دیالوگ

hikmet Hacizadeپوليتولوق حيکمت حاجيزاده ايله موصاحيبه‌ني تقديم ائديريک.

 

آذربايجان گنجليگيني بير جومله ايله ايفاده ائده بيلرسينيز؟
من اونلارا حسد آپاريرام و پاخيلليغيم توتور (گولور). من چوخ تئز دوغولموشام، آما ايندي گنج اولان آداملارين ايمکانلاري حدسيزدير. بيز جاوان اولاندا بئله ايمکانلاريميز يوخ ايدي. اينتئرنئت يوخ ايدي، خاريجه گئده بيلميرديک، کيتابلاريميز کيفايت قدر دئييلدي، کومپوتئر يوخ، گئتمه‌يه بير يئر يوخ، ييغيشماق مومکون دئييل. بونلار هاميسي سووئت حؤکومتينين رئالليقلاري ايدي. ايندي ايسه ماشاللاه، چتين ده اولسا، اؤز اوزرينده چاليشماق، اؤزونو اينکيشاف ائتديرمک اوچون گؤيلر قدر ايمکان وار.


سووئت حؤکومتينده بو قدر ساوادلي، بيليکلي، ياراديجي گنج يوخ ايدي. هرچند بعضيلري باشقا فيکيرده‌دير. اونلار دئييرلر، بيزيم واختيميزدا بئله دئييلدي، بيز دوستويئوسکي اوخوموشوق... بونلار هاميسي بوش صؤحبتلردير. اوخويوبلار، آما نه دوستويئوسکيدن بير شئي باشا دوشوبلر، نه ده اونو حياتدا رئاللاشديرا بيليبلر. يا گئجه-گوندوز شاهمات اويناييرديلار، يا دوستويئوسکي اوخويوردولار، يا دا بوتون گونو بئتهووئن دينله‌ييرديلر، حيات ايسه اؤز آخاري ايله گئديردي و او واخت الده ائتديگيميز بيليکلر اينسانا هئچ نه وئرميردي.
او بوش-بوش فيکيرلري ييغميشديلار سووئت گنجينين باشينا. حياتيميز چوخ سؤنوک کئچيردي. آما ايندي ماشاللاه، کليپ ده چکيرلر، فيلم ده چکيرلر، ماهني دا يازيرلار. رومان يازيرسان، ياز، کيتاب چيخارماق ايسته‌ييرسن، چيخار، مقاله يازماق ايسته‌ييرسن، ياز، چاپ ائتدير. قاباق ائله شئيلر يوخ ايدي. منيم دوستوم، بؤيوک پوبليسيست چينگيز سولطانسوي او واخت گؤزل مقاله‌لر يازيردي. او، مقاله‌سيني چاپا وئرمک اوچون 5-6 ايل چاليشدي و نهايت، دقيق خاطيرلاماسام دا، "اولدوز"دا و يا "گنجليک"ده اؤز ائسسئسيني چاپ ائتمه‌يه موفق اولدو. لاکين ايندي هانسي ايستعدادلي گنج اؤز يازيسيني چاپ ائتديرمک ايسته سه، او، آسانليقلا بونو ائده بيلر. بئله. گنجلره پاخيلليغيم توتور و اونلارلا فخر ائديرم.


آذربايجان گنجليگينين اساس پروبلئمي ندير،سيزجه؟

عومومن جمعيتيميز کئچيد دؤورو ياشايير. پاتريارخال، آوتوريتار سيستئمدن ليبئرال، بازار ايقتيصادياتي اولان بير سيستئمه کئچيريک. بو دا آسان پروسئس دئييل، اولجه بيزيم جمعيتده مؤوجود اولمايان يئني داورانيش قايدالاري، يئني بيليکلره يييه لنمک لازيمدير. آتا-آنا سنه هئچ بير ياخشي مصلحت وئره، کؤمک ائده بيلمير. چونکي اونلارين تجروبه‌سي آرتيق يئني گنجليگين حياتينا شاميل اولونمور. واليدئينلر ايسته سه ده، کؤمکليک گؤستره بيلميرلر. بوندان باشقا، گنجلري کؤهنه مدنيتيميز، کؤهنه عنعنه لريميز راحات بوراخمير. بو و يا ديگر يوللارلا کونسئرواتيو(محافظه کار) آداملار، واليدئين، قوهوم-تانيش، چئوره واسيطه‌سيله تابولار، عنعنه لر بيزيم حياتيميزا تاثير گؤسترير. کئچميش عصرين بيليک و داورانيش قايدالاري يئنه اورگيميزده ياشايير. او دا، البتته کي، اينکيشافا مانعچيليک تؤره‌دير. جسارتلي اولماق لازيمدير. بيلمک لازيمدير کي، بو گون بيزيم هر هانسي بير ايشه صرف ائتديگيميز زحمت کيفايت دئييل. موسلمان درک ائتمه‌ليدير کي، اونون بوگونکو زحمتي يئترلي اولمور. او، دايم آرتان خطله اينکيشاف ائتمه‌ليدير.

بير گنج بيزه مقاله تحويل وئرير. باخيب دئييرم کي، مقاله‌نين بو حيصه سينين اوزرينده ايشله‌مک لازيمدير. دوزلديب گتيرير، سونرا يئنه بير سحو تاپيب يئنيدن دوزه‌ليش ائتمه‌سيني ايسته‌ينده موسلمان گنجي بئزيب دئيير: "ا، يوخ ا، نه اولدو ا، بئزديم، ائله ميرم!" آما آلمان گنجي سککيز دفعه اونو تزه‌دن دوزلدير، هئچ "اوف" دا دئمير. بيزيم گنج ايسه ائموسييالارا قاپيلير، اونون قان تضييقي قالخير: "ائله ميرم، ايشله ميرم!" زحمت سئورليک، عينادکارليق يوخدور، ائموسييالار، عصب، تنبلليک ايسه چوخدور. باخ بونلار ان بؤيوک پروبلئملردير.
بوندان باشقا، بيلين کي، هر بير پئشه جسارت طلب ائدير. هئچ کيم دوشونمه‌سين کي، او هانسيسا ايش تاپاجاق و باشيني آشاغي ساليب او ايشي گؤره‌جک. هر پئشه صاحيبي ريسک ائتمه‌يه محکومدور. چکمه‌چي بئله هانسيسا ريسکلرله قارشيلاشير، مثلا: آياققابييا بانتيک ووروم، يا وورماييم؟ دونيادا جسارت و ريسک طلب ائتمه‌ين پئشه ساحه سي، حيات طرزي يوخدور. قورخمايين، ريسکه گئدين، ووروشون.


آتالار و اوغوللار پروبلئمينين کؤکونده نه دايانير؟ بو پروبلئمين حلي يولو وارمي؟

عومومي بؤيوک بير پروبلئم وار کي، بو، طبيعتين پروبلئميدير و هئچ کيم بونو حل ائتمک ايقتيداريندا دئييل. او، قوجادير، سن جاوان، او، بير سؤز دئيير، سن باشقا سؤز. اينسان آزادليغي و عاييله ده اولان بيرليگين آراسيندا عوموم بشري بير پروبلئم وار: هارا گئديرسن، گئت، ايسوئچ، آلمانييا، اينگيلتر، آذربايجان... سن شخصيتسن، آما عاييله يه اؤز سووئرئنليگيني(مستقیللیگینی) وئرمه‌ليسن، يوخسا او عاييله عاييله اولماز.

ايکينجيسي ايسه عصرلر و نسيللر پروبلئميدير. کيمسه فئودال قورولوشوندا بؤيويوب، کيمسه کاپيتاليزمده. قاباق کنده کينو(سینما) گلردي-گلمزدي، اوتوروب گؤزله‌يرديلر. اينديسه کينونو سنين اؤولادين اؤزو چکير. ياشلي نسيل باشقا عصرده ياشايير، گنجلر باشقا عصرده. گنجلر ايندي "آمئريکالي" بيريدير،قوجالار ايسه عنعنه وي، موحافيظه کار بير اينسان...


اؤز عاييله نيزده موناسيبتلر نئجه‌دير؟ بو باخيمدان بير پروبلئمينيز وار؟ مثلا، اوغلونوزلا موناسيبتلرينيزده

اوغلوم آرتيق بؤيوک اوغلاندير، شخصيتدير. 30-ا ياخين ياشي وار، او، آرتيق بيزدن آسيلي دئييل. بيز اونا تحصيل وئرديک، داورانيش قايدالاريني اؤيرتديک. هم ده قئيد ائتمک لازيمدير کي، بيز اونونلا فرقلي عصرلردن دئييليک. من ده راک دينله‌ييرم، او دا، موطالعيه‌لريميز ده بير-بيريندن کسکين فرقلنمير. مدنيت باخيميندان نسيللريميز آراسيندا بؤيوک فرق يوخدور. من اونون هر قرارينا تولئرانت ياناشميشام. منيم آتام ايسه دايم منه اعتيراض ائديردي. اوزون ساچيما، دينله‌ديگيم موسيقيي، اوتاغيمدا آسديغيم شکيللره قدر هر شئيه. بو معنادا، اوغلومون بختي گتيريب. بلکه ده، او، دانيشاندا باشقا جور دانيشاجاق. دئيه‌جک، مني ائوده اينجيديرلر (گولور)

 

آخيرينجي دفعه تئاتردا نه واخت اولموسونوز؟ عوموميتله، تئاترلا آرانيز نئجه‌دير؟
ياخشي دئييل. چونکي تئاتر کينو و تئلئويزييا ايله رقابت آپارا بيلمير، خوصوصن ده بيزده. تئاتر او واختلار ان قاباقجيل اينستيتوت ايدي. کيمين نه ايدئياسي وار ايدي، جمعيتده آکتوال نه پروبلئم وار ايديسه، تئاتردا اؤز عکسيني تاپيردي. تئاتر او دؤورون رئالليقلارينين آيناسي ايدي. ايندي ايسه افسوسلار اولسون کي، تئاتر حياتدا گئدن موعاصير پروسئسلري عکس ائتديرمير، تئاترين هانسيسا تاماشاسي ايزله یيجيلر آراسيندا ديسکوسييا دوغورمور. اولا بيلسين کي، آکتيورلاريميز دا، رئژيسورلاريميز دا ياخشيدير، آما من ائشيتمه‌ميشم کي، تئاتر نوماييشه هر هانسي بير تاماشا قويسون و سحري گون هامي اونو موذاکيره ائتسين. تئاترين ائستئتيکاسي دا وار ايدي بير زامانلار. قادينلار گئيينيب-کئجينيب تئاترا گليرديلر، فويئده(سینما و تئاتردا فاصیله لرده گؤزله مه یئری) زر-زيبالاريني نوماييش ائتديريرديلر.

سيزجه، تئاترين گنجلر آراسيندا او قدر ده سئويلمه‌مه‌سينين سببي تبليغاتين ضعيف اولماسي و يا هئچ اولماماسي ايله علاقه لنديريله بيلر؟
اولا بيلر کي، آپاريلسين، آما شئکسپيره نه قدر باخماق اولار؟ تئاتردا سئنزورامي وار، موعاصير دراماتورقلاريميزمي يوخدور؟ تئاتر اوللر بوتون سياسي و سوسيال ايدئيالارين توققوشدوغو مکان ايدي. شئکسپير ده يازاندا ناغيل يازميردي آخي.


موسيقي ذؤوقونوزله باغلي دا بير آز دانيشاق

دانيشاق. من هر شئيي دينله‌ييرم. منيم اؤزومون موسيقي تحصيليم وار. بولبول آدينا مکتبده اوخوموشام راک قروپوموز اولوب مکتبده و اونيوئرسيتئتده.


آدي نه ايدي قروپونوزون؟

فيزيکا فاکولته‌سينده ايديم و "فيزفاک"اين جاز-راک آنسامبلي" آدلانيردي. او واخت راک قروپو ياراتماق چوخ قاباقجيل بير شئي ايدي. ايندي بو حال چوخ موشاهيده اولونسا دا، بيزيم واختيميزدا آز-آز راست گلينن بير حال ايدي. راکی دا، خالق موسيقيسيني ده چوخ سئويرم. آما موغامات چتيندير منيم اوچون، چوخ غليظدير. موغامي درک ائتمک اوچون او ساحه ده تحصيلين اولماليدير.

کلاسيکاني سئويرم، منيم گؤزل کوللئکسييالاريم وار. ايسته‌نيلن ژانري دينله‌ييرم، تکي ايستعدادلي اولسون. اساسن ايسه جاز و راک. ايندي هامي راضيلاشار کي، سون 5-10 ايلده آذربايجان موسيقيسي جيليزلاشيب. يئني ماهنيلار، بسته‌لر يوخدو. هاني بيزيم علي اکبر تاغييئويميز؟ سعيد روستموولار هاردادير؟ موغننيلر وار، آما يئني هئچ نه يوخدور. کؤهنه ماهنيلار يئني فورمادا تقديم اولونسا دا، اونلار آرتيق ماراق دوغورمور. ييرمي عصرين اوللرينده کؤهنه ماهنيلاري يئني وئرسييادا جانلانديراندا بو، تقديره لاييق حرکت ايدي، اينديسه نه شئدئور(شاه اثر) ائديرسن ائت، او قالدي تاريخده. ابولفتح اوخوموشدو، قدير روستموو اوخودو. "سونا بولبوللر"ي بيليريک. ايندي يئني بير شئي لازيمدير، آما او "يئني" يوخدور. اونون يئريني يا تورکيه، يا دا آوروپادان گلن ماهنيلار توتور. دوز دئييرم، دوز دئميرم؟ (گولور)


دوز دئييرسينيز. دونياگؤروشونوزون فورمالاشماسيندا رول اوينايان کيتابلار، تاثيريندن اوزون مودت چيخا بيلمه‌ديگينيز فيلملر، يقين کي، اولوب. هانسيلاردير اونلار؟

بلي، اولوب، چوخ اولوب. مثلا، تولستوي منه چوخ تاثير ائديب. اونون "ديريلمه" رومانيني اوخوياندان سونرا بير سئمئستر(ترم) اؤزومه گله بيلمه‌ديم. "کازاکلار" ،"حاجي موراد". دوستويئوسکيني او قدر ده سئوميرم، چونکي او، مورتجئع يازيچي ايدي. او، دئموکراتييا علئيه ينه فعاليت گؤسترير، چارين مؤوقئعييندن چيخيش ائديردي. سونرا ييرمي عصرين بؤيوک يازارلاري فولکنئر، سارتر، کاميو، هئمينقوئي، ستئينبئک… چوخلارينين آديني چکمک اولار. آوروپا-آمئريکانين موعاصير يازارلارينين هامسيني اوخويوردوم و سؤزسوز کي، اونلارين منيم اوزريمده تاثيرلري اولوب. بوندان باشقا، بيزيم واختيميزدا موسکوادا "اينوستراننايا ليتئراتورا" ژورنالي وار ايدي و اونلار بوتون دونيادا نه شئدئورلر وار ايديسه، هاميسيني روس ديلينه ترجومه ائديب، بو ژورنالدا درج ائديرديلر. بيز ده روس ديلينده اوخويوردوق و بوتون دونيادان خبردار اولوردوق.

او کي قالدي فيلملر، "قو قوشو يوواسي اوستوندن بير اوچوش" آدلي فيلمين تاثيريندن هله ده چيخا بيلمه‌ميشم، چوخ مؤحتشم فيلمدير.


ایستول اوستو کيتابينيز وار؟

يوخ، شکاف اوستو کيتابلاريم وار. او قدر کيتاب وار کي، سئچيم ائده بيلميرم.


محبت دئينده عاغلينيزا ايلک نه گلير؟
 "لئيلي و مجنون" گلير. اونو من بوردا آچيب دانيشا بيلمرم. بو باره‌ده آکادئميک کيتابلار يازيليب. من محبت موتخصيصي دئييلم، آما بو دويغو چوخ موقدس بير دويغودور.

من اوشاق دئييلم، خئيلي ياشيم وار،
بيليرم سؤز ندير، محبت ندير؟
منيم کؤنول آدلي بير يولداشيم وار،
کؤنولسوز بير حيات بير ويرانه‌دير!..
بو دا صمد وورغونون بير آخماق شئعري...

صمد وورغونا موناسيبتينيز نئجه‌دير؟
چوخ پيس، چوخ پيس. سويه‌سيز بير شاعيردير.


هانسي يازيچيني اوخوماماق عييبدير؟

مومکون قدر چوخ اوخوماق لازيمدير. تخمينن 50-يه قدر آد وار کي، سيويل اينسان اولا بيلمک اوچون اونلاري موطلق اوخوماليسان. کلاسيکلري موطلق اوخوماق لازيمدير. هم آذربايجان، هم ده اورتا عصر آوروپا يازيچيلاريني. مثلا، هومئري اوخوماق موطلق لازيمدير. بو ياخيندا سئروانتئسين "دون کيخوت"اونو اوخوموشام. ايکي دنه قالين کيتابي زورلا دورتدوم اؤزومه و سونا قدر اوخودوم. بير بؤيوک نوروئچ يازيچيسي کنوت هامسون وار. اونون "تورپاغين برکتي" آدلي رومانيني اوخويورام. اثر شئدئوردير، هامييا تؤوصيه ائديرم. "اينوستراننايا ليتئراتورا" ژورناليندا کونکرئت سئچيلميش آدلار و اثرلر وار، اونلاري اوخويون. چوخ دا دئييل. 50-دن چوخ مؤليف وار کي، بو مؤليفلري اوخوماق موطلقدير.


روس ديلي آذربايجان گنجينين مدنيتينده نه درجه‌ده رول اوينايير؟

ايندي روس ديلي ياواش-ياواش سيرادان چيخير، بونا گؤره ده بيزه روس ديلينين يئريني توتان بير ديل لازيمدير. ان اوپتيمال واريانت اولاراق اينگيليس ديلي گؤرونور. آما معيشت سويه‌سينده يوخ، آکادئميک سويه‌ده، موطاليعه سويه‌سينده، مقاله يازماق سويه‌سينده. مثلا، نوروئچ، دانيمارکا کيمي اؤلکه‌لر. اونلار يئني کينو و کيتابلاري اينگيليسجه اوخويورلار، اساس اثرلري – هومئري، شئکسپيري اؤز ديللرينه ترجومه ائديرلر. تاريخ بئله گتيردي کي، پيلوت ديلي بيزيم اوچون روس ديلي اولدو، ايندي اونون ايستيفاده‌دن چيخماسييلا علاقه دار يئريني بير ديل توتماليدير. ترجومه کئشمکئشلي بير پروسئسدي و ان اوپتيمال واريانت پيلوت ديللردن ايستيفاده کيمي گؤرونور.


رايونلا شهر آراسيندا مؤوجود اولان اوچوروم هله ده وار، يوخسا بو اوچوروم آرادان قالديريليب؟

آرادان قالديريلير. آما هله ده مؤوجوددور. بو، هر يئرده وار – فرانسادا دا آمئريکادا دا، باکينين اؤز کندلرينده، رايونلاريندا دا. مرکز، شهرين کناري و سايره.


حياتينيزي ايکي حيصه يه بؤلن هر هانسي بير حاديثه باش وئريب؟

بلي، دئمک اولار کي، من بوردا "فيزفاک"اي بيتيرديکدن سونرا موسکوادا آسپيرانتورا اوخودوم و اوردا تاماميله يئني بير پلانئت گؤردوم. "عاغيللي آدام نئجه اولور؟ دونيا ندير؟ حيات ندير؟ ايشله‌مک ندير؟" کيمي سواللارا جاواب تاپديم.


حياتين معناسيني هاردا آختارماق لازيمدير؟ عوموميتله، "هر اينسانين بير ميسياسي(ماموریت) وار" ايدئياسي ايله راضيسينيزمي؟

 "وار" دئيه بيلمرم، آما اولماليدير. بير قيسيم آداملار وار کي، اونلارين بو ميسيادان خبرلري يوخدور. اونلار يالنيز گونده‌ليک پروبلئملر باره‌ده دوشونور، چؤرک آرخاسينجا دوشورلر.


سيزجه، سيزين ميسيانيز ندير و سيز بو ميسياني تاماملاييرسينيزمي؟

من ضيالييام، بئله دئيک، زيانلي. من نسه اوخويوب بو بيليکلري خالقا، ايجتيماعيته چاتديرمالييام. ايندي ياواش-ياواش کيتاب يازيريق. بونلار جمعيتين حياتيندا بؤيوک رول اوينايير. منيم ميسيام دونيادان گلن معلوماتلاري بير آرايا گتيريب خالقا چاتديرماقدير.


بو موصاحیبه بیرلیک مئدیا طرفیندن عرب الیفباسینا کؤچورولموشدور

 

قایناق: 1937.az