دیالوگ

paul.austerقاپینی اؤزو آچیب بیزی ایچه‌ری دعوت ائدیر. دئيیر کی، تانیش اوْلماق اۆچون من سیزی بیر آز ائویمیزده گزدیریم. شرق خالچالاری و کیلیم‌لری ایله بزه‌دیلمیش اۇزون بیر دهلیزله ایره‌لیله‌يیریک. ساغدا قوْناق اوْتاغیدیر. بالاجا، سوْن درجه‌‌ ساده بزه‌دیلیب. کیتابخاناسینا چاتیریق. کیتابخانا نه کیتابخانا! بۆتون دیوارلار آغزینا کیمی کیتاب‌لا دوْلو اوْلان رفلردن عبارتدیر. اینگیلیسجه، يۇنانجا، ایسپانجا، ایوریتجه، ياپوْنجا و تۆرکجه… دۆنيانین بۆتون دیل‌لرینه چئوریلمیش پوْل اوْستئر کیتابلاری.

بۇ قده‌ر  نارسیستدیرمی کی، ویترینده “آۇستئر” دئيه اؤز آدینا شراب وار؟ خئير، تامامیله تصادوفدور. بۇ چاخیری بیر تانیشی پوْرتوقالیيادا گؤروب، اوْنونچون آلیب گتیریب. “آۇستئر” پوْرتوقالجا “گونئی کۆله‌يی” آنلامینی وئریرمیش.

نارسیست دئيیل، آمما گؤرونوشونه چوْخ اؤنم وئریر. بۇنا گؤره ده موصاحیبه‌ بوْيونجا فوْتوْ چکیلمه‌سینی ایسته‌میر. چونکو دانیشارکن اینسانین آغزی-بۇرنو ايری-اۆيرو دۆشورموش.

دانیشیغا باشلاياندا بیر سیگار ياندیریر. بیرینی ده قارشیسینداکی مۆخبیره وئریر. اصلینده يانیندا سیگار چکیلمه‌سینی ایسته‌میر، ساده‌جه تک دردی مۆخبیرین هيجانی‌نین آزالماسینا کؤمکچی اوْلماقدیر.

بیز بوردا تۆرکیيه‌نین “هۇرریيت” قزئتینده چاپ اوْلونموش بۇ سؤیله‌شینی ایختیصارلا سونوروق.

- مکتوب و روْمانلارینیزی باشقالاری دا اوْخوسون دئيه يازدیغینیزی، بۇنا گؤره گۆنده‌لیک تۇتمادیغینیز اۆچون کئچمیشینیزین سیلیندیییندن شیکايتله‌نیرسینیز. يئنی کیتابینیزلا بیر  گۆلليله ایکی دوْوشان وۇرماق ایسته‌میسینیز؟ هم یاشامینیزدان قئيدلر، هم ده اینسان‌لارین ماراغینا ندن اوْلاجاق اثر تقدیم ائتمک…

- هله ده گۆنده‌لیک تۇتمورام. کیتابی يازماغا باشلامیشدیم. کئچمیش یاشام يوْلداشیما يازدیغیم اوْ مکتوبلار منه گلیب چێخدی. سانکی هئچ بیر علاقه‌‌م اوْلمايان ياد آدام طرفیندن يازیلمیشدی. نهايت، بۇ دؤرد بؤلوملو کیتاب عرصه‌‌يه‌‌ گلدی. کیتابدا ان چوْخ اؤزوم حاقدا دانیشماقدان قاچمیشام. اؤزوم حاقدا دانیشاندا اؤزومو باشقاسی باره‌ده دانیشیرمیش کیمی دویغو ائدیرم.

- کئچمیش یاشام يوْلداشینیزا، اوْ واختکی سئوگیلینیزه يازدیغینیز مکتوب‌لاری يايیملاياندا آوتوْسئنزورا [خودسانسوری] اوْلوب؟

- چوْخ شخصی بؤلوم‌لری چێخارمیشام. يئنی‌يئتمه‌لیک “لوْوئ ستوْري”یم (سئوگی ماجرامین) اۆستونده چوْخ دايانماق ایسته‌مه‌دیم.

- اوْ واختکی مکتوب‌لارینیزدان بیرینده “يازیدان هئچ واخت پۇل قازانماياجاغیمی بیلیرم” دئمیسینیز. دۆنياجا مشهور يازیچی اوْلاندان سوْنرا فیکرینیز ديَیشدی؟

- جاوانلیغیما نیسبتن ایندی داها چوْخ پۇلوم وار. آمما بۇ خاطیرلاتدیغینیز دوروم بیر مدتلیک ایدی. ایندی يئتری قده‌ر  پۇلوم وار. بۇ نه دئمکدیر؟ آرتیق جاوانلیغیمداکی کیمی پۇلا گؤره ناراحات اوْلمورام. چونکو پۇللا باغلی ان پیس شئي دایما اوْنو فیکیرلشمه‌يین‌دیر. بۇ، اصل زهردیر. بئينینی دایما نئجه ياشاماغین، کیرايه‌نی نئجه اؤده‌مه‌يین فیکریيله يوْرورسان.

- کیتابدا بیر يئرده “تک و ناراحات ایدیم، آغلیم سئکسديدی” دئيیرسینیز. سئکس ده پۇل کیمیدیر؟ اوْلماياندا بئينیمیزی اوْنونلا يوْروروق؟

- طبیعی، هانسی آنلامدا دئيیلدییی واجیبدیر بۇ سؤزون. هئچ کیمله ان آدی سئکسوال علاقه‌‌مین اوْلمادیغی دؤورلردن دانیشیریق. عصبلریمه توْخونان بیر دوروم يارانمیشدی. امینم کی، چوْخوموز هئچ ده خوْش اوْلمايان همین دورومه دۆشوروک، آمما بۇ دا چوْخ نوْرمالدیر.

- 14 ياشیندا اوْلاندا يانینیزداکی دوْستونوزو ایلدیریم وۇروب اؤلدوروب. هردن غریبه یاشامینیز اوْلدوغون فیکیرلشیرسینیز؟

- خئير. بختیم گتیریب. چونکو باشیما بدبخت اولای‌لارین گله بیله‌جه‌يی يئرده دوْغولمامیشام. ساواش‌‌دا اوْلمامیشام. ياشادیغیم شهرین بوْمبالانماغی‌نین شاهیدی اوْلمامیشام. يا دا عائله‌‌م قاچقین دۆشرگه‌لرینه گؤندریلمه‌يیب. بۆتون بۇنلاری ياشايان میليوْن‌لارلا اینسانا باخاندا بختیمین گتیردییینی هئچ واخت اۇنوتمامیشام.

- والیدئين‌لری بوْشانان چوْخلو اۇشاقلار وار. سیزین و باجینیزین ياشادیغی چتینلیکلری چوْخ واخت بۇنونلا علاقه‌‌لندیرمه‌يینیز بیر آز غریبه دئيیل؟

- يوْخ. اوْ واختلار منیم ياشادیغیم دۆنيادا هئچ کیم بوْشانمازدی. آمما صؤحبت بوْشانمالاریندا دئيیل. اۇغورسوز ائولیلیک‌لری‌نین نه قده‌ر  يازیق اوْلماسی ایدی.

- عائله‌‌ دئمیشکن… آروادینیز يازیچیدیر، قێزینیز سوفی ده مۇسیقیچی. منه ماراقلیدیر، اۆچ اینجه‌صنعت آدامی‌نین عائله‌‌سی نئجه اوْلور؟

- سوْفی مۇسیقیچی اوْلدو، آرتیق بؤيويوب، اولکی قده‌ر  تئز-تئز گؤروشه بیلمیریک. گؤردويو ایشلره، اوْنلاری حاضیرلاما طرزینه حئیرانام. مکتب مۆعللیمه‌سی اوْلسايدی، بۇندان داها خوْشبخت اوْلمازدیم.

- بس اوْغلونوز؟ اوْنون دا اینجه‌صنعته ماراغی وار؟

- اوْ دا اۇغورلو فوْتوْقرافدیر. پئشکار دئيیل، آمما ياخشی گؤزو وار.

موْبیل تلفوْنوم يوْخدور

سوْسیال مئدیادا يوْخام. اینتئرنئتیم ده، کامپیوتریم ده، موْبیل تلفوْنوم دا يوْخدور. چوْخ احتیاجیم اوْلاندا سوْفیدن باخماغینی خاهیش ائدیرم. بیلیرم دینوْزاورام، هامی مندن فرقلی دۆشونور و بیلیرم کی، هئچ کیم منیم ياشادیغیم کیمی ياشاماق ایسته‌میر. آمما ایچیمده اوْرادا اوْلماقلا باغلی دامجی بوْيدا دا ایستک يوْخدور. اۆسته‌لیک اوْ ائلئکتروْن اشيالاری هر يئره اؤزومله داشیمادیغیم اۆچون ده خوْشبختم.

 


انلام.بیز طرفیندن حاضیرلانمیشدیر