تئوری

Muharibe araclari

 

سٶيلولر (ديسكورسلار) ساواشيندا، "مظلوم ميللت­لر ناسيوناليزمي" تئزي­نين آكتوئل دورومو

 

اوزون سٶزون قيصاسي: سويوق ساواش دٶورونه قدر، "مظلوم ميللتلر ناسيوناليزمي" كيمي تانينان ايدئولوژي و اوندان دوغان سياسي شوعارلار، مشروع سايليرديلار آمما دونيادا باش وئرميش بير سيرا فاجيعه­لر، ناسيوناليزم­ين مظلوملار واريانتي­ني­ ده، همان رفه قالديريدي كي، ايكينجي دونيا موحاريبه­سي نتيجه­سينده، آنا ناسيوناليزمي اورا يئرلشديرميشدي. بو گون داها "مظلوم ميللتلر"، چوخدا مظلوم ساييلمايان ميصداقلاريلا تانينيرلار: طالبان، بوکوحرام، ايسلامي جيهاد، حماس، حزب‌الله، لشگر طيبه، حوثی‌لر، القاعده، داعش، جبهه‌النصره و بونلارا بنزه خيردالي بٶيوكلو "مظلوم"لار. ساندرو لومنسو و فارك كيمي بو نهضتلرين سولچي باجي قارداشلاري ايندي لاتين آمئريكانين گئري قالميش اٶلكه لرينده، آدام آل وئري، ناركوتيك قاچاقچي ليغي و سايير غئيري قانوني بيزنسلرله مشغولدورلار.

بو سببدن بوگون، ليبرال دموكراسي، اينسان حاقلاري، وطنداشليق، سكولاريزم، قادين-كيشي آراسيندا حقوق برابرلي­يي و قلوبال اكو سيستمي قوروماق، دونيادا حاكيم و مشروع سٶيلولر/ديسكورسلار ديرلار. گونئي آذربايجان آزادليق حركاتي، اٶز ديرنيشمه­سيني بو سٶيلولر اوزرينده كٶكله­مه­لي­دير. بو سٶيلو دئيشمي­نين تبعاتي آز دئير و بيز گرك دواملي و هرطرفلي اٶز سٶيلولريميزي دونيانين قبول ائتدي­يي و آنلاديغي نوتلا يازماغي باجاراق.

 



هوندوردن دوشونمك:
ايسوئچ ديليندن ترجومه اولموش بو ايفاده، سياسي ادبيات­دا، بير طرفين، هانسي­سا بير مٶوضوعدا، هله سون نتيجه­يه چاتمادان، هله چوخ فرقلي مٶوقع­لردن اولان فيكيرلرين سسلنمه­سينه ائحتياج دويولماغا رغمن، فيكير سٶيله­مه­يه دئيلير. بو معنادا، بو مقاله و ياخين زامانلاردا نشر اولاجاق بير نئچه بنزر مقاله، اصلينده "هوندوردن دوشونمك" دير. حاقيندا آز تارتيشديغيميز بير سيرا مٶضوعلاردا، هله اطرافيندا چوخ دانيشماغا ائحتياجيميز اولماسي ندنيندن، يالنيز ايلكين فيكيرلري سٶيله­مك اولار. اومورام كي بوتون دوستلار بو مٶوضوعدا اٶز فيكيرلريني پايلاشماقلا، ميللي حركاتين سيرالاريندا، سياسي ادبياتين گليشمه­سينه يارديمچي اولسونلار. بو سئريادان اولان مقاله­لرين سونوچلاري نئت و قيصا اولماسينا رغمن، مسئله­لرين تفروعاتينا كئچمك و بير سيرا بيزيم سياسي ادبياتيمزدا تانيش اولمايان يا تابو سانيلان مٶوضوعلارا داخيل اولماق اوچون، اوزن يازيلار اولموشلار و كيمي زامان حتي بير درسليك فورموندا گٶرونه بيلرلر. يقين بو سورونلاري باشقا فورماتلاردا دا، آرايا قويماق اولار، منيم اٶنه چيخارديغيم يالنيز مومكون يازي طرزلريندن بيري كيمي قبول اولونا بيلر. اساس، بو مسئله­لري گونده­لي­يه چيخارماقديرسا، يازيلارين فورماتي و حجمي ايكينجي درجه­لي گٶرونمه­لي­دير. بو مقاله­لر توركجه و بير ايكي­سي فارسجا يازيلميشدير. ياخين هفته­لرده نشر اولاجاق باشقا بير مقاله. "يئني دٶولت، فردي امنيت و جمعي تهلوله سيزليك"باشليغي آلتيندا، بٶلگه­ده حاكيم اولان و يارانماسي مٶحتميل ساييلان شراييط ­ده، گونئي آذربايجانين ميللي تهلوكه­سيز­لي­يي قونوسونا حصر اولموشدور.

مقاله ­نين مقصدي

 

عجبا بوگون گونئي آذربايجان ميللي آزادليق حركاتي، "مظلوم ميلت ناسيوناليزمي" سٶيلوي­نه سٶيكنه بيلرمي؟ بو ناسيوناليزم­ين تاريخي اينكيشاف يولو و گونجل دورومو نه دير؟

اصليند ميلي آزادليق موجاديله­سي، ايستر كلاسيك موستملكه­چي­ليك چرچيوه­سينده، خاريجي بير قووه­يه قارشي يا بير ميلت-دٶولت چرچيوه­سينده حاكيم قووه­ايله، مركزي ايقتيدار قارشي­سيندا، موقاييسه اولونا بيلمز درجه­ده ضعيف بير گوجون، اٶزندن قات قات گوجلو حربي-سياسي و كولتورل گوج كومپلئكسي­نين هئژمونلوغونو هدفه آلان، بير حركات­دير. بيز عادتا بو تيپلي حركاتين كلاسيك و ظفرله باشا چاتميش اٶرنكلريندن دانيشيريق آمما بشر تاريخي نين باشدان باشا كيچيك و ضعيف مللتلرين محو اولماسيلا دولو اولان فصيل­لريني واراقلاميريق.

دونيا تاريخي و حتي دونيانين ان ياخين تاريخي، آدلاري ميللتلر و اتنييك قوروپلار خريطه­سيندن هميشه­ليك سيلينميش مدنيتلرله دولودور. بابل، ائتروراين، كارتاژ، ميتاني، شومر، اسپارت، آزتئك، مايا، اينكا، آراقون و يوزلر و مينلر مدنيتلر و ميللتلر بوگون يالنيز تاريخين يادداشيندا قالميشلاربوگون ياشايان 6000 ديلين صاحيبي اولان مدنيتلرين بير چوخونون دا ياخين زاماندا بو سياهي­يه علاوه اولمالاري لابود ساييلير. بو سببدن بيز، آرتيق ايكينجي جومهويتي­نين 20-جي يوبلئي­ييني قئيد ائتميش بير ميلته منسوب اولماميزدان فرح و غرور حيسي دويمالي­ييق. بو نائليت هئچ ده طبيعت قانونو دئيلدير. عكسينه اگر مدنيتلرين طالعينده طبيعت قانونونا بنزر بير شئي وارسا، او دا، بو مدنيتلرين ابدي اولماماسي­دير. ايندي ايستر بو مدنيتلر اسگي ميصير، آشورلار، شومرلر، فنيقي­لر و يا روم ايمپرياسي اولسون يا ايستر  شرقي پروس

بيز تاريخين اٶز وارلغيني قورويا بيلمه­ميش زاواللي ميللت­لري­نين احوالاتيني اٶنه چكميريك. بو ايشي بيزيم دوشمنلريميز گٶروب، "باخين، سيز بونلاردان آرتيق دئيرسيز!" دئيب، بيزي شماتت ائتمكله بيزي روحدان سالماق ايستيرلر. اونلار بيزيم حركاتي و ميللتي، تسليمله راضي­لاشماق مقصديله بو ايشي گٶرورلر و بيزده دوزگون اولاراق، روم ايپمرياسي، ساوئتلر بيرلي­يي و شاه رئژيمي كيمي، واختيلا سارسيلماز و استابيل گٶرسنن، قدر قودرت گوجلرين، چٶكمه­سيني اٶنه چكيريك. بو هر بير ساواشين آيريلماز حيصه­سي اولان رواني ساواش بٶلومودور.

پسيكولوژي ساواش آمما بيزيم آناليز قابيلتيميزي محدودلاشديرمامالي­دير. بيز، هم روم ايمپرياسي­نين چٶكمه­سي­ني و هم سورياني­لرين بير ميللت كيمي بٶلگه خريطه­سيندن سيلينمه فاكتلاريني نظرده آلمالي­ييق. بيز همده قئيد اولوندوغو كيمي نظرده آلمالي­ييق كي، آزادليق موجاديله­سي، اٶزوندن قات-قات گوجلو بير گوجه قارشي آپاريلان ساواشدير و بو ساواشدا اٶزوموزون و قارشي قوه­نين آكتوئل گوجو و پتانسيللريندن رئال بير آنلاييشميز اولمالي­دير. بو باخيمدان سٶيلو Söyləv، discourse يارادما موجاديله­سي­نده هاردا دوروب، نه ائتدي­يميز اٶلوم ديريم اهميتي داشي­ماقدادير.

 

سٶيلو Söyləv(discourse) يارادما موجاديله­ سي

 

گونئي آذربايجان ميللي آزادليق موجاديله­سي­نين حاضيركي دالغاسي، اصلينده ايران سياسي مكانيندا، تابولاشميش بير سٶيلوي، اوغورلا گوندمه چيخارمانين محصولودور. بو پراسئس دونيادا سويوق ساواشين بيتمه­سي و 20-جي عصيرده ايراندا حاكيم اولموش سٶيلوين اوغورلا دئيشمه­سي­نين محصولودور. سٶيلو دئيشمه، اصلينده، گونده ليك سياست­ين دئيشمه­سي يوخ، بلكه اونو احاطه ائدن و چوخ چتين دئيشن، دونياني تانيماق اوچون ايشله­نن، دونيا گٶروشو، فرضيه­لر، آنلاييشلار، تعريفلر، تئرمينولوژي، رئتوريك، سياسي ديل، سياسي ادبيات، اويقون تاريخي تجروبه­لر و اٶرنكلردن عيبارت بير مجموعه­دير.

اولابيلسين كي بيزيم ميلي آزادليق حركاتي، ايران سياسي مكانيندا سٶيلو دئيشمه­ده اوغور قازانماسي، كيمي­لرينه اينانديريجي گلمه­سين. آمما حقيقت بودور كي، حاكيم ايدئولوژي و اونون سٶيلولريني ياراديب، حاكيم ائديب قوروماقدا، لازيمي اينستيتوتلاردان (نهادلاردان) محروم اولان ايراندا، عمومي رأيي (فيكري) فورمالاشديرماق و حتي سٶيلو ياراديب و سٶيلو دئيشديرمك، اينكيشاف ائتميش اٶلكه­لرده اولدوغو درجه­ده، چتين دئير.

دونيانين شاهيد اولدوغو بٶيوك سٶيلو دئيشيملري، هئچ بير دموكراتيك قايدايا تابع دئير. بو دئيشيملر نه سس وئرمه صانديقلاريندان و نه بير دموكراتيك پراسئس­ين بطن­يندن چيخميرلار. يئني اراضي "كشف" ائديب اونلاري ايشغال آلتينا آلماق، سوسياليسم، ناسيوناليزم، فاشيسم، نازيسم، اينسان حاقلاري، آمئريكانين ويتنامدا آپارديغي موحاريبه عليهينه حركات، دونيا بويو طلبه حركاتي (1968)، آتوم سيلاحلارينا قارشي موباريزه، كارترين طرفيندن گوندمه سالينان اينسان حاقلاري، ريگان طرفيندن شوروي يه قارشي طرح اولان "شر اپمپرياسي" تئزي، گونئي آفريقانين آپارتايد رئژيمينه قارشي اولوسلار آراسي حركات و بونلارا بنزر قلوبال يا بٶلگه­سل سٶيلولرين يارانماسي و دئيشمه­سي ايجتيماعي قوه­لر و فيكيرلرين كومپلئكس موناسيبتلر سيستميندن چيخيرلار.

 

سٶيلو دئيشمك: ايراده، اوغور قازانماق، رقابت

 

بير مركز يا بير بلوكون ايراده­سيله، سٶيلو دئيشمك مومكون اولسادا، بو ايش چتين دير و حاكيم دٶولتلر بئله چوخ زامان بو ايشين عٶهده­سيندن گله بيلميرلر. دونيا چاپيندا سٶيلوا دئيشه بيلن گوجلرين باشيندا، آمئريكا بيرلشميش شتاتلار­ي­نين دٶولتي گلدي­يي معلوم فاكت دير. جيمي كارترين "اينسان حاقلاري" شعاري و اوندان سونرا ريگان­ين "شر ايمپرياسي"نا قارشي موحاريبه اعلان ائتمه­سي، ايكينجي جورج بوشون بوگونه كيمي گونده ليكده قالميش، "تروريسم"ه قارشي جيهاد اعلان ائتمه­سي و بوتون دونيا سياستي­نين يٶنونه گوجلو تأثير قويموش بير چوخ سٶيلولار، بو مركزدن صادر اولموشدور.

ايراندا شاه رئژيمي­نين "سياست مستقل ملي" يا "ارتجاع سرخ و سياه"آ قارشي موجاديله شوعاري، حاكيم قووه­نين توپلومدا سياسي گونده­ليگي يٶنونو بليرتمك اوچون ناكام قالان چابالار ايدي. ايسلام اينقيلابيندان سونرا، "استكبار ستيزي"، "آنتي امپرياليسم"، "جنگ جنگ تا رفع فتنه از عالم"، "انرژي هسته­اي حق مسلم ماست" كيمي شعارلار، حاكيم قوه­نين ياراتديغي سٶيلولرله باغلي قيصا شوعارلارديرلار. ايران رئژيمي­نين اوپوزيسيون طرفيندن، "غني سازي" قارشي سيندا "فقيرسازي" آنلاميني قويماق، توپلومدا سٶيلو دئيشمك اوچون بير چابانين اٶرنه­يي­دير. دونيا چاغداش تاريخينده، جنوبي آفريقاني آرپارتايد رئژيمينه قارشي، نئلسون ماندلانين رهبرليك ائتدي­يي ANC ان اوغورلو سٶيلو دئيشمه­نين معماري و تشبوثكاري كيمي تاريخه دوشموشدور.

 

رقابت ميداني

 

ان آزيندان عمومي رأي، اونون فورمالاشماسي و دييشمه­لري باخيميندان، ايران و اونون اوزانتي­سي اولان، ايران كٶكنلي سياسي آكتيو موهاجيرت، واحيد بير سياسي مكان دير. بو مكاندا حاكيم سياسي گوج، عمومي فيكري موهندسليك ائتمك اوچون بوتون ايمكانلارا ماليك دير. نتيجه­ده گونئي آذربايجان و بوتون ايران توركونون عمومي فيكريني فورمالاشديرماقدا، حاكيم سٶيلوين قوروجوسو اولان حاكيميت و توركلره قارشي بير همان درجه­ده رحيم سيز اولان آلترناتيو سٶيلولر، تكجه فارسين يوخ بلكه، بوتون ايران سياسي مكاني­نين عمومي فيكريني فورمالاشديرماق، مديريت ائتمك و آچاريني الينده ساخلاماقدا اساس مدعي و گوجلو آكتيورلارديرلار. بئله­ليكله گونئي آزربايجان ميللي آزادليق فيكري، اگر حاكيم سٶيلوي دئيشمكله مئيدانا گليب، گوج توپلاييب و بير سياسي حركاتا چئوريلميشدير، اٶز نائيليتلريني قوروماق و مٶوقعلريني گوجلنديرمك اوچون، دائما جرياندا اولان بير رقابت­ين ضعيف طرفي­دير.

 

دونيا دا سٶيلو دئيشمك يا اٶز گونده­ لي ­ييني تعريف ائتمك؟

 

ايشاره اولدوغو كيمي سٶيلو دئيشمك و خصوصيله دونيادا حاكيم سٶيلولرله رقابت ائده بيلن سٶيلولر مئيدانا قويماق، يالنيز دونيا ميقياسيندا بٶيوك گوجلرين اليندن گلير. آمما اٶز گونده­لي­ييني، دونيادا حاكيم اولان گونده­ليكلرين چرچيوه­سينده تعريف ائتمك، تماميله مومكون بير ايشدير. بو سببدن، گونئي آذربايجان ميللي آزادليق حركاتي، اٶز گونده­لي­ييني، ايستكلري و شوعارلاريني ليبرال دموكراسي، اينسان حاقلاري، وطنداشليق، سكولاريزم، قادين-كيشي آراسيندا حقوق برابرلي­يي و قلوبال اكو سيستمي قوروماق كيمي سٶيلولرين چرچيوه­سينده تعريف ائتمه­يي باجارمالي­دير. بو باخيمدان، ياشاديغيميز دونياد بوگون مظلوم ميللتلر ناسيوناليزمي آديندا بير ايدئولوژي يا سٶيلو گونجل، كئچرلي و مشروع ساييلمير.

 

مٶجود آراجلار

 

عمومي فيكر اطرافيندا گئدن دائمي رقابتده غاليب اولماق اوچون، گونجل آراجلار/ابزار گركير. بو آراجلارين اٶرنكلري كيمي، سياسي تئرمينولوژي، سياسي ادبيات و سياسي ائتيكتلر وكيم­ليك ائتيكتلريني سايماق اولار. بو دٶرد آراجدان بيريني يعني سياسي ادبياتي، بيز اٶزوموز يارادمالي­ييقسا، سياسي تئرمينولوژي و سياسي ائتيكتلري يارادماقدا اليميز باغلي­دير. يالنيز دونيا چاپيندا گوج مركزلري يا علم اوتوريته­لري بو گوجه ماليك­ اولورلار.

بو دائمي رقابت­ين تبعاتي او جومله­دن اودور كي، ميللي حركات، دونياد حاكيم اولان سٶيلولرله هارموني­ده اولمادان علاوه، هم ده گرك، منسوب اولدوغو ميللتين عمومي فيكريله موناسيبت­يني تنظيم­له­مه­يي باجارسين. بو ايش اوچون گركلي ساييلان اساسلارا اٶرنك كيمي آشاغيداكي­لاري سايماق اولار:Muharibe araclari 2

1. ميللي حركات حاكيم ميللت و منسوب اولدوغو توپلومون عمومي فيكري اٶيرنسين،

2. بو عمومي فيكردن تأثير آلماق و اونا تأثير قويماقلا، توپلومون سياسي گونده­لي­يي­نين نه اولماسي­ندا فعال رول اويناسين،

3. اٶز سياسي پلاتفورمونو منسوب اولدوغو توپلومون عمومي فيكريله هارمونيك بير بالانس­دا ساخلاسين. يعني ايكي طرفلي تأثير آليب و اويقونلاشماق اساسيندا، آپاريجي گوج اولماقلا برابر، اٶز توپلومونون دا سٶزچوسو اولا بيلسين.

بوتون بو سورج، بوشلوقدا يوخ، سايير سياسي بلوكلار او جومله­دن حاكيم ميلت، سياسي ايقتيدار حاكيم و طبقه­نين ايدئولوژي اوجاقلاري و سياسي ايستيتوتلاريلا رقابت ده حياته كئچيريلمه­لي­دير. سون زامانلار بيز آراسيرا، مركزده يارانان عمومي فيكير دالغالاري­نين آذربايجاندا دا ائتگي بوراخماسي­لا باغلي، حئيرتدن ايره­لي گلميش موباحيثه­لرين شاهيدي اولموشوق. سانكي بوتون ايران سياسي مكاني­ني هئچ اولماز سا، اونون تورك توپلومونا عاييد بٶلومونون اينحيصاريني بيزه تاپشيرميشلار و 1388ـجي ايلده ياشيل حركاتلا باغلي شاهيد اولدوغوموز كيمي، هميشه مركزدن صادير اولان سيگنا­ل­لار آذربايجاندا موخاطيب قازانا بيلمه­يه­جكلر. ميثال اوچون مرتضي پاشايي آدلي بير گنج فارس خواننده­ين واختسيز اٶلوموندن يارانان سانتي مانتال دالغالارين آذربايجان گنجلريني­ده ائتگي­سيز بوراخماماسي، بعضي ميللي فعال لار آراسيندا تعجب دوغوروب و بير سيرا موباحيثه­لره سبب اولدو. هابئله تبريزده، ايران رئژيميله سس سسه وئرميش سولچولارين، اورتا دوغو حاديثه­لرينده، آنتي ايمپرياليستي مٶوقع­دن بيانات وئرمه­لري و دواميندا، ايرانين اٶز اتومي ماجرالاري­نين سونوندا، باتي اٶلكه­لرله سازيشه وارماسيندان يارانان هيجان و سئوينج دالغالاري­نين گونئي آذربايجانا چوخ ضعيف بير درجه­ده سيرايت ائتمه­سي و ميللي فعال­لارين بو حيسياتا ياناشما طرزلري، حركتين ايچينده و حاشيه­سينده، تارتيشمالارا ندن اولموشدور. حالبوكي، واحيد سياسي ايران مكانيندا، هم سياسي حاكميت­ين رسمي خطي و تابع اورقانلاري، هم دينچي-اومت­چي جريانلار و هم سولچو-آنتي ايمپرياليسيت چته­لر، گونئي آدربايجاندا حاكيم اولان سٶيلولر و سياسي گونده­لي­يين بندلريني معينلشديرمكده، ميللي حركاتلا رقابتده عمل ائديرلر.

 

ناسيوناليسم­ين ظهورو، ياريم جانليق دٶورو و افولو

 

ناسيوناليسم بير ايدئولوژي و بير سياسي مكتب كيمي، 18ـي عصيردن بوگونه كيمي اوزون و دولامبا دولام بير يول كئچميشدير. بو مقاله­نين حٶوصله­سي چرچيوه­سينده و مٶضوعا عاييد اولان قدر دئمك اولار كي: 18ـ جي عصيردن، ايكينجي دونيا موحاريبه­سي نين سونونا قدر بو ايدئولوژي، آوروپالي­لار و اونلارلا باغلي باتي دٶولتلرينه يارديم ائتميشدير كي عوثمانلي ايمپرياسي­ني پارچالاييب دونيا قودرتي كيمي مئيداندان چيخارسينلار و اٶز آرالاريندا، ديني، مذهبي و فيرقه­ موحاريبه­لرينه سون قويسونلار. سونرالار دونيانين يئني سوپرگوجو كيمي گليشن آمئريكا و اونونلا برابر ايكينجي دونيا موحاريبه­سي­نين بٶيوك فاتحي اولان كئچميش ساوئتلر بيرلي­لي­يي ايمپئرياسي، آوروپانين سنتي موستملكه­چي متروپوللاري­نين ايمپريالاريني داغيديب و اٶزلرينه دونيادا يئر آچماقدا، "مظلوم ميللتلر ناسيوناليزمي"­ني، مشروع اعلام ائتديلر و بونولا، ايكينجي دونيا ساواشيندا، "ناسيوناليسم"ين آنا آخيني­نين كيتابي باغلانديقدان سونرا بو "بالا ناسيوناليزم"، اٶز مشروعيتيني ساخلادي. لاكين سويوق ساواشين بيتمه­سي و بير سيرا بو مظلوم ميللترين افغانيستان، بالكانلار، ائريتره، آفريقا و ايسلام دونياسيندا باشلارينا گلن فاجيعه­لر، مظلوملارين ناسيوناليزميندن ده، مشروعيت زدايي ائديب، بو ناسيوناليزمي­ده آنا ناسيونالسيم­ين يانيندا غئيري مشروع اعلان ائتدي.

ناسيوناليسم­ين ايراندا دورومو

آوروپادا داخيلي موحاريبه­لره مٶجوزه­يه بنظر بير طرزده سون قويموش، مودرنيزاسيون و كاپيتاليزمله اياقلاشميش ناسيوناليزم، ايران­دا تام ترس يٶنده عمل ائديب، سنتي ديني خورافاتا، بير سيرا ناسيوناليستي خورافاتي علاوه ائديب و توپلومونا يئني بير ضيديت گتيرميشدير و دموكراتيك­لشمك يولوندا بٶيوك بير مانع اولموشدور. ايراندا، حاكيميتي اٶز آرالاريندا بٶلمكده تاريخ بويو بير چتينليك ياشاماميش اتنيك قورپلار، ناسيوناليزم­ين اٶلكه­ده حاكيم اولماسيلا، بير اتنيك قوروپون، قودرتي تك باشينا اله آلماسي پروژه­سي­نه قارشي ديرنمه­يه باشلاميشلار. ناسيوناليزم­ين موطني ساييلان آوروپادا مٶوجود اولان تئوريك و كولتورل يوكدن يوخسون اولان، كاريكاتورا بنزر فارس­ اتنيك ناسيوناليزمي، 18ـجي عصرين ناسيوناليزمي­نين الده قاييرما وارثي اودوغو حالدا، اٶز تاريخيني، غيرتاريخي ميتولوژيك بير زامانا باغلاييب، اٶزونو زامانسيز، ابدي و ازلي perennialistisk اعلان ائتمكده دير. گويا ناسيوناليزم­ين بوتون دونيا اوچون، 18-جي عصيردن قديم اولماديغي حالدا، فارس (اونلارجا: "ايران") ناسيوناليزمي، حضرتي آدمين جنتدن قووولماسيندان اٶنجه واريميش و صور اصرافيل سسلنه­نندن سونرا دا مٶٶجود اولاجاقدير! بئله بير عقل­دن اوزاق، اويدورما ناسيوناليزم­ين قارشي­سيندا فورمالاشميش ديرنيشمه حركاتي، طبيعي حالدا و قبول ائتمه­سك ده، آنلاشيلان بير رئاكسيا كيمي، اٶزو ناسيونالسيتي شوعارلادان اوزاق قالا بيلمز.

 

مظلوم ميللت­لرين ناسيوناليزمي

 

سون ايللره قدر، باشقا ميللترين و دٶولتلرين بويوندوروغو آلتيندا اولان اسير ميللتلرين اٶز موقدراتيني اٶز اللرينه آلماق اوچون آپارديقلاري موجاديله "ناسيوناليستي" آدلانيردي. بو مودتده، دونيادا، مظلوم ميللتلرين اٶز آزادليق حركتلريني بير باشا "ناسيوناليستي" بئله آدلانديرماسالار دا، باشقالاري اونلاري بو صيفتله تانيتميشلار. خصوصيله ايكينجي دونيا ساواشيندان سونرا، "ناسيوناليزم" يالنيز اسير ميللتلرين قورتولوش ايدئولوژيسي كيمي عرصه­ده قالميشدير. بو دٶورده اٶز ايستيقلال و آزادليقلاريندا موثبت رول اويناميش ناسيوناليزمي، ايندي اوچونجو دونيا ميللتلري­نين ميللتلشمه و دموكراتيكلشمه­سينده رول اويناماسيندا، بير قباحت گٶرموردولر. اونلار دوشونوردولر كي، "اگر دونن بيزه ياخشي­ايدي قوي بوگون ده بو اسير ميللتلره مجاز اولسون!"

 

يادا سالماق يئرينده اولار كي، فرانسا اينقيلابي­نين ايلهام قايناغي اولان، آمئريكانين ايستيقلال بياننامه­سي، بو اٶلكه­ني اينگيلتره بويوندوروغوندان قورتاران "آمئريكا ناسيوناليزمي"نين ده بياننامه­سي ساييلير. يا ميثال اوچون، آوروپا ناسيوناليستلري­نين آتاسي اولان جوزپه ماتزيني (1805-1872) و جوزپه گاريبالدي (1807-1882) و اونلارين گوجلو رول اويناديقلاري ايتاليانين ميللي آزادليق حركاتي بو اٶلكه­ني، آوستريا (اطريش) اسارتيندان قورتارماسي­دا ائله ماهيت اعتيباريله بير مظلوم ميلتين ناسيوناليزمي­ايدي. ديقت ائدين كي، نظريه باخيميندان، هم روسو و هم مونتسكيو، ناسيوناليست حئساب اولونورلار. شرقي آوروپا و اورتا دوغودا، عوثمانلي ايمپرياسي­نين داغيلماسيندان دوغان دٶولت-ميللتلرين هاميسي اوچون، ناسيوناليزم، آزادليق پروژه­لري­نين تماميله لئقئتيم ايدئولوژيك تملي ساييليردي. آسيادا چين­ين ژاپن اسارتيندان قورتارماق و حتي توركيه جمهوريتي­نين يارانما پراسئسي و سايير. بوگونكو دونيا دٶولتلري­نين بير چوخونون 19-ي و 20-جي عصيرلرده يارانما تاريخلريني وراقلاركن ناسيوناليزم، هم مظلوم ميللتلرين ايدئولوژي بايراغي و هم مودرنلشمك سورجينده بير موهوم مرحله كيمي كيمي رول اوناميشدير.

 

ناسيوناليزم، منفي معنادا

 

قيصاجا دئمك اولار كي، ناسيوناليزم، خاريجي بير دٶولت­ين ايشغالچي­ليغينا سون قويماق پراسئسي­نين ايدئولوژيك و سياسي بايراغي كيمي قبول اولونموشدور آمما هر حاكم بير ميلتين اٶز آزليقلاريني آسيمله ائتمك و اونلارين حاقلاريني تاپتالاماغا مشروعيت يونتالايان يا ضعيف قونشولارينا قارشي حربه زوربا گلمك مقصديله قوللانديغي حالدا، منفي ساييلميشدير. هر ايكي باخيمدان توركيه جومهوريتي­نده اولان ناسيوناليزم اويقون بير اٶرنك ساييلا بيلر. بو اٶلكه­نين خاريجي ايشغالچي­لارا قارشي آپارديغي قورتولوش موجاديله­سي موثبت آنلامدا ناسيوناليستي ساييلديغي حالدا، مودرن توركيه دٶولتي، مستقر و باغمسيز دٶولت كيمي اٶز آزليقلارينا قارشي اينكار و آسيملاسيون سياستي منفي آنلامدا ناسيوناليستي حئساب ائديلير.

 

مظلوملارين ناسيوناليزمي شوبهه آلتينا گئدير

 

1990ـجي ايللرده، دونيا بير-بيرينه ساريلميش ايكي آخين­ين شاهيدي اولور: اسگي كمونيستي دٶولتلر چٶكودولر و كمونيسم بير قورتولوش ايدئولوژيسي كيمي اوز اعتيباريني ايتيردي. يالنيز شوروي، يوقوسلاوي و اتيوپي­ده، كومونيزمين چٶكمه­سيله برابر 21 يئني دٶول-ميللت ياراندي. بو پراسئس يوقوسلاوي، بير سيرا ساوئت جومهوريتلري و اتيوپي ده قانسيز باشا گلمه­دي و هله ده بير نئچه يئرده بو آجي پراسئسلرين سونو گورسنمير. ميللي آزادليق موجاديله­سي دٶورونده مولاييم سوسياليستي ايده­لريله تانيان "ائريتره خالق آزادليق جبهه­سي" (EPLF) شيمالي كره ايله موقاييسه اولونان، دونيانين ان قدرا رئژيمرليندن بيريني قوردو. بو ساده­جه عمومي قايداني تصديقله­ين بير اٶرنك كيمي گٶرونمه­لي­دير. مظلوم ميللتلر ناسيوناليزمي نين بير آزاد و رومانتيك صاباح اوميديله يارانميش بوتون آزادليغا چيخميش موستملكه­لر، نه ريفاها چاتديلار و نه دموكراسي­نين داديني بيلديلر.

بو پراسئسي يعني ناسيوناليزم­ اولدوزونون قالخاماسي و سٶنمه­سي يوخاريدا ايشاره اولدوغو كيمي، آوروپادا مدرن دٶولتلرين فورمالاشماسي، آوروپا ليبراليزمي­نين سٶزدن عمله كئچيرن "تيم"لرين (ميلت-دٶولت"لرين) ايدئولوژي بايراغي كيمي مئيدانا گلميش، آمئريكانين اينگيلتره بويوندوروغوندان قورتاماغا يارديم ائتميش، آوروپا اوچون، عوثمانلي ايمپرياسينين بٶلوب خريطه­دن سيلمه­يه، آمئريكانين كٶهنه­لميش آوروپا مستملكه­چي سيستملريني داغيدماقدا آراج آولموش­دور و نهايت سويوق ساواش دٶورو بيتديكدن سونراكي حاديثه­لر عوجوباتيندان بالمره منفي بير ايميج تاپميشدير.

11 سنتيابر 2001

بوتون يوخاريدا ساييلان حاديثه­لر، دونيادا مظلوملارين عدالت و آزادليق ساواشلاريني شوبهه آلتيا آلماغا قادير اولماميشدير. آمما 11 سنتيابر 2001 تاريخينده، آمئريكانين بيرباشا يارديميلا شوروي ايشغالي قارشي­سيندا فورمالاشميش جيهادي قوروپلارين آپاريجي فيقورلاريندان يارانميش القاعده­نين آمئريكانين اٶزونه قارشي جينايتي، بير تاريخي دٶنوش نوقطه­سي اولدو. او تاريخدن بوگونه كيمي داخيلي يا خاريجي حاكيم قوه­لره قارشي موجاديله آپارماقلا برابر، سيويل اينسانلارين قانلاريني تٶكمده شوبهه ائتمه­ين اونلارلا ترور اٶرگوتلري يارانميشدير. بو سورجده، 12 سنتيابر 2001 تاريخي، بيرلشميش ميللتلر تشكيلاتي­نين تهلوكه­سيليك شوراسي طرفيندن، تروريسمه قارشي قبول اولموش 1368 نومره­لي قطعنامه­سي­ني بير تاريخي دٶنوشون پيك/عطف نوقطه­سي كيمي ديرلنديرمك اولار.

     

سورج يا وضعيت؟

اٶنجه ميثال: بير اوشاغين ديل آچماسي، ايمكله­مه­سي يا يئريمه­سي بير "وضعيت"دير، يعني بيردفعه اونا نائيل اولماقلا ايش بيتميش اولور. آمما همن اوشاغين ساغلامليغي بير دائمي "سورج"دير، يعني هئچ واخت بيتمير و عٶمور بويو قورونوب ساخلانيلمالي­دير.

بير توپلومون عمومي فيكري و حتي داها بير اوزون پلاندا اوردا عمل ائدن سٶيلولر، دئيشن كاركتئرلي اولورلار و اونلارا تأثير قويماق قابليتي بير "وضعيت" يوخ بير "سورج"دير. تجروبه ده گٶسترميشدير كي حتي توپلومون يوز فاييزا ياخين بير حيصه­سيني اٶز كاريسماسي­نين مغناطيسينده ساخلاميش رئژيملرده زامانلا، اٶز نفوذلاريني و سٶيلو ياراتماق قابيليتلريني ايتيرميشلر. يوخاريدا ايشاره اولان بوتون حاكيم دٶولتلر اوچون ده كئچرلي­دير. ان گوجلو حاكيم دٶولتلر ده، ياراديب توپلومون گونده لي­يينه سالديقلاري شوعارلاري قووه­ده ساخلاماق اوچون دائمي بير فعاليت­ آپارماق مجبوريتينده­ديرلر. بو فعاليتده گونده­ليك مئديادان توتوموش اٶلكه­نين نفوذلو بيليم اينستيتوتلاري دواملي موداخيله ائتمه­لي اولورلار.

 

قدر قودرت دٶلت اولمايانلارين قوللانديقلاري سٶيلولار

18 و 19ـجي عصرده اٶز ميللي دٶولتلريني قورماق عزمينده اولان كيچيك ميللتلر، چاليشيرديلار كي، بٶيوك قودرتلرين پروژه­لري آراسيندا، اٶز آمال­لارينا اويقون اولانلاري تاپيب اٶز ميللي دٶولتچي­ليك پروژه­لريني بو بٶيوك پروژه­لره باغلاسينلار. عثمانلي ايمپرياسي­نين پارچالانماسيندان يارانان بوتون دٶولتلر بو فورمول اساسيندا يارانميشلار. چاغداش دونيادا، اسير ميللتلر، قادينلار، جوره به جوره آزليقلار و دموكراتيك دئيشيملر پئشينده اولان قووه­لر ده، چاليشيرلار كي، دونيادا حاكيم اولان سٶيلولرين ايچينده، اونلارين آمالينا اويقون اولانلاري تاپيب و اٶز پروژه­لريني، بو سٶيلولرين چرچيوه­سينه سيغديرسينلار. حتي كيچيك دٶولتلر دموكراتيك اولوب ـ اولمامالاريندان آسيلي اولماياراق دونيا چاپيندا قبول اولموش سٶيلوولره سيغينماق ايستيرلر. بوگون حتي اورتا دوغونون ترورريست رئژيملري، اٶز اوپوزيسيونلاريني محو ائتمه پروژه­لريني "تروريزمه قارشي موجاديله" باشليغي آلتيندا آپاريرلار.

"ناسيوناليسم" بير آراج كيمي گونجل دئير!

يوخاريدا دئيلنلر اساسيندا، "ناسيوناليسم" بوگون "جامعه بي طبق توحيدي"، "آنتي ايمپريالسيم"، "استكبار ستيزي" و بو كيمي سٶيلولر كيم سيرادان چيخميش حئساب اولونور. بوگون "اينسان حاقلاري"، "دموكراسي"، "سكولاريسم"، "جينسل عدالت" و "آزليقلار حاقلاري" و "قلوبال و محلي اكوسيستملري قورماق كيمي سٶلولر دونيادا قبول اولونموش و مشروع سايليرلار.

 

در باره نویسنده:

علي رضا اردبيلي

آخرین مطالب علي رضا اردبيلي