قادينلار زنان

Hillary Clintonاوشاق یاشلاریمدا منه غریب گلن مسئله‌لردن بیری قوزئی آذربایجاندا یاشایان بیر خانیم قوهوموموزون آدینین سخاوت اولماسی ایدی. گونئیده اوغلان آدی کیمی بیلینن بو آدین بیر خانیما قویولماسی، چوخ گومان کی، منیم کیمی باشقا گونئی‌لی‌لرین ده تعجبونه سبب اولموشدو.

قیزلارا اوغلان آدینین قویولماسی بیزیم جمعیته خاص بیر مسئله دئییل، بو بیر اجتماعی قورولوشون محصولودور.
آمئریکادا پرئزیدئنت‌لیک سئچکی‌لرینده دئموکرات پارتیاسینین نامزدی اولان هیلاری کلینتونون آدینین اصلینده اوغلان آدی اولدوغونو اؤیرننده بلکه بیر چوخ اینسان تعجوبلنه بیلر.
بونونلا بئله آمئریکادا بو آد آرتیق قیز آدی کیمی ده نورمال قارشیلانماقدا‌دیر. داها دوغروسو بو آد اوغلان‌لارا مخصوص اولماق‌دان یاخا قورتارا بیلمیش‌دیر.
نورمال قارشیلانمایان و بیر چوخ حالدا قبول ائدیلمه‌ین مسئله ایسه، جمعیتده قیز آدلاری کیمی بیلینن آدلارین اوغلان‌لارا قویولماسی‌دیر.
مسئله‌یه کونتئکستینده باخماق ایسته‌سک، اینسان‌لار ساده‌جه آدلاری اونلارا معلوم اولان ایکی جینس اساسیندا بؤلمه‌میش‌لر؛ عومومی یئرلرده اولان توالئت‌لردن توتموش، پئشه‌لره قدر هانسینین کیشی‌لر، هانسینین قادین‌لار اوچون اولدوغو موعین ائدیلمیشدیر.
اوغلان-قیز آدلاری دا بو حکایه‌نین بیر پارچاسی‌دیر.
قیز آدی داشییان اوغلان‌لارا راستلاشمادیغیمیزین و یا (وارسا دا) نادیرن راستلاشدیغیمیزین آنا سببی، جمعیتده جینسیت‌لره اولان هیرارشیک موناسیبتدیر.
طبیعی کی، بو اجتماعی قورولوشدا جمعیتده آشاغی گؤرونن جینسه مخصوص آدلارین اوغلان‌لارا قویولماسی مومکون گؤرونمور.
عکسینه، قیزلارا قویولان اوغلان آدلاری، اوستون ایستاتوسدا اولان جینسیتین آدلاری اولدوغو اوچون داها راحت قبول ائدیله بیلر.

 

باشقا جینس کیمی گئیینیب−کئچینمک (Crossdressing)

 

بو مسئله ساده‌جه آدلاردا بیتمیر. قربده‌کی "جروسسدرئسسینگ" ده بو ادعایا اساس وئریر. جروسسدرئسسینگ (Crossdressing)، قارشی جینس کیمی گئیینیب-کئچینمک مئیلی‌دیر.
بو اینسانلارین تجروبه‌لری، قادین‌لارین قارشی طرفه (کیشی‌لره) مخصوص پالتاری گئیمک اوچون ایجتیماعیتین مقاومتی ایله قارشیلاشمادیق‌لارینی گؤستریر.
کیشی‌لر ایسه قادین‌لارا مخصوص گئییم‌لری گئیدیک‌لری اوچون جدی رئاکسیایا سبب اولور.
بو اوزدن بو داروانیش مسئله‌سینده کیشی‌لر داها چوخ پروبلئمله قارشیلاشیرلار. بونون کؤکونده قادین‌لارا اولان آشاغیلاییجی موناسیبت دایانیر.
باشقا سؤزله، "یوکسک ایستاتوس‌لو" جینسیتین، "آشاغی ایستاتوس‌لو" جینسیته بنزمکده مئییللی اولماسی ایله کیشی دومینانتلیق و اوستونلویو ریسکه آتیلمیش ساییلیر.

 

پئشه آیریمی

 

هیلاری کلینتون نومونه‌سی بیزی هم آدلارداکی جینسیت آیریمی ایله تانیش ائدیر، هم ده پئشه سئقرئقاسیاسینی (Occupational Segregation ) آنلاماق باخیمین‌دان اؤنملی‌دیر.
توپلوم اینسان‌لاری ساده‌جه بیولوژیک فرق‌لرینه گؤره ایکی فرقلی جینسه آییرمیر، بو بیولوژی جینسیت اساسیندا اونلارین ایجتیماعی داورانیشینی دا موعینلشدیرمه‌یه چالیشیر و بو ایکی جینسدن اولان گؤزلنتی‌لری ایله، اونلاردان جئندئر رول‌لارینی(Gender Role) اویناماغی طلب ائدیر.
آرتیق اینسان‌لار، باغلی اولدوق‌لاری جینسیت اساسیندا پئشه‌لرینی ده، داورانیش‌لارینی دا، دانیشیق طرزلرینی ده اویغونلاشدیرما‌لیدیرلار.
هیلاری جلینتون نومونه‌سی، بیر باخیم‌دان اینسان‌لارین آلیشدیغی جئندئر رولو ایله اوست-اوسته دوشمور.
هیلاری، سئچیلرسه، آمئریکانین ایلک قادین پرئزیدئنتی اولا‌جاق و بو سیاستی کیشی‌لرین پئشه‌سی کیمی کودلاشدیران توپلوملارین قورولوشونا اویغون اولمایان بیر حادثه اولا‌جاق.

 

"طیب باجیسی"


پئشه سئقرئقاسیاسی بوتون توپلولاردا اولدوغو کیمی بیزده ده وار. حتی بعضن پئشه‌لره سئچیلن آدلاردا بئله اؤزونو گؤستره بیلر.
بونون ان باریز نومونه‌سی آذربایجاندا "طیب باجی‌سی" و یا تورکییه‌ده "همشیره" سؤزلری‌دیر.
اؤزونده جینسیتچی‌لیک و جینسیت اساسیندا اولان پئشه سئقرئقاسیاسینی تجسوم ائتدیرن بو آدلار، قادین‌لارین طیب ساحه‌سینده گؤره بیله‌جه‌یی ایشی موعینلشدیرمه‌یه چالیشیر.
طیب ساحه‌سینده دوکتورلار و یا جراح‌لارلا موقاییسه‌ده داها آز گلیری اولان بو پئشه اوچون قادین‌لاری اویغون گؤرمک، هر شئی‌دن اؤنجه اوستون طیب ساحه‌سینده چالیشان و بعضی جمعیت‌لرده اوستون ساییلان جینسیته منسوب اولانلارین مادی منافئعینه خیدمت ائدیر.
طبیعی کی، هیلاری کلینتون پرزیدنت سئچیلسه بئله، بو مسئله‌نی جینسیت برابرلیگی‌نین بیر ثبوتو کیمی گؤسترمک دوغرو ساییلماز.
نئجه کی، قارادری‌لی اوبامانین پرزیدنت اولماسی و آذربایجان تورکو اولان خامنه‌ای‌نین دینی لیدئر اولماسی، هله آمئریکادا قارادری‌لی‌لره قارشی، ایراندا ایسه تورک‌لره قارشی اولان عیرقچیلیگین سونو آنلامینا گلمز.
بو اوزدن اجتماعی پروبلئم‌لری ساده‌جه فردلر و یا محدود قروپ‌لارا اساسلاناراق دئییل، ایجتیماعیتین قورولوشو اساسیندا تحلیل ائتمک داها منطیق‌لیدیر.
چونکی قادین‌لارین سیاست و یا قانونوئریجی‌لیک‌ده‌کی رول‌لارینین چوخالماسی جئندئر برابرلیگی‌نین ثبوتو ساییلسایدی، ریواندا کیمی بیر اؤلکه‌ده، قادین‌لار پارلامئنت کورسولری‌نین 63.8 فایزینی الده ائتدیک‌لری اوچون جئندئر برابرلیگینه ده یاخینلاشمالییدی‌لار.
گئرچک‌لیک ایسه تام باشقا‌دیر.