قادينلار زنان

asid-Dr. Simin Sabri”ایران اسلام جمهوریتینین قانونوئریجیلییی قادینلارا قارشی حیاتا کئچیریلن هوجوملارا زمین یارادیر. حاکیمییت قورخو آتموسفئری یاراتماقلا قادینلاری توپلومدان اوزاقلاشدیریب ائولرینده اوتورتماق ایستییر،” دئیه گونئیلی پسیخیاتر (روانپزشگ) سیمین صبری آمئریکانین سسینه موصاحیبەده ایراندا قادینلارا قارشی کیمیاوی تورشو (اسید) هوجوملاری ایله باغلی تپکیسینی ایفاده ائدیر. کئچن هفتەلرده ایرانین اصفهان شهرینده بیر نئچه قادین کیملیکلری بللی اولمایان کیشیلر طرفیندن هوجوملارا معروض قالیبلار. کیمیاوی اسید قادینلارین اوزونو یاندیریب.

قادین حاقلاری مودافیعەچیلری هوجوملارین سیستئماتیک شکیلده حیاتا کئچیریلدییینی قئید ائدەرک حاکیمییت و حاکیمییته یاخین قروپلارین بو هوجوملارا زمین یاراتدیغینی، ائلەجه ده حادیثەلری اؤنلەمک ایستیقامتینده حؤکومتین جیدی بیر آددیم آتمادیغیندان شیکایتلنیرلر.

 

سیمین صبری-نین فیکرینجه، قادینلارا قارشی بو قورخونج هوجوملاری حیاتا کئچیرن کیشیلری جسارتلندیرن سون واختلاردا ایرانین اسلامی شورا مجلیسینده گوندەمه چیخان قانون لاییحەلری اولوب.

 

گونئیلی فعال خوصوصیله بو هوجوملاردان آز مودت اؤنجه پارلامئنتده موذاکیرییه قویولان ”امر به معروف و نهی از منکر” (یاخشیلیغا امر ائتمه و پیسلیکلردن چکیندیرمه) لاییحەسینه ایشاره ائدیر.

 

شیعه شریعتینده خوصوصی اؤنم داشییان ” امر به معروف و نهی از منکر” قایداسی اساسیندا موسلمانلار باشقا موسلمانلاری یاخشی ایشلر گؤرمەیه دعوت ائدیب، اونلاری پیس ایشلردن چکیندیرمیه عؤهدەلیدیرلر. ایراندا دین خادیملری و دؤولت رسمیلری همین قایدایا ایستیناد ائده رک اهالینی خوصوصیله استاندارد حیجابا اویغون بیر شکیلده گئیینمەین قادینلارا خبردارلیق وئرمەیه چاغیریرلار.

 

سیمین صبری قادینلارا هوجوم ائدن کیشیلری ایدئولوگییا خستەسی کیمی دەیەرەلندیریر.”مندن بئله اینسانلارین روحی خسته اولوب اولمادیقلارینی سوروشورلار. بونلار روحی خسته دئییل، ایناندیقلاری ایدئولوگییانین خستەسیدیرلر. بو نؤوع رادیکال شخصلر اینسانلارا هوجوم ائدیب جینایت تؤرتمکله داها یاخشی بیر دونیا دوزلدجکلرینه اینانیرلار،” دئیه گونئیلی پسیخیاتر بیلدیریر.

 

اونون سؤزلرینه گؤره، ایران حاکیمیییتی و قانونوئریجیلییی بو رادیکال قروپلارین فعالییتینه زمین یاراداراق، قادینلاری هدف حالینا گتیریب اونلاری توپلومدان و ایش یئرلریندن اوزاقلاشدیرماق ایستییر. قادینلاری ائولرینده اوتورماغا مجبور ائدیر. گونئیلی فعال اهالینین گؤزلری اؤنونده حیاتا کئچیریلن اعدام و شاللاق حؤکملرینی ده همین سییاستین بیر تظاهورو کیمی دەیەرەلندیریر. او، قورخو آتموسفئری یاراداراق حؤکومت ائتمەیی ایران اسلام جمهوریتینین اساس سیاستی حئساب ائدیر.

 

 

 

 علیرضا قولونجو

 

 

موصاحیبه نی بو لینکدن دینله یه بیلرسینیز: 

 

http://www.amerikaninsesi.org/content/acid-attacks-in-iran/2497478.html