تاریخ

اسماعيل جميلي:

قدیرین قدری قالاندیر سونا بولبوللریله

سسینین سئحری یاخاندیر ساچی سونبوللریله

اولماز اولماز دئسه ده آلدی سینیق کؤنلوموزو

آیریلیق دردینه یاندیق سارالی سئللریله

 

(سونا بولبوللر ماهنيسيني دينله مك اوچون شكيلين اوسته چيخيش ائدين)

 

علي رضا اردبيلي: ايللر اٶنجه، يئني اٶلكه­لرين پروبلملريني سايان بير سياستچي، بو اٶلكه لرين بيرينده بوتون اٶلكه و بوتون ميللتين هاميسي­نين سئودي­يي حتي بير ماهني­نين بئله اولماديغيني، اٶلكه­نين ان آغير چتين­لي­يي كيمي سادالاميشدي. او سطيرلري اوخودوغومدان ايللر كئچير. او زاماندان بري هر ماهني­ني ائشيدركن، بو ماهني­ني كيملرين تانيديغي، بو نغمه­لرين داها كيملرين كٶنلونو اوخشاديغيني دوشونورم. آذربايجان موسيقي­سي­ني گئنيش رئپرتوآريندا مينلرله ماهني، هم تبريزده و هم گنجه­ده؛ هم تانينير و هم عئيني حيسسلري اويادير. هم خالق ماهني­لاري و هم بسته­كار اثرلري، آرازين وار اولدوغونو استهزا ائدركن، بوتون نسيللريميزي بوتون اٶلكه­ميزي بيرلشدير. ماهني­لاريميز گاه تبريزين كوچه­لريندن دانيشير گاه دا نخجوانين نقش جهان اولماسين ايدديعا ائدير، ماهني عالمينده گاه قاشقاي قيزي داغلاردان تبريزه، "اٶلكه­ميزه" گئتمه­يه يول ايستير، بعضا گٶي گٶل وصف اولور،  كيمي زامان سارانين فاجيعه­وي طالعي اثرين موتيوي اولور. چوخ زامان بو اسرارانگيز موسيقي دونياميزين سٶزلري­نين، قوزئي­ده يا گونئي­ده يارانديغيني بيلمك مومكون دئيلدير.

 

بو عالمين پارلاق اينجي­لريندن اونودولماز بيريسي، "سونا بولبوللر"دير و بو ماهني ­دا، قاراباغ موسيقي بئشي­يي­نين يئتيرمه­سي، قدير روستم اوو اٶز دراماتيك ايفاسيله، اوتايلي- بوتايلي ميللتيميزين اورتاق خاطره­لري­نين قيزيل فوندوندا، ذيروه­سي گٶرسنمه­ين بير عابيده­يه چئويريلميشدير.

 

1935-جي ايلده قاراباغين آغدام شهرينده آنادان اولموش قدير روستموو، او جومله­دن بٶيوك موغام اوستادي حاجي بابا حوسئين اوون طلبه­سي اولموش و رسمي آد كيمي "آذربايجان خالق آرتئستي" آديني قازانميشدير. آغير روحي وضعيتله ياشايان قدير روستموو، تئله­ويزيا و عموميتله كامئرا قارشي­سينا آزاراق چيخاردي و ساوئت دٶورونون آغير گونلرينده، اونون غئيري عادي سس تئمبري و دراماتيك ايفا طرزي بوتون آذربايجانلي­لارين اوريينه سولطان اولموشدو. حياتين آغيرليقلارينا يالان پرده چكيلن و ژورنال فيلم ساياغي، تارلا و كالخوذ حياتي و نئفتچي­لرين غيري اينساني ايش شراييطيني ايدآليزه ائدن غيري صميمي موسيقي اثرلري تئلويزيون ائكراني­ني ايشغال ائتدي­يي ايللرده، قدير روستموون صنعتينده كيمسه غئيري صميمي­ليك دويموردو. قدير روستموو رسمي مراسيملردن كناردا قالماقلا، كٶنوللرين فتح ائيمه­يي لياقتله باجاردي. 100 ايل بوندان اٶنجه، آذربايجان­ين افسانه­وي ايفاچي­لاريني گٶرمه­ميش بيزيم نسيل اوچون، قدير روستموو بير افسانه كيمي ياددا قالاجاقدير.

 

 

در باره نویسنده:

علي رضا اردبيلي

آخرین مطالب علي رضا اردبيلي