تجربه جهانی‌

Enistein

چئویرن: ائلمیرا قولیئوا

هامی‌میزین اؤلومه محکوم اولماسی نئجه ده غریبه‌دیر! هر بیریمیز قیسا بیر سوره ایچینده یاشاماق اوچون دونیایا گلیریک، اینسان بعضن دونیایا نه اوچون گلدییینی آنلامیر، بعضن ایسه، آنلادیغینی ظن ائدیر. آمما اینسان بعضن گونده‌لیک حیاتدا چوخ دوشونمه‌دن درک ائدیر کی، بیر اینسان باشقا اینسان‌لار اوچون دونیایا گلیب- حیاتی، گولومسه‌مه‌سی خوشبخت‌لییمیزین اساس سببی اولان اینسان‌لار اوچون دونیایا گلیب و باشقا تانیمادیغیمیز، طالعین بیزی سئوگی ایله بیرلشدیردییی اینسان لار اوچون…

 

گون بویونجا مین دفعه، داخیلی و خاریجی دونیامی حیات‌دا اولان و وفات ائتمیش باشقا اینسان‌لارا بورج‌لو اولدوغومو اؤزومه خاطیرلادیرام و منه وئریلن دیه‌ری عینی‌یله دیگر اینسان‌لارا اؤتورمه‌لی‌یم…

من هئچ واخت موقتی سربست‌لییه و خوشبخت‌لییه باخمامیشام – بو کریتیک اؤزولو من چوخ پیس ایدئال حساب ائدیر‌م. منیم ایدئال‌لاریم ایسه یولومو آیدینلادان، زامان-زامان حیات‌لا اوزلشمک اوچون منه جسارت وئره‌ن خئییرخاه‌لیق، گؤزل‌لیک و اینام‌دیر. عقل‌لی، اینجه‌صنعت و بیلیم‌سل فعالیت ساحه‌سینده ابدی ال‌چاتماز اولان اینسان‌لارلا علاقه‌سیز حیات منه بوش، معناسیز گؤرونردی. اینسان‌لارین معناسیز چابالاری – مولکیت، اوغور، دبدبه منه دایم لوزوم‌سوز گؤرونوب.

اجتماعی حیات‌داکی عدالت و سوروملولوق حیسسیم دایم منیم دیگر اینسان‌لارلا و اینسان بیرلیک‌لریله بیرباشا علاقه‌یه احتیاج دویماماملاچئلیشکی‌ده اولوب. من گئرچک بیر “یالقیز گزینم” و هئچ واخت بوتون قلبیمله اؤلکه‌مه، ائویمه، دوست‌لاریما و حتی عائله‌مه باغلی اولمامیشام، بوتون بونلارلا بئله هئچ واخت تنهالیغا اولان احتیاج حیسسیمی ایتیرمه‌میشم.

منیم سیاسی ایدئالیم دئموکراسی‌دیر. هر بیر اینسانا آیریجا بیر فرد کیمی حؤرمت ائدیلمه‌لی، هئچ کیمه پرستیش ائدیلمه‌مه‌لی‌دیر. من اؤزوم هئچ بیر یالنیشیم اولمادان، عینی زامان‌دا هئچ بیر لیاقت سرگی‌لمه‌دن یولداش‌لاریم‌دان حددن آرتیق مفتونلوق و حؤرمت گؤرموشه‌م و بو دا سانکی طالعین بیر ایرونییاسی‌دیر. بونون سببی ایستک اولا بیلر، بعضی‌لری اوچون دایانمادان موباریزه آپاراراق الده ائتدییم گوجومله یی‌یه‌لندیییم بیر سیرا ایدئیالاری باشا دوشمک ال‌چاتماز اولا بیلر. چوخ یاخشی بیلیرم کی، ایسته‌نیلن تشکیلات‌دا اینسان مقصدینه چاتماق اوچون دوشونمه‌لی، ایداره ائتمه‌لی و عمومیتله مسئولیت‌لی اولمالی‌دیر. آنجاق ایداره ائدیلن‌لر هئچ نه‌یه مجبور ائدیلمه‌مه‌لی‌دیرلر، اونلار اؤز لیدئرلرینی سئچمه‌یی باجارمالی‌دیرلار. فیکریمجه زوراکی دیکتاتورلوق رئژیمی تئزلیکله سونا چاتاجاق، چونکی، زوراکی‌لیق یالنیز لیاقت‌سیز اینسان‌لاری جلب ائدیر. منه گؤره اینسان حیاتین‌دا ان ده‌یرلی شئی اونون سیاسی مؤوقعی دئییل، یارادیجی، منطیق‌لی فرد اولماسی، شخصیتی‌دیر؛ بو دا عالیجناب‌لیلیغا سبب اولور، عوام اینسان‌لار ایسه دوشونجه و حیسسیات باخیمیندان ماراق‌سیز اینسان‌لار اولاراق قالیرلار.

بو مؤوضوع منی عوام حیاتین، حربی سیستئمین نیفرت ائتدییم ایچ اوزونو آچماغا وادار ائدیر… سیویلیزاسییانین بو یارالی نقطه‌سی مومکون قدر تئز آرادان قالدیریلمالی‌دیر. وطن‌پرورلیک آدی آلتیندا حربی قهرمان‌لیق، معناسیز زوراکی‌لیق و بوتون اییرنج جفنگیات‌لار – اونلارا نئجه ده نیفرت ائدیره‌م!

سیرلی اولماق بیزیم صاحب اولدوغوموز ان گؤزل حیسس‌دیر. بو، اصل صنعتین و علمین اؤزولونو تشکیل ائد‌ن اساس حیسس‌دیر. بونو بیلمه‌ین و بونونلا ماراقلانمایان اؤلو کیمی‌دیر و اونون گؤزلری گئتدیکجه کورلاشیر. حتی قورخو ایله سهو سالینسا دا دینین یارانما سببی محض سیرلی اولمامیزدیر. بیزیم نفوذ ائده بیلمه‌یه‌جه‌ییمیز بیر وارلیغین مؤوجود اولدوغونو بیلمک، ان اساس‌لی سبب‌لری قاورامامیز، بئینیمیزین یالنیز ان پریمیتیو (ایلکل)، ساده فورماسینی قبول ائده بیله‌جه‌یی گؤزل‌لیک: حقیقی دیندارلیغی یارادان بو بیلیک و حیسس‌دیر. یالنیز و یالنیز بو معنادا من اولدوقجا دیندار بیری‌یم.

حیاتین ابدی اولماسی و اوجا بیر وارلیغین اولدوغو ایله راضی‌لاشیرام، بونونلا یاناشی اؤزونو طبیعت‌ده بروزه وئره‌ن یارادیلیش سببیمیزی آنلاماق اوچون کیچیک بیر چابا ایله ده کیفایت‌لنیرم.

حاضیرلایان: سوسن نواده رضی

 

قایناق: Kultaz