داخیلی

(ايضاح: تبريزده بير جينس­دن اولان آداملار  بير- بيرلريني تاپاندا بير مثل دئيرلر:

"گوودوش دولانيب٬ دووآغين تاپار"

گوودوش: ايچينده پيتي قويولان٬ ساخصي قاب

دووآغ: گوودوشون قاپاغي)


گوودوش دولانیب تاپدی یئنه اسگی دوواغین








سالخاق سینیغا وئردی اؤپوش آچدی قوجاغین


*******


اؤز قویروغونا تولکو دئدی وئردی شهادت

 

 





پاکلاندی گوناهلار اؤلویه چیخدی برائت

 

 

تزویر و فيریلداق ایشینی گؤردو نهایت

 

 

باتمیش گمیچی سالدی تورون قوردو دوزاغین

 

 

گوودوش دولانیب تاپدی یئنه اسگی دوواغین

 

  

 باغلی توکانا بولدولار آخیرده بیر عنوان

 

 


آلتی تزک اوستو بزه یه وئردیله سهمان

 

آللاتماغا من من دئمه یه تاپدیلار میدان

 

خلوتده دی اویناشلار٬ ائوین دؤنگه بوجاغین


سالخاق سینیغا وئردی اؤپوش آچدی قوجاغین

 

 

قپ ماللارا اولسون دئیه بیر تازه بازارلیق


اسگی غرضین قصدینه غصب اولدو یازارلیق


گؤردوکلری اولموشسادا هر دووره آزارلیق


مغفوره چکیش تاپدی چوروک پاسلی اوراغین


سالخاق سینیغا وئردی اؤپوش آچدی قوجاغین

 

  

ارکان خفییه ائله دی اوممتین آگاه


انصار کرملین و پکن خورتلادی نا گاه


غصب اولدو امانت٬ چپکی قوردولار دزگاه


باب قلمه دورتدو قلمبازلار ایاغین


گوودوش دولانیب تاپدی یئنه اسگی دوواغین

 

 

 

یالنیشلاری اؤرت باسدیر ائدن اسگی قوماشلار


چوخدان گبه رن نظم ایله ناظیمله هاماشلار


یول یولداشی٬ یوخ٬ یولدا اولانلار٬ یولا داشلار


جایدیردیلار آخیرده اومود آرزی جالاغین


گوودوش دولانیب تاپدی یئنه اسگی دوواغین

 

 

کوفلو کؤهولون کؤهلری ترپندی نهایت


سورخابیله وئردی موشاتا میییته زینت


ائکسیر جهالت جسده یوکلدی جورأت


جیردی کفنین چکسه ده ایللردی قیراغین


گوودوش دولانیب تاپدی سینیق اسگی دوواغین

 

 

سؤنموش ساواشین شخته سيزاغیندا دونانلار

اؤزگور یاشام ایلن بیر عؤمور کوسگون اولانلار

یالنیشلارینین قئیدینه لاقئید قالانلار

چاغداش یاشامین آخسادا بیلمزلر ایاغین

اسگی آلیر هر آن یئنیلیکدن شاپالاغین