دریاچه اورمی

ایواز طاها


-دونیا شهریارین سؤیله‌دییی قده‌ر یالان اولماسا دا، گی دوبورن دویدوغو قده‌ر آجی‌دیر. شرفخانه ساحیلینده چیممیدیییم ایکی ایل اولماییب. ناطیق حئیوان‌لا دالغالی اورمو دنیزی‌نین قووشاغیندا اویناق یاشامین وارگوجویله جریان ائتدییی‌نین سئوینجینه دالمیشدیم بو آجی دونیادا. دورو، سو قده‌ر دوزلو، شعر و شهود قده‌ر گونده‌لیک رذالت‌لردن اوزاق بیر سئوینج. سانکی بیر آن توپلومون باسقیچی گوج قایناق‌لاری آشیریم حالدا ساخلانمیشدی، اؤته‌ری بیر آزادلیق أسیمیشدی دنیز قیراغیندا، یوخولارداکی کیمی. بونو گؤزومله گؤردوم، روحوم‌لا دویدوم. آنجاق ایکی ایله یاخین بیر موددتین بؤیوک بؤلومونو وطندن اوزاق اولدوغوم اوچون دنیزی گؤرمه‌میشدیم، نه اورمو ساحیلی چامورلارینی، نه ده وورنوخان قوش‌‌لارینی. ایندی همین یئره سوسقونلوق قاناد گریب. سو ایکی کیلومئتردن آرتیق گئری چیکیلیب، یئرینده دوزلاق قالیب. بو، تکجه قوراقلیق فاجیعه‌سی دئییل، طبیعت و آذربایجان دوشمن‌لری‌نین پارلاق ظفری‌دیر.



-گؤز قارالدیقجا سودان خبر یوخدور، آتیلمیش بیر تاختا اسکله وار، دوزا باتمیش کؤهنه قاییق‌لار، پاسلی گمی‌لر، و دوز دوزه‌نلییی اوستونده ایرلی شوتوین مینیک ماشین‌لاری. سودان خبر یوخدور، اوفوقون تاپدالانیب یئره یاماندیغی گئنیش مکانا قده‌ر یالنیش سیاست‌لرین قالاق قالاق ایزی وار؛ خالقین دنیزی دیری ساخلاماغا دایر ایستک‌لرینی قولاق آردینا وورموش بیر دؤولت سیاست‌لری‌نین ایزی. بو، مقصدلی دوشمنچیلیکدن‌می کؤک آلیر، یوخسا مقصدسیز چلیمسیزلیک‌لردن، باجاریقسیزلیق‌لاردان، سونوج بیردیر: دوز توزلاری یاشام دونیامیزین یالنیز یوخولارینا دئییل، یاشیل تارلالارینا دا قونا بیلر. بونونلا دا اورمونون گؤزل باغ‌لاریندا هم اوزوم تاغ‌لاری یانار، هم ده بالو یاللیسی یوخا چیخار.

-دوزون دنیزی مجنون یئل‌لری گؤزله‌ییر. آذربایجان بونا دؤزمز، یوْخسا دوزلارین اوزه‌رینده بؤیوک حرف‌لرله یازمازدیلار: تانری آذربایجانی قوروسون.