شعر
qazzeeجناب نوبئل باریش موکافاتی !
بوگون  ناهارا غزه­­نین جنازه­­لرینی سئیر ائده-ائده  باسدیرما پیلوو یئدیک
بیر گؤزوموز تئلویزیونا باخدی
بیر گؤزوموز قاشیغیمیزین اَتینی عیارلادی
سونرا مدنی فیقورایلا باشیمیزی توولادیق انسانجاسینا
بومبالارین ویییلتیسی و تانکالارین ویژیلتی­یلا قیژیلداماسی
هئچ پوزمادی عصبلریمیزی، بیلمیرم  ندن   
21 غزه‌­­لی اوشاق و بیر چوخ قادینین اؤلدویونو سئیر ائتدیک
بونونلا بئله الیمیزی یئمکدن چکمه­­دیک
کوکاکولامیزدان واز گئچمه ­دیک
و کاهی سالادیمیزا عینادکار ناریشلار سیخدیق
یئرین بوش جناب باریش، چوخ یئمه­‌لی اولدو زیتون یاغی ایله!
البته بیر آن دوشوندوک کی، زیتون یارپاقلاری
گؤیلرده گیجه­­لن گؤیرچینین بوغازینا ایلیشیب بلکه،
آمما چَچیمه­­دیک   اودغونمادیق
نه اوره­­ییمیز نه معده­میز بولانمادی هئچ باشسیز جنازه­­لردن
و دانیشیقلاریمیزی  LGیوخسا  Samsung تئلویزیونلاری اوزرینده داوام ائتدیردیک
بونلارین هامیسی نه دئمکدیر جناب نوبئل باریش موکافاتی؟
سیز نه یئدینیز ناهارا عالیجناب؟
 
جناب جایزه    جناب نوبئل       جناب باریش!
نوه‌مین آدینی «کاتیوشا»  قویماغا سیزه سؤز وئریرم
یئتر کی، بومبالارینیزا  بویورون  بؤیله­‌جه آمانسیز اَلنمه­­‌سین
غزه اوشاقلارینین یومشاجیق دارانمیش ساچلارینا
و مصلحت بیلسه­­‌نیز بویورون
بیرآزجا یئر آچسینلار غزه­ کوچه‌­­لرینین گؤیلرینده
یانوار قارینین شیلتاقجا اویناقلاماسینا
 
2009/1/3
87/10/14
تبریز نیگار خیاوی