سالگردها

 

Zehtabı

پروفسور دوقتور محمد تقي زهتابي‌نين ايل دؤنومو مناسبتيله

 

عزيز وطنداشلار، دوقتور محمد تقي زهتابي‌نين اونودولماز خاطره‌سيني عزيز سانيب بو مراسيمده حاضير اولانلار. بير ايل بؤيوك عالم و آراشديريجي، يورولماز يورد و خلق اوغروندا جان قويان دوقتور زهتابي‌نين گؤزله‌نيلمز اؤلوموندن كئچدي و نئجه‌ده تئز كئچدي. ائله بيل دونن ايدي كي، بو خبر او چاليشقان و فداكار معلمين شبسترده ياشاديغي ائودن باش آليب گلدي، هر طرفه ياييلدي و بوتون آذربايجان ديلي و ميللي ـ مدني وارليغينا حؤرمت و قايغي بسله‌ينلرين اوركلريني كؤورتدي و باغريني سارسيتدي. دوقتور زهتابي‌نين گؤزله‌نيلمز وفاتي بوگونكو شرايطده درين بير ايتگي ايدي.

دوقتور محمد تقي زهتابي بو گونكو وانسفا زماندا ـ ان آغير شرايطده و هر يئرده اؤز اينانجلارينا وفادار قالدي و «هر كس‌سن اؤزون اول» سؤزونون جانلي نمونه‌سي اولدو. او اؤزونو تانياندان و داها جاوان ياشلاريندان صنفي مبارزه‌نين فعال عضولريندن اولدوغو حالدا، تاريخين گئديشي و ميللي ـ دموكراتيك قورتولوشون اؤن پلانا گئچمه‌سيله بو مبارزه‌نين اؤنجوللريندن اولدو و اؤز كسكين قلمي و بياني‌ايله يوردون و ائلين آزادليق جارچيسينا چئوريلدي. شايد بعضيلري بو ايشي بير سنگر دگيشديرمه، يا بير دونيا گؤروشوندن باشقا بير دونيا گؤروشونه هوپپانما كيمي تعبير ائده‌رلر. لاكين بو، زهتابي كاراكترده اولانلارين باره‌سينده ذره قدرده اولسون دوغرو چيخماز. زهتابي دونيايا گؤز آچاندان بير زحمت و شرف آدامي ايدي، او هر ايشي، هر گؤروشي دويدوغو قناعتلر، اوز به اوز گلديگي واقعيتلر، اله گتيرديگي سيناقلاردان و اتي ـ قاتي ايله دويدوغو حقيقتلردن آليردي. من دوقتور زهتابي ايله اللي بئش ايلليك بير تانيشليق و امكداشليق سيراسيندا بعضاً مناقشه‌لر يميزده اولموشدور. اما بوتون بو چكيش ـ بركيشلرده اونون اؤز اينام و اينانجيلاريندان آياق دالا قويدوغونو گؤرمه‌ميشم. دوقتور زهتابي اصولي مسئله‌لرده و نئجه دئيه‌ر ايستراتژيده دشمنله باريشماز ايدي و بو خصوصدا بلكه‌‌ده بير آز داها كسكين و امانسيز گؤرونوردو. لاكين اوندا اولان صداقت و صفا، عالمين اجتماعي ـ علمي دورومونو و ميللي ـ كوتله‌وي سيماسيني بير داها پارلادير و اونا خلق و امكداشلار آراسيندا حؤرمت قازانديرير.

دوكتور محمدتقي زهتابي‌نين ان مثبت خصلتلريندن بيري، بلكه‌ده بيرينجيسي  اونون علمي ـ مدني ايشلرده آرديجيليغي و يورولمازليغي ايدي. او چوخ، ماجرالي حياتيندا، هر يئرده اولور ـ اولسون، اؤزو اوچون شرايط ياراتماغي باجاران گؤره‌جاغي علمي ـ بديعي ايشي اوستون سويه‌ده، ايسته‌ينلرين ايستكلرينه اويغون اسلوبدا مئيدانا چيخارماغي باجاران بير عالم ايدي. اونون چاپ اولموش اثرلري سيراسيندا هله چاپ اوزو گؤرمه‌ميش چوخلو اثرلري واردير.

دوقتور محمدتقي زهتابي‌نين ياراتديغي علمي آراشديرما، اسلوبو، بيزيم بو گونكو افتخارلي نسليميزه يئني آذربايجان ياراتماقدا اولگو و اورنك اولماليدير. نيه‌كي عؤمرونده يورولماق بيلمه‌ين زهتابي، 22 بهمن انقلابيندان سونرا آنايوردا قاييتديغي و تبريز اونيورسيته‌سينده و اونون آردينجا تبريز راديو سوندا آذري توركجه‌سي تدريس ائتديگي و بورادا داها آيري بير اوغورسوزلوقلاردا اوز ـ اوزه گلديگي دورومدا ميللي ـ مدني وارليغيميز اوغروندا گؤتوردوگو محكم آدديملارينا سون نفسه قدر دوام ائتميشدير.

اونون اوزون ايللر بويو آذربايجان ديلي، ادبياتي و تاريخي ساحه‌سينده مئيدانا چيخارديغي آراشديرمالار و قلم چاليشمالاريندان بؤيوك قدرتي زهتابي نين مبارزليگي، سارسيلمازليغي، آرديجيليغي و قورخمازليغي آيدي. اونون يازيب ـ ياراديغي هر بير اثر: ائله باغبان ائل اوغلو، پروانه‌نين سرگذشتي، آذربايجان ديلي‌نين صرفي، ارك نشريه‌سي، سون ايللرده يازديغي درسليكلر و اونلاردا مقاله‌لريندن توتموش تاسون تحقيقي اثري ساييلان «ايران توركلري‌نين اسكي تاريخي» بو يورولماز آراشديريجي و قهرمان ائل اوغلوندان قالان معنوي ميراثدير.

دوكتور زهتابي‌نين معنوي ـ پسيكولوژيك حياتي حقينده سويله‌نيلن بو ييغجام آچيقلاماني بلكه‌ده بئله يئكونلاشديرماق اولار:

1 – زهتابي، هر شئيدن اؤنجه، يورولماز و سارسيلماز بير بيلگين ايدي.اونون وجودوندا و روحوندا اولان توكنمز انرژي، پارلاق اينام، سؤنمز اؤيرنمك و اويرتمك عشقي عؤمور بويو و حتي حياتي‌نين سون آنلاريندا بئله چاغلاماقدا ايدي. او سون سولوقلاريني (سون نفسلريني) ايش ميزي‌نين آرديندا چكميشدي.

2 – زهتابي زمانلا آياقلاشان، سسيني تاريخين ايستكلرينه و زمانين سسينه قاتان و يئني جان آتان بير بيلگين ايدي. او جوان ياشلاريندا سياسي مبارزه‌يه صنفي باخيشلارلا قوشولدوغو حالدا، داها يئتگين ياشلاريندا حياتدا قازانديغي تجربه‌لر و چيخديغي سيناقلاردان بو باخيشي ميللي ـ دموكراتيك گؤروشلرله سووارميش و جانلانديرميشسدير.

3 – زهتابي: ندنسه بير چوخ وقتلر اونونلا اوز ـ اوزه قونوشدوقدا، اؤز معنوي دونياسيله منه صمد بهرنگيني خاطرلاديردي. خلقميزين ايكي آيري ـ آيري نسيللريندن اولان و عؤمورلرينده بير ـ بيريني بيرآن‌دا اولسون گؤرمه‌ين بو ايكي انساندا اولان ظاهري گؤرونوش‌له بيرليكده معنوي سجيه‌لرينده ده چوخلو اوخشار يؤنلر وارايدي. اونلاردا اولان ساده‌ليك، صفا، صميميت، دوغاليق، قورخمازليق و يورولمازليق بير ـ بيرلرينه چوخ اوخشور. اونلارين حتي اسرارلي اؤلوملري ده بير ـ بيرينه اوخشور. صمدين اؤلومو اونون يئني دوغولوشونا سبب اولدوغو كيمي، زهتابي‌نين دا اؤلومو اونون يئني‌دن دوغولوشونا سبب اولاجاقدير. سوئد، يوته‌بوري، سالقيرانسكا اورك خسته خاناسي، 93 بؤلوم.