قادينلار زنان

Feministerkeklikفمينيزم هر کس اوچوندور: فمينيست بير جينسلليک پوليتيکاسی

آذربايجان تورکجه‌سينه اويغونلاشديران: تورکان اورمولو

 15 -نجی بؤلوم

قارشيليقلی بير اؤزگورلوک ائتيکی 

فمينيست حرکت و جينسل دئوريمدن اؤنجه، ساغلام بير جينسل اؤزن(سوبيئکت) اولماق، بير چوخ قادين اوچون تمامن ايمکانسيز دئييلسه ده چوخ چتين ايدی.

قادينلارا دوغولدوقلاری آندان اعتيبارن اؤيره‌ديلن جينسيتچي دوشونجه، جينسل ايستک و حظ آلانين دايم و يانليزجا اريل(کيشي‌ساياغی، ائرکک‌ساياغی) اولدوغونو، جيسل احتيياج، يا دا آجليغی ساده‌جه عيفتسيز قادينلارين ديله گتيرديگينی آچيقجاسينا ايره‌لی سوروردو. جينسيتچی دوشونجه طرفيندن يا قوتسال باکيره يا دا فاحيشه رولو بو صيفتلری وئريلن قادينلارين ساغلام بير جينسل منليک اولوشدوراجاق داياناقلاری يوخ ايدی. نئجه کی فمينيست حرکت جينسيتچی شابلون فيکيرلره درحال مئيدان اوخودو و بونون، اؤلکه‌ميز تاريخينده، گوونلی دوغوم کونترولونون هر کس اوچون الوئريشلی حالا گلديگی دؤنمله راست گلمه‌سی ياخشی اولدو.

گوونلی دوغوم کونترولوندان اؤنجه قادينلار اؤزلرينی جينسل اؤزنه اولاراق ايفاده ائتديکلرينده، "جزا اولاراق" ايسته‌نيلمه‌ين حاميله ليک يا دا قانونسوز آبورتون تهلوکه‌لری ايله قارشيلاشا بيليرديلر. قادينلارين گوونلی دوغوم کونترولوندان اؤنجه قاتلانديقلاری جينسل پاتولوژی و قورخونو دونيايا بيلديرمک اوچون هله يئترينجه شاهيد توپلايا بيلمه‌ميشيک. قادينلارين هر جينسل ايليشکينين آرديندان حاميله قالماق ريسکی داشيديغی يا دا ائرککلر سئکس ايسته‌ديکلرينده قادينلارين سئکسدن قورخدوغو بير دونيا دوشونمک بئله منی قورخودور. بئله بير دونيادا ايستکلي بير قادين، اؤزونو قورخو و ايستگين کسيشديگی نؤقته‌ده گؤره بيلر. قادينلارين ائرککلرين ساتاشمالارينی نئجه سوووشدوردوغو، هر زامان داوام ائدن بؤيوک تجاووزونه معروض قالديقلاريندا بونونلا نئجه باشا چيخديغی، ايسته‌نيلمه‌ين حاميله ليکله مشغول اولارکن قارشی قارشييا قالديقلاری اؤلوم ريسکينين آلتيندان نئجه قالخديغی حاقيندا دا يئترينجه شاهيد توپلايا بيلمه‌ميشيک. بيلديگيميز بودور کی، قادين جينسلليگينين دونياسی فمينيست جينسل دئوريمين گليشی ايله راحاتجاسينا گئری دؤنوله بيلميه‌جک شکيلده دييشمه‌ليدير.

آنالاريميزين جينسل آجی و ايضطيرابلارينا، جينسللييه داير مؤحتشم قورخو و نيفرتلرينه شاهيد اولانلاريميز اوچون، تام دا جينسلليگيميزی کشف ائديب ياشامايا باشلاديغيميز بير دؤنمده بيزه اؤزگورلوک، ايستک و ذؤوق وعد ائدن بير حرکته گيرمک مؤحتشم بير شئی ايدی. آرتيق بو گون قادينلار جينسل ايستکلرينی ايفاده ائتمک قونوسوندا کئچميشه گؤره داها آز مانعله قارشيلاشديغی اوچون، گونوموزده قادين بدنينه و جينسلليگينه قارشی آتااَرکيل هوجوما داير تاريخی يادداشين اوستونون اؤرتولمه‌سی کيمی بير ريسک واردير. بو حافيظه‌سيزليک اورتاميندا،آبورتون قانونسوز حالا گتيريلمه‌سی يولونداکی چاليشمالار، آبورت يولويلا بير ياشاما سون وئريليب وئريلمه‌ديگينه اوداقلانا بيلر؛ آمما آبورتون غئيری قانونی ائديلمه‌سينين قادين جينسلليگی اوزرينده‌کی آچاجاغی درين يارالاردان هئچ دانيشيلمير. نه وار کی هله جينسل حظظی هئچ دادماميش، سئکسی اؤزلری اوچون الدن وئرمه، تهديد، تهلوکه و يوخ اولما آنلامينا گلديگی قادين قوشاقلاری ايله ياشاييريق.

قادينين جينسل اؤزگورلوگو، گووه‌نيلن و ساغلام دوغوم کونترولو گرکديرير. بو اولمادان قادينلار جينسل فعاليتين سونوجلاری اوزرينده تام نظارت صاحيبی اولا بيلمزلر. آنجاق قادينين جينسل اؤزگورلوگو ده عئينی زاماندا شخصين بدنينی تانيماسينی و جينسل بوتونلوگون آنلامينی بيلمه‌سينی ده گرکديرير. ايلک دؤنم فمينيزمين جينسلليک اطرافينا هؤرولموش فعاليتی، جينسلليگيميزی ايسته‌ديگيميز زامان ايسته‌ديگيميز شخصلرله ياشاما حاقينين تانينماسی اوزرينه قورولموش سيياستلری او قدر اؤن پلانا چيخاردی کی، بدنلريميزه جينسيتچی اولمايان بير شکيلده نئجه ياخينلاشاجاغيميزی يا دا اؤزگورلشديريجی سئکسين نئجه بير شئی اولا بيله‌جگينی اؤيره‌دن، تنقيدی بيلينجه قارشی فمينيست ائييتيم ياخشيجا آرخا پلاندا قالدی.

1960-جي ايللرين سونلاريندا و 1970-جي ايللرين باشيندا قادينلار جينسل اؤزگورلوکله شانس اثری جينسل ايليشکييه گيرمگی بير آنلاملی ائتمه‌يه تشويق ائديليردی. او گونلرده بير چوخ هئتئروسئکسوال ائرکک، جينسل اؤزگورلوگونو قازانميش قادينلاری، سسينی چيخارتمادان، ينی اؤزلليکله دويغوسال آنلامدا هئچ بير ايستکلری اولمادان قارشيسينداکی ايله بيرليکده اولان قادينلار اولاراق گؤروردولر و بو آنلاييش، بو گون ده بير اؤلچوده کئچرليليگينی قوروماقدادير. چوخ ساييدا هئتئروسئکسوال فمينيست ده عئينی خطالی فيکره صاحيب ايدی، چونکی اونلار دا آتاارکيل ائرککلرين دوزلتديگی داورانيش قاليبلارينا گؤره حرکت ائتمکده ايدی. بونا باخماياراق قادينلارين نئجه گلديسه جينسل ايليشکی ايله جينسل اؤزگورلوگون عئينی شئی اولماديغينی آنلاماسی چوخ چکمه‌دی.

فمينيست حرکتين "قيزغين" گونلرينده راديکال لئزبيين آکتيويستلر، سورکلی اولاراق، هئتئروسئکسوال قادينلاردان ائرککلر ايله ايليشکيلرينی يئنيدن ديرلنديريلمه‌لرينی و بونو سورغولامالارينی طلب ائتديلر:

اؤزگورلشميش هئتئروسئکسوال بير تجروبه ياشاماق آتاارکيل بير باغلام ايچينده مومکونمويدو؟ بو سورغولاما حرکت اوچون فايدالی بير گيريشيم ايدی. چونکی هئتئروسئکسوال قادينلارين هئتئروسئکسوال پراتيکه دايیر سورکليليگی اولان بير تنقيدی آچيق گؤزلولويه گيرمگينه ندن اولماسينين يانيندا لئزبيينلره ده ديقت چکدی؛ بير ياندان گوجلرينی موثبت بير شکيلده گؤستررکن چاتيشمازليقلارينی دا اوراتايا چيخاردی. زامانين "فمينيزم تئوريدير، لئزبيينيزم ايسه پراتيک" شوعارينين تاثيرينده قالان و ائرککلر ايله بيرگه اولماقدان واز کئچه‌رک قادينلاری سئچن بير چوخ قادين، زامانلا بو ايليشکيلرين ده دويغوسال آنلامدا ديگرلری قدر آلاجاقلی اولدوغونو و ان آزيندان باشقا ايليشکيلر قدر چتينليکلرله دولو اولدوغونو آنلادی.

لئزبيين برابرليگين هئتئروسئکسوال بير ايليشکييه گؤره نه درجه ياخشی يا دا پيس اولدوغونو بللی ائدنن شئی گئنلده ايکي اينسانين عئينی جينسدن اولماسی دئييلدی. اصيل بليرله گيجی عاميل، طرفلرين هر ايليشکيده موطلق بير حؤکم ائدن و بير ده بويون اَين طرف اولدوغو يؤنونده‌کی سادومازوخيست يارقيلارا دايانان بير باسقی کولتوروندن اؤن گؤردويو عشق و ايليشکی تعريفلرينی ييخما قونوسوندا نه درجه قرارلی اولدوقلاری ايدی. هئتئروسئکسوال ايليشکيده شانس اولاراق جينسل ايليشکينی جينسل اؤزگورلشمه ايله عئينی ديرده گؤرمک نئجه ايمکانسيزلاشميش ايسه لئزبيين ايليشکيده ده او قدر ايمکانسيز حالا گلميشدی. جينسل سئچيم نه اولارسا اولسون، بو ايکيسينی برابر توتماق اوچون آجی چکميش قادينلار سئکس قونوسوندا خيال قيريقليغی ياشاميشديلار. ائرکک باسقی ايله جينسل زوراکيليق آراسينداکی باغی گؤز اؤنونه آلديغی زامان، جينسل موتسوزلوقلارينی داها اوجا سسله ديله گتيرنلرين ائرککلر ايله بيرگه اولان قادينلارين اولماسی دا شاشيرتيجی دئييلدی.

جينسل اؤزگورلوک رؤياسی قارشيسيندا ياشانان خيال قيريقليغی سونوجوندا، بير چوخ فمينيست دوشونر بو تجروبه‌لر ايله باشا چيخماغا چاليشماقدان واز کئچدی و قادين دوستلارينين اوز- اوزه قالديغی منفی حاللاری هر تور جينسل فعاللييت، اؤزلليکله ده ائرککلر ايله قورولان جينسل تماس قارشيسيندا باسديريلميش بير آجيقليغی بسله‌دی. بير زامانلار بوتون قادينلاری "دوشمنله ياتماق" قونوسوندا حساب وئرمه‌يه چاغيران يئگانه سسين صاحيبی راديکال لئزبيينلرين آرالارينا، ايندی ائرککلر ايله آغير بير خيال قيريقليغی ياشاديقلاری اوچون اؤز جينسی ايله ايليشکينی سئچن هئتئروسئکسوال قادينلار دا قاتيلميشدی. جينسلليک ايله، اؤزلليکله ده جينسل ايليشکی ايله ايلگيلی اولاراق اورتايا چيخان سؤيلم ندنی ايله، بيردن بيره هر جينسل ايليشکی جينسل زورلاما و ائرکگين قادينا هر پئنئتراسييانی(گيرمه) تجاووز کيمی گؤرولمه‌يه باشلاندی. بو تئوريلر و بونلاری يايان کاريزماتيک قادينلار، يئنی و فرقلی جينسل کيمليکلر الده ائده بيلمک يولوندا موجاديله ائدن گنج قادينلارين بيلينجينی بير سوره دريندن ائتکيله‌دی. بو گنج قادينلارين چوخو سونوندا يا بيسئکسوال(يکي جينسلی) پراتيکلری يا دا آنجاق بوتون جينسل قارشيلاشمالارين قادين طرفيندن تعيين ائديلمه‌سی شرطی ايله قادين-ائرکک ايليشکيلرينی منيمسه‌ديلر. آنجاق بو نؤقته‌ده بير چوخ گنج قادين دا فمينيست دوشونجه‌يه آرخاسينی چئويردی. جينسل اؤزگورلوکله ايلگيلی سوره‌سينی دولدورموش جينسيتچی مفهوملارا گئری دؤنه‌رک بونلاری منيمسه‌ديلر، حتّی بعضاً بونلاری اينتيقام آلارجاسينا صاحيبلنديلر.

بو دورومدا جينسل لذت ايله تهلوکه، جينسل اؤزگورلوک ايله کؤله‌ليک آراسينداکی گرگينليکلردن دوغولان ضيديت و توققوشمالارين او دؤنمده جينسل سادومازوخيزمی چکيجی ائتمه‌سينه شاشيرماماق لازيمدير. فمينيزمين جينسلليک ايله ايلگيلی سورغولاماسی تئز يادا گئج ايقتيدار سورونوندا دويونله‌نيردی. فمينيست دوشونرلر ائشيتليکدن نه قدر دانيشير دانيشسين، جينسل ايستک و جينسل ائحتيراس حياتا کئچيريلمه‌سی سؤز قونوسو اولدوغو زامان جينسل آرئنادا اورتايا چيخان ايقتيدار و ايقتيدارسيزليق ديناميکلری، ائنديرگه‌مه‌جی(رئدوکسيياچی) ازن و ازيلن مفهوملارينی آلت- اوست ائديردی. جينسل سادومازوخيزمی فمينيست لئزبيينلرين ده ياشاديغينی، اونلارين دا آلتداکی-اوستده‌کی ديناميکی اوزرينه قورولموش بير دونيالاری اولدوغونون اورتايا چيخماسی ايله هئتئروسئکسوال پراتيکلره يؤنلديلن فمينيست تنقيد داها اؤنجه قارشيلاشماديغی قدر بؤيوک بير سارسينتی ياشادی.

حرکتين ايچينده‌کی قادينلار، لئزبيين ويا هئتئروسئکسوال اولماسيندان آسيلی اولماياراق بير قادينی هم جينسل سادومازوخيزم پراتيکينده يئر آليب هم ده اؤزگورلشميش بير قادين اولوب اولماياجاغی قونوسوندا داوا ائتمه‌يه باشلاديقلاريندا، جينسلليک ايله ايلگيلی بوتون راديکال فمينيست دارتيشمالار سونا چاتدی. آتاارکيل پورنوقرافييانين آنلام و اؤنه‌می ايله ايلگيلی دوشونجه فرقليليکلری ده بو قونو ايله ايلگيلييدی. حرکتی بؤلمه‌يه و بيتيرمه‌يه يئته‌جک قدر جيدی دارتيشمالار ايله قارشيلاشديقدان سونرا، 1980-جی ايللرين سونلارينا گلديگيميزده، جينسلليک ايله ايلگيلی راديکال فمينيست دارتيشمالار ايجتيماعدا يورودولمز اولدو؛ بونلار آرتيق اؤزل آلانلاردا دارتيشيليردی. جينسلليک ايله ايلگيلی دارتيشمالارين ايجتيماعدا گئتمه‌سی حرکتی محو ائتميشدی.

ايجتيماعدا جينسلليکدن ان چوخ دانيشان قادينلار، موحافيظه‌کارليغا، بعضاً قاتی قورالجيليغا و سئکس دوشمنليگينه مئييللی ايدی. حرکت راديکال بير دييشيمه معروض قاليب، قادينين جينسل اؤزگورلوگونون ساوونولوب قوتلانديغی بير آلان اولماقدان چيخيب جينسلليک ايله ايلگيلی ايجتيماعی دارتيشمالارين داها چوخ جينسل زوراکيليغا و ضرر چکمه‌يه اوداقلانديغی بير آلانا دؤنموشدو. واختيندا قادينين جينسل اؤزگورلوگو قونوسوندا بؤيوک ايشلر باشارميش اولان ياشجا داها بؤيوک، داها يئرينه اوتورموش و قبول گؤرموش فمينيست قادينلار آرتيق جينسل ايليشکييه گيرمه‌مه‌گی قييمتلنديره‌رک جينسل ايستگين اؤنمسيز اولدوغوندان دانيشماغا باشلاميشديلار. بو گون ايسه جينسل ايستک و پراتيک قونوسوندا آچيقجا دانيشيب يازان قادينلار گئت- گئده فمينيست جينسلليک سيياستينی بير کنارا آتيرلار يادا اؤزلرينه بو سيياستين اوزاغيندا يئر وئريرلر. فمينيست حرکت هئچ اولماديغی جينسلليک دوشمنليگی بير گؤرونتو گؤسترير. جينسل حظ و ايستک ايله ايلگيلی ويزيونئر فمينيست سؤيلم(ديسکورسييا) بير سوره‌دير تخمينن هر کس طرفيندن گئری پلانا آتيليب گؤرمزدن گلينير. قادينلار و ائرککلر، بونون يئرينه جينسل اؤزگورلوگون آتاارکيل مودئللرينه بئل باغلاماغا داوام ائديردی.

بيليريک کی جينسل دئوريمه و فمينيست حرکته باخماياراق هله بير چوخ هئتئروسئکسوال قادين سادجه ائرککلر ايسته‌ديگی اوچون سئکس ائدير؛ گنج ياشلارداکی بير چوخ قادين و ائرکک ائشجينسه‌لين جينسل سئچيملرينی راحاتجا ياشايا بيله‌جکلری، بونو دستکليه‌جک اؤزل و ايجتيماعی بير اورتاملاری هله يوخدور؛ جينسيتچی قوتسال باکيره يا دا فاحيشه قونوسو بير چوخ قادين و ائرکگين ائروتيک تصوورونه تاثير ائتمگی هله سوردورور و آرتيق آتاارکيل پورنوقرافی کوتله مئدياسينين هر يانينا نوفوز ائتميش دورومدادير و تأسوفله کی هله، ايسته‌نيلمه‌يه‌ن حاميله ليک نيسبتلری آرتير؛ يئنييئتمه‌لر قانع ائديجی و گوون وئريجی اولماقدان اوزاق جينسل حياتلاری ياشاييرلار؛ ايستر هئتئروسئکسوال ايستر ائشجينسل بير چوخ ايليشکيده ويا اوزون سوره‌لی ائوليليکده قادينلار سئکسی ياشاميرلار، بوتون بو گئرچکلر، جينسلليک ايله ايلگيلی يئنيلنميش بير دارتيشمايا احتيياج دويولدوغونو گؤسترير. اؤزگورلشديريجی جينسل پراتيکين نئجه بير شئی اولدوغونو بيلمه‌يه هله احتيياج دويوروق.

قارشيليقليق تمه‌لينده بؤيوين سايغی، اؤزگورلشديريجی جينسل پراتيکلر باخيميندان واز کئچيلمز اولمانين يانيندا بو تثبيتين ده حياتی بير پارچاسيدير: جينسل حظ و دويوما، ان ياخشی سئچيم و قارشيليقلی ريضايا اساسلانان اوزلاشما، هر ايکی طرف ده جينسيتچی دوشونجه‌لردن واز کئچمه‌ديکجه اوزون نفسلی هئتئروسئکسوال موتلولوغو تانييا بيلمز. هله بير چوخ قادين و ائرکک، ائرککلرين جينسل پئرفورمانسينين پئنيسين برکلشيب برکلشمه‌مه‌سی يا دا ائرئکسييانين(جينسي عوضوون فيزيولوژی شيشمه‌سی) قورونوب قورونماماسی ايله اؤلچوله‌جگينی دوشونور. ائرککلر، قادين جينسلليگينين صيرف ائرکه‌يه خيدمت ائتمک و ائرکگين احتيياجلارينی قارشيلاماق اوچون وار اولدوغونو اؤن گؤرن جينسيتچی دوشونجه‌دن واز کئچمک مجبوريتينده ايکن، بير چوخ قادين دا پئنئتراسييايا فيکرينی قاتماقدان واز کئچمه‌ليدير.

جينسل اؤزگورلوگون و گونوموز فمينيزمينين قيزيل چاغيندا قادينلار، ائرککلرين گئنلليکله جينسلليک خاريجينده هر آلاندا برابرليگی قبول ائتمه‌يه ايستکلی اولدوقلارينی گؤردولر. بير چوخ ائرکک ياتاق اوتاغيندا جينسل آنلامدا ايستکلی، حظ وئرمه‌يه و حظظی پايلاشماغا هوسلی بير قادين ايسته‌يير آمما نهايتينده، قادينين جينسل پئرفورمانسيينين (يعنی قادينين سئويشمک ايسته‌ييب ايستمه‌ديگينين) تمامن ائرکگين ايستگی ايله تانيملانماسی گرکديگينی اؤنگؤرن جينسيتچی دوشونجه‌دن واز کئچمک ايستمير. هوسلی و هيجانلی گؤرونن، اؤزگورلشميش قادينلارلا بيرليکده اولماق ائيلنجه‌لی ايدی، آمما عئينی قادينلار جينسلليکلرينی حياتا کئچيرميه‌جکلری بير آلان ايسته‌ديکلرينی اعلان ائتديگينده اونلارلا اولماق هئچ ده ائيلنجه‌لی دئييلدی. بئله بير دورومدا هئتئروسئکسوال ائرککلر گئنلليکله جينسل راحاتلاما اوچون باشقا آراييشلارا گيرمه‌يه احتيياج دويدوقلارينی آچيقجا اورتايا قويوردو. بو توتوم هم قادين بدنينين مولکيتينه باغلی جينسيتچی پاراديقمايا داواملی بير باغليليق گئرچگينی آرتيرير هم ده ائرککلرين هر هانسی بير قادين بدنينين يئته‌جگی دوشونجه‌سينه ساريلديغينی گؤستريردی. هئتئروسئکسوال يا دا ائشجينسل اؤزگورلشديريجی بير ايليشکی هر ايکی طرف ده نه زامان نئجه و نه سيخليقلا جينسل ايليشکيده اولماق ايسته‌ديگينی، جزالانديرماقدان قورخمادان بللی ائتمه قونوسوندا اؤزگور اولماليدير. بوتون ائرککلر، جينسل احتيياجلارينا جاواب وئرمه‌سی اوچون اؤزلريندن باشقا بيرينه احتيياج اولدوغونو دوشونمکدن واز کئچمه‌ديکجه، پارتنئرلرين جينسل آنلامدا تابئ ائديلمه‌سينی ايچرن طلبلر سوره‌جکدير.

جينسللييه داير گئرچک آنلامدا اؤزگورلشدريجی بير فمينيست سياست، قادينين جينسل حرکتلنديريجيليغينين ساوونولماسينی دايیما گوندمينين مرکزينده توتاجاقدير. قادينلار، بدنلرينين جينسل آنلامدا سورکلی باشقا بير شئيين خيدمتينه سونولماسی گرکديگينه اينانديغی سورجه، بو حرکتلنديريجيليک گئرچکلشه بيلمز. پروفئسسيونال فاحيشه‌لر و حيات قادينلاری، مال ويا خيدمت قارشيليغيندا واژينالارينی آزاد بازار آلانيندا قوللانيما/تيجارته آچمالارينی اؤزگورلشميش اولدوقلارينين بير گؤسترگه‌سی اولاراق سونوردولار. ماددی احتيياجلارينی باشقا شکيلده قارشيلايا بيلمه‌ديگی اوچون بدنينی بازارلايان بير قادينين، اؤز بدنينين تجروبه‌سينی اؤزونه وئرن جينسل بوتونلوک آلانيندان محروم قالما ريسکينه گيرديگينی گؤرمگی ردد ائديرديلر.

بير چوخ هئتئروسئکسوال قادين، اؤز جينسلليگينين آنلام و دير قازانماسی اوچون ائرککلر طرفيندن سورکلی ايستنمه‌سی گرکديگی يولونداکی جينسيتچی دوشونجه‌دن قورتولا بيلمه‌ميشدير. بونو باشارا بيلمک اوچون، ائشجينسل ايليشکيلرين، اؤز- اؤزونه حظ وئرمه‌نين و جينسل ايليشکی ياشامامانين ائرککلر ايله آتاارکيل کولتور ايچينده جينسل ايليشکييه گيرمک قدر اؤنملی و زنگينلشديريجی اولدوغونا اينانمامالاری گره‌کير. بير زامانلار فمينيست دييشيمی ساوونموش و بو گون ياشلانماقدا اولان بير چوخ قادين، داها گنج قادينلار ايله بيرليکده اولماق اوچون اؤزلرينی بوراخاجاغيندان قورخدوقلاری ائرککلر ايله هر هانسی بير جينسل تماس ايچينه گيره بيلمک اوچون، قادينليغا و جينسل آنلامدا ايسته‌نيله بيلر اولماغا داير جينسيتچی قاوراملاری تصديقله‌مک مجبوريتينده قالديقلارينی دوشونورلر. ائله ايسه راديکال فمينيست دوشونرلر ايللر اؤنجه بونو سؤيلرکن بير اؤلچوده هاقلييديلار: قادينلارين حقيقی جينسل اؤزگورلشمه‌سی آنجاق قادينلارين، ائرکک ايستگينين نسنه‌سی(اوبيئکتي) اولوب اولماديقلارينا باخمادان، اؤزلرينی جينسل بير دير و حرکت وئريجيلييه صاحيب سايديقلاری بير نؤقته‌يه چاتماقلا مومکون اولاجاقدير. بو جينسل حيسيييات و کيمليگين، آتاارکيل قورولوشونو گوجلو بير شکيلده قورويان بير توپلومسال باغلامدا اؤزونو نئجه ايفاده ائده بيله‌جگينی بيزه گؤسترمه‌سی اوچون يئنه فمينيست تئورييه احتيياجيميز واردير.

فمينيست سؤيلمين جينسلليک قونوسونداکی سينيرلارينا باخماياراق فمينيست پوليتيکا، اؤز تئوری و پراتيکی سايه‌سينده قارشيليقلی موتلولوق تصوورونو سونان تک توپلومسال عدالت حرکتدير. يانليزجا جانيميز ايسته‌ديگينده جينسل ايستگيميزی ايفاده ائتمه و جينسل حظظین ايچينده ياشامی موثبتلشديرن بير ائتهوس(خلاقي دير) تاپما حاقينا صاحيب اولدوغوموز پرينسيپينه اساسلانان بير وارليق ائروتيکاسينا احتيياجيميز واردير. ائروتيک باغلار، بيزلری توپلوما يادلاشديرماقدان و سويوتلانماقدان(موجرردلشديرمک) قورتاران باغلاردير. جينسللييه دويولان حسرتين موثبت ايفاده‌لرينين بيزلری بير- بيريميزه باغلاديغی بير دونيادا، هاميميز گليشمه‌ميزی دستکله‌ييب بسليه‌جک جينسل پراتيکلری سئچمکده اؤزگور اولاجاغيق. بو پراتيکلر تصادوفی جينسل ايليشکييه گيرمگی و يا جينسل ايليشکی قورماماغی سئچمک اولا بيلر. بير تک جينسل کيمليک و سئچيمی قبوللانماق دا اولا بيلر؛ ويا جينسيتی، عيرقی، سينيفی و جينسل سئچيمی نه اولارسا اولسون، ائروتيک تانيملامالارين قيغيلجيمينی حيسئتديگيميز او اينسانلارلا قارشيليقلی تاثير سونوجو ياشاياجاغيميز، خريطه‌سی چيخارديلميش ايستکلر آراسيندا باشی بوش گزمه‌يه اوستونلوک وئرمک ده اولا بيلر. جينسل اؤزگورلوک حرکتينين يئنيدن باشلايا بيلمه‌سی اوچون جينسللييه داير راديکال فمينيست دييالوقلارين يئنيدن اورتايا چيخماسی گره‌کير.