دیالوگ

Rafiq Tagi -Hemid Herishchiرافيق تاغي


حميد هريسچي - بيزده پوست مودئرنيزمين صاحيبي

"
قاتيللر حاقيندا بيلگيلرله يازيچيليق تصديقلنمير"

ميلتيميزي تحقيرلردن قوروياق!

کيم اولور اولسون.

 

 

13 آوقوست 2011-جي ايل.

آزادليق راديوسو. "اوخو زالي".



"فيضيييه ايله شنبه صؤحبتي".


حميد هريسچي هميشه‌کي کيمي کاردينال(اساسی) سهولر بوراخير.

بشريتين فورمالاشديرديغي اساسلي دوزگون فيکيرلر وار کي، بيز اونلاري آکسيوم(ثبوتسوز قبول ائدیلن) کيمي قبول ائدير، آغزيميزدان نه چيخيرسا، اونلارلا توتوشدوروروق. اصيلليگيميز-نجابتيميز ده بوردا اوزه چيخير، عاغليميزين درينليگي ده بونونلا اؤلچولور. تابع اولدوغوموز، يوخ، حؤرمت ائتديگيميز قانونلار دا بشريتين بو دوزگون فيکيرلريندن دوغور. عکس حالدا، هاميميز يا کوتلَوي جينايتکار اولار، يا دا چؤله دوشمه دلي ساييلارديق.

قيرخجا ياشيندا يازميشديم کي، هميد هريسچي اولسا-اولسا اؤزونو يازيچي کيمي اعلان ائديب. 50-سيني کئچيب، افسوس، بونو هله يئنه اعلان ائدير. يازيچيليق اونون بئينينده ايدئفيکسدير.(ایدئفیکس: بیرینین توتوب بوراخمادیغی یانلیش دوشونجه) "بيردن يازيچي اولمارام" کومپلئکسينين ايچينده‌دير. يئري گلنده، بيز اونو به-به ایله يازيچي ساييريق دا، نئيله‌يه سن کي، اؤزو خوفلودور. هرچند بو کومپلئکس يوخ يئردن يارانماييب. عوموميتله، ناتامامليق کومپلئکسلري سببسيز اولمور، هميشه ده بيزه معلوم، يا ناملوم قوصورلو حيات مقاملارينا تام اويغون طرزده اورتايا چيخير.

حميد بَي طبيعتن، کيمي دئييم، مثلا، شولوخ اوو کيمي، يا بيزده آقشين کيمي، سؤوقي-طبيعي يازيچي دئييل، او کيتاب ورقلري ايچينده يارانميش بير جانليدير.

ياديمدادير، کندده‌کي ائويميزده قالين بير سووئت کيتابينين آراسيندا، اؤلدورمه‌ييب ياشاتديغيم، آغيمتيل-قانسيز گؤدک بير قورد دالغاواري ترپه نر، بعضاً حتّي يوخولاريما گيريب، الفَجين(بوک مارک) سمتدن باشيني قووزايار، نؤقطه گؤزلريني آرمودو گؤزلريمه زيلله‌يردي – "...يازيچييااام..." دئيرديم، هه، بسدير، بيلديک، گئت يات، دي ياخشي، اولدو، باشيني سال ايچري.

البتت، بو هئچ.

دريازا اوخشار سوال آلتيندا حميدي يازيچي حساب ائتسک، اوراغا اوخشار باشقا بير سوال اورتايا چيخاجاق: اؤزو "کونسپيرولوق" اولا-اولا، اؤلچوب-بيچمه‌دن هر شئيي دئييب-دانيشماليديرمي او؟ توتاليم، سسيني باشينا آتماليديرمي کي، شيمالي-آذربايجانليلار غئيري-جيدي آداملاردير؟ اؤزو ده سن دئمه، هميشه بو فيکيرده اولوب.

آه، گؤرن نييه، کؤکلو-کؤمجلي يوخ، بو دايمي سيندرومولوژي موباريزه‌لر آلنيما يازيليب...

من، رافيق تاغي اولاراق، اؤزومو چيخيرام، "نذير موعليم" ماعاشي ايله يئددي اوشاق بؤيوتموش رحمتليک آتام دا، 20 يانوار شهيدلري ده، موحاريبه ده ناموسونو قوروماق اوچون اؤزونو قايادان آتان قيز-گلينلريميز، ميللي قهرمان موباريز ايبراهيم اوو دا، آذربايجان بايراغيني تحقير ائتديگينه گؤره ائرمنيني قتله يئتيرن راميل صفراوو دا غئيري-جيديديرمي؟ نه عجب، اوجدان توتما هاميميز؟.. بلکه جيدي ساييلماق اوچون تبريزده‌کي کيمي اوشاقلي-بؤيوکلو آياققابي قوخولو مسجيدلره دولوشوب تئاترال موصيبتلر چکمه‌ليیيک؟

آنجاق بونا دا شوکور، يوخاريلاريميز اخلاقسيز اولسا دا، حميدين سؤزونه قوووت، باري خريطه‌ده آشاغيلاريميزسا اخلاقليدير. اخلاق اوچون ده ائله اَن اساس آشاغيلاردير.

تانيديغيمجا بئله‌دير: حميدين منطيقدن کنار پوستولات لاري(انگاره) بير-ايکي سواللا دارماداغين اولور. من هله اونا اينصافلا ياناشيرام. سالام-کالاميميز وار. بير ده پسيخولوژيسي اعتيباري ايله اونو آبورتيو سايديغيما گؤره.

آخي، بيز نئجه غئيري-جيدي آداملاريق کي، رحمتليک آتاسي بورايا جينديريندان جين هورکن اينقيلابچي کيمي گلدي، گؤرکملي عاليم کيمي يئتيشدي. او، جيدي آداملاردان قاچيب غئيري-جيدي آداملارا سيغيندي. اخلاقلي يئردن گليب اخلاقسيز يئرده ائولندي. ايرانين "اخلاقلي" مکتبلرينده يوخ، محض بيزيم "اخلاقسيز" مکتبلريميزده شخصيت اولدو. حميد بلکه قافار کندليني عاليم سايماديغينا گؤره ده شيمالي آذربايجان عاليملريني عاليم سايمير.

حميد، يوخسا تبريزده-اردبيلده عاليم عاليمين بئلينه مينيب؟ آما من بيله‌ني، اوردا يالنيز ايمام-جومعه‌لره عاليم دئييرلر.

بلکه ايراندا عاليملر دونيوي کشفلري ايله بشريتي ايره‌لي آتيب، اينسانليغي گؤيه توللاييب؟

حميد بي، سيزين غئيري-جيدي سايديغين آداملار آذربايجاني شرق باتاقليغيندان چيخاريبلار. گؤبک جيين ايرانلا باغلي اولدوغونداندير کي، هله ده ايجتيماعي فايداسيز ديني مکتبلر آرزوسونداسان. واللاهي-بيللاهي، چانتا چيينينده، کوچه‌دن کئچن عادي بير وطنداش بو ساريدان سندن موترققيدير. دينين دؤولتدن آيري اولدوغو بير جمعيتده بو آرزو آناخرونيزمدير(بی موردی، نابهنگامی)، دوستوم حميد.

آنتي کونستيتوسيون(آنایاسایا قارشی) حميد بي، او بويدا ايراندا ميرزا فتح‌علي آخونداوو نهنگليکده اينسان وارمي؟ منه ايسلام آلقيشچيسي اولان، ايناما اساسلانان يالانچي عاليملري ميثال چکمه‌يه سن. من اونلاري اولسا-اولسا دين تصديقچيلري-تثبيتچيلري سايا بيلرم. اونلارين يوز ايل سونرا دا نه دئيه‌جکلري اينديدن بللي.

شيمالي آذربايجان اينساني اؤز تالانتلي(استعدادلی) و نجيبليگي ايله جيديدير. ديني موعزه‌لرله اينتوکسيکاسييايا(مسمومیت، زهرلنمک) اوغراماييب. آختارسان، کورروپسيونئريميز(فاسد) ده جيديدير، جانيميز(جانی: جنایتچی) ده: ميللي دَير داشيييجيلاريدير. بيزده تالانتين چوخلوغوندان، اونون تطبيقينه يئر تاپيلماديغيندان کورروپسيونئر اولورلار. آنجاق دوزه له‌جک بو.

جينايتلريميزين اکثريتي اخلاق و معنويات موتيوليدير.
آذربايجانين يئگانه غئيري-جيدي اينساني بلکه ائله حميد هريسچينين اؤزودور. آچيغي، اورتا ایستاتيستيک آذربايجان عاييله سينده اونا، يا اونون کيميلره بامبيلي کيمي، عبدالرحمان وزيراوو کيمي باخيرلار.

حميد آرتيق تزه بير يولدا: آز قالا ايچينده دوکانا بورجلار يازيلميش اؤرتولو دفتري ده کونسپيرولوژي سايير. آيت الله بهشتيني کيم اؤلدوردويونو بيلمه‌سي ايله اؤيونور. ايران قاپالي دؤولت اولدوغوندان، تبريزين غئيري-شفاف موحيطينده بو فاکت آچيقلانمير دئيه، بيز ده بونو بيلميريک. اؤز ساغليغيندا آيت الله بهشتي نين وارليغي آکتوال اولماديغي حالدا، بيزيم اوچون اونون اؤلدورولمه‌سي نييه آکتوال اولماليدير؟ آيت الله بهشتي نين اؤلومو آنجاق و آنجاق کريميناليستيک-دئتئکتيو فاکت اولاراق قييمتلي ساييلا بيلر. بوردا هئچ بير کونسپيرولوگييا يوخدور: اونو هيپوتئتيک(فرضی) قاتيل اؤلدوروب، دي والسلام.

آما حميد هريسچي جنوبوموزون قاتيللريني شيمالدا نييه ايدئاليزه ائتسين؟ "گونش آلتيندا هئچ نه يئني دئييل"، حميد بَي. اؤزو ده بوندان اَليني اوز، قاتيللر حاقيندا بيلگيلرله يازيچيليق تصديقلنمير. حميد ايستيرسه، فاکت-زاد توپلامادان، بو قونودا اونا يوزلرله سوژئت باغيشلايا بيلرم. يازيچي ايدئياني يئرلردن يوخ، گؤيلردن آلير، بلوکنوتدان(بلوکنوت: قوپاردیلان آغ کاغیذ ورقه لریندن عیبارت دفتر) يوخ، ائفيردن گؤتورور.

حميد بَي، قاتيل اَن ياخشي حالدا اينقيلابچيدير. اينقيلابچيلارسا حؤکمن قاتيلدير.

شيمالي آذربايجاندا "سووئت سوسياليست رئسپوبليکا"سيني ايدئاليزه اولونموش قاتيللر تؤرتمه‌ميشديمي؟

حميد بَي، سنين اؤز غئيري-جيديليگين اوقاتا اويغون فيلوسوف اولماغيندادير. اوخودوغون کيتابلارا اويغون مووقتي ايدئولوقسان. آلوده اولماديغين بين الخالق گوج يوخدور. حقيقتين يوخ، گوج فلسفه سينين داشيييجيسان. "گوج"لردن آوتونومييا(استقلال) آلا بيلميرسن. حميد بَي، سن اينستيتوت قورتارماميش بيليکلي بير اوغلانسان، قييمتين بو. بيليکلرين ده، تنظيملي اولماديغيندان، لوزومسوز و معناسيز گؤرسه‌نير. بيليکلر ييغناق شکلينده يوخ، يالنيز هارمونييادا گؤزل و فايدالي اولور. دئموکرات، ايسلامچي، ديني فوندامئنتاليست، اينقيلابچي، ميلتچي، تروتسکيست، مودئرنيست، پوست مودئرنيست، کونسپيرولوق – بونلار اينکيشاف خطي دئييل، "غئيري-جيدي شيمالي-آذربايجانليلار"دان شؤهرت قوپارماق جهديدير.

حميد هريسچي پوست مودئرنيزمي آذربايجانا اؤزو گتيرديیيني سؤيله‌يير. گويا ايندي ده اونو گئري آپارير. حميد پوست مودئرنيزمي آذربايجاندا دئمونتاژ ائدير. دئمه‌ميشکن، بيزده او، پوست مودئرنيزمين صاحيبيدير.

آما حميد بَي، بئله دوشونجه طرزي هم گولمه‌لي، هم ده بير آز عاييبدير. آذربايجاندا دا پوست مودئرنيزم زامانين ديکته‌سيدير، هئچ کسين شخصي مولکيتي دئييل. دونيا قلوباللاشمادا. پوست مودئرن باخيش قلوباللاشماني احتيوا ائدير. پوست مودئرنيزم بيزده طبيعي گليشير، اينتيشار تاپير، اؤزو ده تکجه ادبياتدا يوخ. کيمسه اونو بورا گتيرمه‌ييب، آپارا دا بيلمز.

حميد هريسچي اولاراقسا بير تک سن طبيعي يوخ، يالنيز نظري جهتجه پوست مودئرنيست اولدون - صونعي و ائففئکتسيز.

بيز قلوباللاشمانين آذربايجاندا يئريشلريني بيه‌نيريک. قلوباللاشما قورخونج يجوج-مجوجلارين، اجيننه‌لرين محوي دئمکدير. هه، واجيبدير بو. قلوباللاشمادا اينسان دَير قازانير. قلوباللاشما بشريتين درين قارانليقلاردان گليب بيرباشا اوستونه چيخديغي ايشيقدير. اينسانلاري منگنه‌ده سيخان شرق ديکتاتورلاري بير-بير چؤکمه‌ده. بشريت واحيد اورقانيزمدير، هر هانسي مونستر(هیولا) اونون بير حيصه سيني آمپوتاسييا(قطع عضو) ائده بيلمز.

حميد بي، بيز ايراندا اينسانلاري اعدام ائديلمه‌سيني جيدي سايا بيلمريک.

ياراداندير جيدي.

ياشاداندير جيدي.

هارمونييا دوزنله‌ينلردير جيدي.

حميد هريسچي دئيير: بيز آذربايجانا خاوس(قارما- قاریشیقلیق) گتيرديک. بَيم خاوس واجيب ايدي کي، اونو گتيريردين؟ آما سن آذربايجانا خاوس يوخ، بالاجا سينيق فينجان دا گتيره بيلمزسن. فينديق، يا ديش قوردلايان بيزنئسي قورماق ايقتيداريندا دا دئييلسن. چونکي سؤزون وار، ائشيديلمير. دينيرسن، دينميرلر. قارداش، پوست مودئرنيزم خاوس دئييل، عکسينه، جمعيتين اؤزونو تزله‌مه‌سي، احتيمال ائديلن خاوسدان اوزاقلاشماق جهدي، يئني تنظيم اوسلوبودور. حميد، آذربايجاندا سندن باشقا هئچ کس خاوسو سئومير.

اينسانليغين دا بوتون حرکتلري خاوسو رفع ائتمه‌يه يؤنه‌ليب.

آمالي خاوس اولانلارين کامالي قوصورلودور.

ياديما دوشدوکجه دئييرم. ...قوي حميد بَيدن بير ده سوروشاق: ایییرمینجی عصیرده 3-4 ياريتماز-ياريمچيق اينقيلاب ائتميش، هله ده اؤز ديلينده يازيب-اوخوماق ايختيياري قازانماميش "کونسپيرولوژي" تبريزليلرديرمي جيدي؟ ايسلام و اوممتچيليک دايره‌سينده کور قالميش ايرانلي-جنوبلولاريميزدير جيدي، يا داها گئنيش تفککورلو آخونداوو-جليل ممدقولوزاده- صابيرلريميز؟

حميد دئيير: ميرزه فتح‌علي آخونداوو و جليل محمدقولوزاده‌دن آوروپادا چوخدور. اوندا رابله، موليئر، بومارشه و قوقولدان، بايرون و پوشکين، شيللئر و هؤتئدن ده بيزده چوخدور. عومومن، بو ياناشما غئيري-پروفئسسيونال و وولقارجاسينادير. حميدين باشقا پوستولاتي: خالقيميز مضحکه چيلييه مئيلليدير و غئيري-جيديدير بو. عکسينه، حميد بي، فاجيعه ايچره بئله گولمه یي باجاران ميلتلر بؤيوک اولور. کومئديک باخيش فاجيعه لرين اؤلومودور.

آغلاماق هميشه آسان، گولمک هميشه چتيندير.

ايرانداکي "جيدي" آداملارين شبيه لرده ساختا آغلاشما قورماغيندانسا، بيزيم طبيعي گولمه یيميز داها افضلدير.

غلبه گولنلريندير.

حميد هريسچي عؤمرو بويو دوداق قاچدي بير شئي يازا بيلمز.

اونون اوچون حيات آنجاق آغلاماقدير.

چونکي "جيدي"دير.

14 آوقوست 2011-جي ايل

 

 

 

بو یازی بیرلیک-مئدیا طرفیندن عرب الیفباسینا کؤچورولموشدور