شعر

Alirza bakhshi-Alعلیرضا بخشی 30/6/1354 ده (1975/08/21) اردبیلین ان تانینمیش محلله لریندن بیری اولان، "مؤعجوز" (معجز) محلله سینین "غریبان" محلله سینه قوووشان کوچه سینین 114 اونجو پیلاکی اولان آتا ائوینده، آنادان دوغولدو. (سیجیللی سینده یازیلان 30/6/1353 دوغوم تاریخی یالنیشدیر). ایلک مکتبی اردبیلین "شمس حکیمی" (ایندی کی پانزده خرداد) اوخولوندا بیتیریب و اورتا مکتبی او واخت "باغمئشه" محلله سینده اولان "اربابزاده" (ابوذر) اوخولوندا اوخوماغا باشلامیشدیر. آنجاق یوخسوللوق و عاییله چتینلیگینه گؤره اورتا مکتبی (دبیرستانی) اونونجو صینیفدن (کیلاسدان) آرتیق اوخویا بیلمه­ییب و بیتیرمه­میش و یاریمچیلیق بوراخیب و عسکرلیکدن (سربازچیلیق) سونرا،، اردبیلدن گئدیب و قوربتلرده ایش گؤروب و عاییله سینه چؤرک قازانماق دالیسیجاق "بوشهر"، "عَسَلویه"، "بندرعابباس" و سایری فارس اوتوران شهرلره اوز توتوب و قایناتماق (جوشکارلیق) ایشی ایلن، چتین شراییط ده پول قازانماق اوچون ایشله مک مجبورییتینده قالمیشدیر.

ائله بو قوربتلرده و جوشکارلیق ایشین گؤرنده 26/5/1385 تاریخینده ( 2006/07/17) 31 یاشیندا، "ساوه" شهری ایلن "بویین زهرا" شهرینین آراسیندا اولان بؤیوک سیمنت (سیمان) زاوودونون (کرخاناسینین) تیکینتی ایشین گؤرَنده، گئجه یاریسی 15 متیر اوجالیقی اولان بیر یاریمچیلیق تیکینتی ده، ایشله­یرکن او دهشتلی هوندورلوکدن یئره دوشوب و بئلی اورتادان ایکی یئردن و بیر قولو دیرسکدن و بیر قیچی بوددان سینیب و اؤلوم حالینا دوشموش دور. کرخانا یئیه­سینین یاردیمی ایلن، تهرانین "آراد" خسته خاناسینا آپاریلیب و اورانین اوزمان حکیملری اولو تانرینین رحمیلن، چتینلیک­لن اونون بئلینین اونورغا بئیینینین (حارام ایلیگینین/ نوخاعینین) قیریلماغینا و چولاق اولوب و عؤمور بویو چرخ اوستونده اوتورماغینا مانع اولدولار. آنجاق بو آجی و آغریلی اولای اونون داها ایشلمه یینه و خانیم و اوچ اوشاغینا چؤرک قازانماغینا آرتیق انگل اولوب و حایاتین تام دییشیب آجیناجاغلی حالا سالمیشدیر. بو دویغولو شاعیر اوندان سونرا اؤز آجیلی و آغریلی یاشاییشا و اؤز آلینینین قارا یازیسینا دؤزوردو.

دوز گونو (دوشنبه)، مین اوچ یوز دوخسان دؤردونجو ایلین قیزاران آیینین (خرداد ماه) اون بیرینجی گونونو 11/03/1394 (2015/06/01) ساعات 2:40 صوبح ده اردبیل شهرینین امام خمینی خسته خاناسیندا دویغولو، درین دوشونجه لی، میللتچی اردبیللی شاعیریمیز علیرضا بخشی اؤرک دایانماسی خسته لیگین نتیجه سینده حایاتینی دییشیب و تانرییا قوووشدو. بو قیرخ یاشیندا گنج شاعیر 1389 (2010) اونجو ایلدن شعر دئییب یازماغا باشلاییب و بو یولدا آددیم آددیم ایرَلی گلیب و اؤز یاشاییشینین آجی و آغریلاریلان میللتینین آجی و آغریلارین دویوب؛ قاتیب و شعرلرینده هر ایکیسینی عکس ائدمیشدیر. بو شاعیر اردبیلده میللتچی گنجلریمیزلن ایلگی قاتیب، اوتوروب دوروب و آیاقلاشمیشدیر و اونلاردان الهام آلاراق اؤز شعرلرینی یارادماقدا ایدی. نه یازیق اجل یئلی اسدی و اونون چیچکلنمه یینه آمان وئرمدی و اونو آچمامیش یاپراقلادی. اؤزو دئمیشکن شعر یازیب یارادماق یولوندا مؤعللیملری اؤنجه سایین رحیم بی قولامی سونرا دوکتور شهریار نعمتی، و دوکتور اختیار بخشی (قارداشی) اولوبدورلار. بو شاعیر دن یالنیز بیر شعر توپلامی «آجی سئچیملر» آدیندا چاپ اولماق عرفه سینده ایدی. بو میللتچی شاعیره گؤره بیر شعر اوخوماق تؤرنی اردبیلده سرچشمه ده شمس کوچه سینین حوزه هنری ائوینده، سه شنبه 19/03/1394 گون اورتادان سونرا دوستلاری خانیم افسون به­نژاد و دوکتور شهریار نعمتی و امیر رجبی کؤمکی ایلن، توتولدو. بو مراسیم ده قارداشی دوکتور اختیار بخشی چیخیش ائددی و علیرضانین یاخشیلیقلاریندان یاد ائددی و اوندان بیر نئچه شعر اوخودو و اوندان سونرا اردبیلین، نیرین، نمینین، سرعینین، خالخالین و انزلینین میللتچی شاعیرلری، رحیم قولامی بی اردبیلدن، روزبه صمدی بی (نیراوغلو) نیر شهریندن، بهبود مرادی بی (خالخاللی ائلچی انزلی دن)، رحیم اسداللهی بی (قارتال) سرعین دن، هاشم فعال بی اردبیلدن و سایریلار شعرلرین اوخودولار و اونو تانیتدیردیلارآزربایجان میللتینین باشی ساغ اولسون. تانری روحون شاد ائله سین. آزربایجان میللتینین باشی ساغ اولسون. بو شاعیردن نئچه شعر بوتون آزربایجان میللتینه سونولور:

وارلیق

قارقا آدی منیم دی سه یومورتاسی بس دئ هانی؟

وطن آدی منیم دی سه بؤلونمه­یی آلار جانی

ایران دئییب توپراقیمی تالان ائدیب پارچالاما

پیچاق گؤتور دوغرا منی توپراقیما گه تؤک قانی

آنام منه بال دیلیمی وئریبدیر آی اسکیک آدام

سوتون دادی دیلیمده­ دیر آنادیلیمی رسمی تانی

هر نه قدر اللشه سن آد قویاسان اؤلکه­مه سن

آد وئریلیب اؤنجه اونا سن ده بونا آنلاق هانی؟

اوشاق گئدیر مدرسه یه بئینینه نه یوکله­یی­سن؟

دایان گؤروم تؤشکووو دَر تورکودو قایدانین کانی

گونش ساچیرسا ساچاجاق باخمالی­سان گؤرمه­لی­سن

سیل گؤزووون پاخیرلارین چوخلودو بابکین سانی

بو میللتی نه واختاجاق دوستاقیلان قورخودوسان؟

سئل کیمی بیر گون ییخاجاق وارلیقینا خور باخانی

31/2/1389                               2010/5/21

 

اوزولمه آی کؤنلوم منیم ده یاریم وار

ائلیم بؤیوک ائل دیر، گؤزل دیاریم وار

آنام دیلی بال دیر، اؤزل مرامیم وار

دوشونجه شاهی شاعیر شهریاریم وار

 

نه بیله ایدیم؟

زنگاری کؤنولدن آتاجاقدیم نه بیله ایدیم؟

زنجیره چکیلمیش یاتاجاقدیم نه بیله ایدیم؟

منلن دوغولان بیر یاشایان آغریلار اولدو

دوستاقی ائویمله قاتاجاقدیم نه بیله ایدیم؟

گنجلیک حایاتیم دالغانی یارماقلا سوووشدو

یورغون قوجالیقلا قالاجاقدیم نه بیله ایدیم؟

سؤندوم کول اولوب سوْورولاراق توپراغا دؤندوم

ظولمتده چاخیب گون ساچاجاقدیم نه بیله ایدیم؟

اؤز کیملیگیمی اؤزگه چالیب چاپدی آپاردی

چیرکین کوْلا مین گول تاخاجاقدیم نه بیله ایدیم؟

بیر عؤمر دو قوربت منه دوغما وطن اولدو

سون منزیله یورغون چاتاجاقدیم نه بیله ایدیم؟

3/4/1389                                 2010/6/24

 

داریخمیشام

دوستاقیمدا هاوام چاتمیر وئر سازیمی داریخمیشام

شرف ساتیب قازانمیرام وئر آزیمی داریخمیشام

ایسته میرم آسلان اولام پیشیک کیمی مییولدایام

اوو باشییامشیر توتانام وئر تازیمی داریخمیشام

نه واختاجان قیشلا قالیم ایستی یایا یانقی اولوم؟

قارانقوشام یاز ایستیرم وئر یازیمی داریخمیشام

آنا سودون دادمامیشام گونو الینده قالمیشام

یاساقلانیب آنام دیلی وئر نازیمی داریخمیشام

غزللریمده سؤزلریم وطن یولو گؤز ازبریم

ایسته میسن دینله یه سن؟ وئر یازیمی داریخمیشام

13/8/1390         2011/11/4

 

آختاریرام

اَینیم اولوب چوروم چوروم یاماق یامار آختاریرام

سئچیلمه دی ایری دوزوم کؤنلو هامار آختاریرام

حایات بوْیو بودره میشم کیملیگیمی ایتیرمیشم

آشیق سپیب اودوزموشام ایندی قومار آختاریرام

"لایلای بالام" یادیمدادیر سودون دادی دیلیمده دیر

ائل قایقیسی قانیمدادیر قانسیز دامار آختاریرام

بیزی کسیر شاختا بوران تاپاممیرام آرخا دوران

قاپازلانیر باشیم هر آن نازلی تومار آختاریرام

کمسیگله نیر ساغلاریمیز آجی سوغان چاغلاریمیز

یاغمور اومور اورمانیمیز دامجی دامار آختاریرام

22/12/1389       2011/3/13

 

آجی چاغلاریمیز

سوسما شاعیر بو آجی چاغلاریمیزدان دئ منه

زیل کؤمورتک قارالان آغلاریمیزدان دئ منه

بو ریا پیلله لری قان یاشیمیزلا یویولور

آلنیمیزدا گؤیَرَن داغلارمیزدان دئ منه

سومورورلار قانیمی بوزلو جانیمدان زلیلر

اؤلولردن اوجالان ساغلاریمیزدان دئ منه

اوراقیملا بیچیرم اوت، دارا کندیر ائشیرم

امگی تالان اولان باغلارمیزدان دئ منه

بیر عؤمور اؤزگه نی گولدورمه یه گولدوم اؤزومه

ائلی اَیلنجه ائدن لاغلاریمیزدان دئ منه

5/11/1389                                        2011/1/25

 

گؤزل آختارما منی

گوذرانیم قارادیر گؤزل آختارما منی

گزدیگین یئر هارادیر؟ گؤزل آختارما منی

من ارنلر ائلینین بیچیلن آل دیلی­یم

یاسلی اؤرکه­­­م پارادیر گؤزل آختارما منی

ساوالان تک بو دؤشوم درد اوْدویلان قالانیب

قان چاناقلار یارادیر گؤزل آختارما منی

منیم عونوانیمی گز آرپاچاییندان خبر آل

خان چوبانسیز سارادیر گؤزل آختارما منی

بو ائلین توپراقینا مین بئله جانیم قوربان

قوربتیمه چارادیر گؤزل آختارما منی

چکدیلر بنده منی قویما هارایلار سوسسون

گومانیم تک دارادیر گؤزل آختارما منی

3/3/1390                                                   2011/5/24

سورگون

گؤزومه ظولمت دن سونگو اکیلیب  

الیمی سورتورم سویوق بوجاقا

سوموگوم سؤکولوب سارای تیکیلب

سیغیندیم اوشوین سؤنن اوجاقا

***

پاخیرلی پیسلیکلر منده داریخار

باش داشا اوخشاما دئییلن دیلم

وولقانلار قاینایار سؤزومدن آخار

پایلانیب یاد ائله یئییلن ائلم

***

قوْوولوب دوشموشم یالا- یاماجا

ایلمه لر گؤز تیکیب یارا بارماقا

دوستاقدا تاپمیرام خیرداجا باجا

سوچلانیب جایناقیم قایا یارماقا

***

ایستیرم آدیمی ساوالان قویام

لئی تکین سیچرایام زیروه ده قالام

کافتارین توتام دریسین سویام

ظولمتلی تاپداغا اییلمز اولام

2/10/1390           2011/12/23

اوزلوکلر

چیلپاقلیغیمیزا

تضاددان پالتار گئیینمیشیک

آغدان الجک

قارادان گؤزلوک

***

پیسلیکلرده یاخشیجا

آکتورلانیرلار قارشیمیزدا

***

بیلمه ییرم هاچان

گوزگولر

گون آیدین دئیه جکلر

اؤزلوگوموزه؟

15/3/1390 قیزاران آی/ خرداد                          2011/6/5

 

 

یئددی گؤز کؤرپو

یارادانلار اونودولوبلار

و پالتارلار اَیینلری بَیَنمه ییرلر

منی منیمسه­یه­نلر

اؤزومو منه قایتارماق اوچون

مندن موشتولوق ایسته ییرلر

جالانیرام گون چیخانا

آرتیق واختی گلیب چاتیب

***

بو سیرادا دایانان

مندن سونونجونو سوروشانلار

سایسیز حسابسیز اولوبلار

نئچه مینجی یم؟

بیلمه ییرم

آنجاق

اونو بیلیرم کی

نفسلریمین سایی

مندن قاباقدا گئدیرلر

و

ایزسیز توزسوز گئدمه لر

مندن سونرا گله جکلر

***

بوراخین قینلانیم

من او کؤرپولرین گؤزلرین اوشاق اولارکن سایمیشام

نه آرتیق نه اسکیک

دوز قیرخ گؤزو وار

یئددی سی منیم پاییما دوشوب

اوتوزاوچونده بابام سنه وئریب

او عؤمور بویو سنی مندن چوخ ایسته دی

و ایندی

سن

اوغورلادیغیوا

مندن موشتولوق ایسته ییرسن!

29/12/1393           2015/03/20

 

یازیچی اولماق

یازیچی اولماق ایسته ییرسن؟

دوشونمه

داشین!

هئچ بیر قلم یا کاغیذ اولمایاجاق

و

دینمه

آنجاق

سؤزونو دئ

27/12/1393             2015/03/18

 

 

آستاگل تاماهلار

آستاگل تاماهلاریم دن سپیرلر

بخته­ور دؤگجلر تاپتاقینا آلدانام

و قولاغیما

پیچیلداشیرلار:

"گؤزونو یوم اووجونو آچ"!

***

دوشونجه لریمی بیر کورک تویوق سایاغی

دیمدیگیملن چکیرم آلتیما

اینانیرام اونلاردا

چاتلاداجاقلار

یومورتالارین ایچری­دن

و بیرگون

جیناق سوموگوم آیریلمالی­دیر

آخی جیرتلانلار

چوخ ایسته­ییرلر مرجله شیب چکیشه­لر

***

بئزدیریب منی بو قانادسیزلیق

قاداغالاری قانادلایان

یئتکین بیر کؤچر قوش اولماق ایسته­ییردیم

بورادا اوچماق قاداغان­دیر

سرحددی آشماق قاداغان­دیر

سن قاداغانسان

اوندان اؤترو کی

قاناد قاداغان­دیر

12/11/1393                   2015/02/01

 

مندن یاخشی اولماق

مندن یاخشی اولماق

ائله ده چتین دئییل دوستوم

ال قولوم کؤله­له­نندن

اؤزومو اؤتوب کئچمیشم

سنه داها

ایرجیشن شکیللردن دئمه­یه­جه­یم

اونلار چکیلیبلر

جاوان قالماق اوچون

من چیرکاب آنلاردان دئییرم

اورادا

یئنه پیشیکلر

ال اوزونو یوواجاقلار توپورجکلرلن

قودوز ایتلرده

سوله­نیرلر

لوت هوسلر کورسگینده

و آلمالار

آلمالار

بؤلونمه­میش

اینانمازلار چورویوبلر ایچریدن

***

من

هله ده

او قاپیلاردان دئییرم

کی دابانلیق گزیشمه­سینده

آختاریرلار

سَتَلجم چرچیوه­لری

داللانمیش قیچلاردان

و بیر قیز

یالنیز او قیز

اوجقار کندلرین بیرینده

کوبارلیق قوناقلیقیندا

آتوشکه­لرین

یاغیشلان یویونان دوشرگه­سینده

دیبلیگلری قاشییاجاق

یورولمادان

دیبلیگلری قاشییاجاق

قار یاغدیرماغا گؤره

***

هه دوستوم!

مندن یاخشی اولماق

هئچ ده چتین دئییل

13/11/1393                                             2015/02/02

 

دول آرواد

بو نملی اوجاقین توستوسو

یئنه چیمیزدیره­جک گؤزلریمی

تاختادان اوغلوما بیر اویونجاق کورَک یونورام

بلکه ده

گله­جکده

کورویه حسرت دولوسو تامارزیلارین

***

قیزیم دا

دیدیلمیش بیر کوله سوپورگه­نی گلینجک اوینادیر

کرپیجلری چوروین بوجاقدا

او همشه

آرزیلارینین ان گؤزللرینی

گئیدیریر گلینجه یینین اینینه

***

بو بوش بارداقدا

ندنسه

دای یوخو بورج وئرمه ییر

اونلارین گؤزله­ین گؤزلرینه

12/05/1393     قویروق دوغان آی/ مرداد        2014/8/3

 

آج گؤز

هر نه­یی چکیر دؤشونه اودور یالمانیر

سنین­له­یم

دوشونجه یه قنیم کسیلن یاد پیچیلتی

بیر دامجی موردار هوسدن

سیچرایان پینتیلیک

بیر عؤمور زیبیل داشییجی اولدوغووا شیشمه

***

تلس!

سنی آج یئر آداغلاییب­دیر

گلینلگینی

قالادیغین آغ یالانلارلا گئیین

آنجاق

سنی چیمیزدیره جک

قارانلیقین قارا قاریسی

***

منی هله گؤزله مه

ایسته­ییرم توزلانام گونه باخانلارا

قوی بو آج گؤز

هله ده قوخومو تامسینسین

توک اورپَدیجی سؤزلردن

تنتیین بئیینلردن

10/10/1391 چیله آیی/ دی                                2012/12/31

 

دیلیم یارادیر

گئجه مین دیبینده قالان کئلیگیمی

تامسینیرام قریب صاباحیما

***

بورادا

تامارزی قالمیش آج آماجلاریم

چیمچَشیرلر

یالانچی کوکلالاردان

***

دیرناقلاریم قاسناق باغلامیش

بیر قوجا خاچ آتانین گؤوده سین

قوپاردارکن

چکیلیبلر

***

بئیینیمه قنیم کسیلن دویغولار

اونورقا سوموگومون

ایلیگین ایچیرلر

ایچقیریرلار اوزومه

***

گؤره بیلدیگیم

بو کینو قارشیسیندا

ثانیه لر

قورقوشوم دامجیلاری

اومور

گؤز بَبَییمه

دیلیم یارادیر آنا!

2/7/1391 خزل آیی/ مهر                                    2012/9/24

 

چایدا اوزن آی

کورَییم چاپیق چاپیق اولسادا

آیاق قابیلاریمی تای دییشیک گئییب یوللانیرام

کی آلدانمایام

یالانچی یئل قووانلارا

***

قیلچیقلار

جورابلاریما پاپیشماق اوسته یاریشیرلار

چوخداندیر

قویلاییرام سؤزجوکلری

بلکه بیر گون صاباح کؤزرتیسینده

جیل[1] آتام

پالچیق بئیینلرده

***

گؤزلریملن گؤزلوکلریم

دالاشیرلار اوتوراجاق اوسته

بو های- هایدا

منی یاشادان

بیر گئجه دولوسو خلوتیمدیر

بیر ایستکان چای

اوندا اوزن آی!

12/6/1391 زومارآیی/ شهریور                       2012/9/3

اوزلوکلر

چیلپاقلیغیمیزا

تضاددان پالتار گئیینمیشیک

آغدان الجک

قارادان گؤزلوک

***

پیسلیکلرده یاخشیجا

آکتورلانیرلار قارشیمیزدا

***

بیلمه ییرم هاچان

گوزگولر

گون آیدین دئیه جکلر

اؤزلوگوموزه؟

15/3/1390 قیزاران آی/ خرداد                          2011/6/5

 

گئجه چاپاغانلاری

سیگارئتلریم کؤز اؤپوشوندن دویماییرلار

خوروز بانیندان کؤپک هوروشونه قدَر

پورسوقلار

اؤلولرین نیشان بارماقیندان

باشلاییرلار یئمه­یه

نییه کی

گؤسترمه­یه­لر

چوروموش رفدن آسیلان

چلیمسیز ایلدیریم شکیلین

***

اونلار چوخداندیر

بیر آغ قارغانین

بوغاز اتینه یئریگله­ییرلر

کی دئیه­لر

قارغالارین هامیسی قارادیرلار!

***

گئجه­لر هیمله­شیرلر

یاراسالار

قان گمیرمک ایلنجه­سینده

و سن

یوخو آدلانان کومادا

یوخو گؤرمه­یه

ایستی قان اؤده­مه­لی­سن

***

آمما

سندن اوزاق

تانیش یاخینلیقدا

پالچیق دووارلارین

چاتلامیش گؤبگینه

سؤیکه­نن یئنی­یئتمه­لر

بارماقلارین قاتلایارکن

ساییرلار

بیر ایکی بیزیمکی...

اوخ آتان آیی/ آذر 14/9/1393 2014/12/5                    

   

 

 



- کؤتوک، کؤک. خییو لهجه سینده[1]