيلاري، چتين حياتي اونا دوغرولوقدان ساپماما توروبلري قازانديرديغي اوچون يانليشليقلارا قارشي ساواشقاندير. آذربايجان يازاري نين ديل آچيسيندان هئچ بير عکسيکليگي نين اولماماسيني دوشونور. بو، اونون کفش ائتديگي بير دوغرولوقدور، بير حقیقتدير. و بو دوغرولوغو آذربايجان يازاري اولان «آزاد» اوبرازينا هايقيراراق سؤيلر: «سنه نه مانع اولور آخي الينده اولان ديلده دونيا اوچون ماراقلي اولا بيله جک اثرلر يازماغا؟» و آزادين «سن بيزيم کلاسيکلريميزي دونيا کلاسيکلري ايله بير توتما» سؤيله مه سينه سارانين غورور، اؤزگوون و بيلگي دولو جاوابي گلير: «من بير توتمورام، من اوستون حساب ائديرم

ينسان اؤز «من»ي ايله راستلاناراق دايمي ايچ ساواشدا اولان ياراديليشدير. اينسان بو ايچ ساواش اورتاميندا يئتيشر، اؤزونو تانييار، اؤزونو قورار، اؤزونون و اؤز روحونون معماري اولار. بو باخيمدان «قريبليک» و «مغلوبيت» اينسانين «اؤز»و ايله موناسيبتي باغلاميندا آنلام قازانار. قريبليک کيمي قاوراملار مکان دَییشيکليگي ايله آچيقلانان آنلاملار دئييللر. بونلار اينسانين روحونون قارانليقدا، يا دا آيدينليقدا اولماسي ايله آچيقلانان دوروملاردير. سارانين بيرينجي حياتيندا پورتاقالييادا و ايکينجي حياتيندا آذربايجاندا اولماسي اوندا بو کيمي عکسيک دويقولاري اولوشدورماز. بو دوشونجه اثرده بو بيچيم آنلاتيلماقدادير: «اينسان اؤزونو تاپماديغي يئرلرده قريب اولور، اؤزونو ايتيرديگي يئرلرده مغلوب.» بو دورومدا هر شئي حقیقتين خيدمتينده اولماليدير. حقیقتين ايشيغي ايله آيدينلانميش اولان روح، اؤزونو کئچيجي، پريميتيو ايستکلره باغلايا بيلمز. حقیقت آدامي اولان سارا بيرينجي حياتيندا پورتاقلييانين قورتولوش ساواشچيسي اولان سئوگيليسي پاکودان عطير فيلان بکلمير. او، بوتون اينسانلاري سئون بير اوغلاني سئوير. «سنين هديه ن - فرانسيز عطيري و قيزيلگول دستسي يوخ، سئوگيلي نين زيندان ديوارلاريندان اعدام قاباغي يازيب اؤتوردويو کيرلي مکتوب اولاجاق بلکه.» سارا، قلبيني سارميش اولان حقیقتين منطيقي ايله داورانديغيندان ايتيره جگيني بيلديگيني سئوير. چونکو يالنيز بو يوللا سئوگي کشف ائديلير. فداکارليق يولو ايله. فئداکارليغين اولماديغي يئرده سئوگي اولا بيلمز دوشونجه سي اثرين عاشيقانه يئرلرينده بوتون جومله لردن بويلانماقدادير. روحوندا تکامول مرحله لري ياشايان و هر مرحله نين ده آجيلارلا دولو اولماسي ساراني عوصيانکار دوروما گتيرميشدير. حيات اونون اؤنونده بو يوللاري آچميشدير: «عوصيان اينسانين ايچينده اولماليدير، اينسان هر کسدن اول اؤزونه، اؤز دونيا ايستکلرينه عوصيان ائتمگي باجارماليدير، اؤزونه قاليب گلمه يهن بيري هئچ واخت، هئچ يئرده، هئچ کيمه، هئچ بير شئيده، هئچ جور قاليب گله بيلمز.» پاکونون سئوگيسي سارانين حياتيني اؤيله سينه سارميش کي، پورتاقالييانين قورتولوش ساواشيندا يوخا چيخان پاکو هئچ بير شکيلده اونون روحوندان آيريلمير. سارا پاکونون اؤلمزليگيني آنلايير. آرخاداشي چوجوق دوغوردوغوندا اونون آدي نين پاکو اولماسيني ديله يير. پاکو بير چوجوق تيمثاليندا يئنيدن دونيايا گلير. بو صحنه چوخ تاثيرليدير. آيريجا، بو سوال اورتايا چيخير: بو چوجوق دا ايکينجي حياتيني ياشاماق اوچون يئنيدن دونيايا گلن سارانين سئوگيلي اولان پاکومو؟ بؤیله جه زامانسيزليق ايچينده اينسانين اؤلوم و حيات آراسينداکي دؤنوشومو سيرلي شکيلده گؤز اؤنونده بولونور. دؤنوب دولاشيب بو دوشونجه نين وورقولانماسينا شاهيد اولوروق کي، بيز هاميميز «بير»يک. اؤلنلر دونيادان عکسيک اولمورلار. حياتداکيلار دا اؤلومون ايچينده ديرلر. يابانجي دئيه کيمسه يوخدور. سونسوز کوسموسون باغريندا يئرلشن بو يئر کوره سينده تک وار اولان سئوگيدير و بيز اونو ياشاتماق اوچون گئديب-گليريک. تانري سيرليليگي ده يالنيز بوردا کشف ائديلير. حيات و اؤلوم بيزي او´نا باغلاماق اوچون دؤنوشوملر بوتونودور: «اينسان اورگيني تانرييا باغيشلاميرسا، همين اورکده سادجه قارانليق بير بوشلوق اولا بيلر، ايبليسين سيغيناجاغي ايسه اورک اولا بيلمز.» بو مرحله ده اينسان اوچون ديرلي اولمايان بير شئي يوخدور. چونکو اينسانين دونيايا باخيشي نين مرکزينده تانري دوردوغوندان او´نون وارليغي بوتون ياراديليشدا گؤرونور، گؤروندويو اوچون ده ديرليدير. «تانري اوچون ياراتديغي بوتون وارليقلار موقدس و ديرليدير، اونوتما، حتّی ان گوناهلي بيريسي ده. اگر بئله اولماسايدي، او، اونلاري جهننمين اودوندان خيلاص ائتمک اوچون هر دفعه يئني بير اوميد، يئني بير اينام، يئني بير سئوگي گؤندرمزدي. بو دونيادا هر کسين اوددان قورتولماق شانسي وار، موطلق وار»

رومان اوزرينه داها اوزون دانيشماق ايستميرم. سانيرام بو قدري ايله بيرينجي اوخونوش اوچون يئتر. دوشونورم کي، گله جکده بير داها «ايسمين يئددينجي حالي» رومانيني اوخوما احتيياجي دوياجاغام. او زامان بلکه اثري فرقلي يؤندن آچيقلاماق ايمکانلاري دا اولار. باشقا اوبرازلاري آنلاتماق گرکر. تک ايستگيم بو کيتابين ذؤوقله اوخونماسي. ديرلي جاويدان خانيم خليلووايا منه بو مني ذؤوقو ياشاتديغي اوچون درين سايقيلاريمي بيلديريرم.

24.11.2011

ساعات 06.03

فينلاندييا- تامپئرئ.