راسیسم فارس

فتیلهايرانين فرقلي شهرلرينده تورکلرين کئچيرديکلري اعتيراض آکسييالاري بير سيرا ايجتيماعي موباحيثه لره شراييط ياراديب. اؤزلليکله فارس ديللي مئديا اورقانلاريندا بو مسئله نی آناليز ائتمک اوچون بير چوخ فرقلي دوشونجه‌لره يئر وئرميشلر.

بو آرادا، ايران صنعتکارلاري، ايجتيماعي فعاللارين دا باخيشلاري گئنيش شکيلده ياييلميش و اکثر حاللاردا بير-بيريله توققوشان ايفاده‌لر اورتايا چيخميشدير. کيميسينه گؤره ایرانین ایکینجی کاناليندا ياييملانان اوشاقلار اوچون نظرده توتولموش "فتيله" کومئدييا وئريليشينده باش وئرنلر بير کومئدييادا نورمال ساييلا بيلر، کيميسينه گؤره ايسه بو، قبول ائديلمز تحقيردير.

شوبهه‌سيز، بو ايجتيماعي مثلاي سوسيال کونتئکستده دئييل، يالنيز پروقرامداکي ديالوقلار چرچيوه‌سينده آناليز ائتمک سئچه بيله‌جگيميز يانيلديجي يوللاردان ساييلاردي. ائله جه ده باش وئرن اعتيراض آکسييالاريني، ساده جه "فتيله" وئرليشينه اولان اعتيراض کيمي گؤرمک، ايچ-ايچه اولان مورککب فاکتورلاري گؤزآردي ائتمک اولاردي. بو اوزدن بو يازيدا اوخشار حاديثه لرين توپلومداکي فونکسيياسي و بوراخديغي ايزلري ايشاره اينجله‌مکله ياناشي، بير سيرا ايران صنعتکارلاري و ايجتيماعي فعاللارين وئرديگي رئاکسييالاريني تحليل ائتمه یه چالیشاجاغام.

 

مارکالاما نظريه‌سي

مارکالاما نظريه‌سي (Labeling Theory) ايله ان چوخ اؤرتوشن يايغين عمل، ائتنيکلره صيفتلر وئريب، اونلاردان بللي بير پروفيل ياراتماقدير. بو پروفيللشديرمه ايسته‌نيلن صيفتي، اورتادا دليل و سبب اولمادان، هر هانسي بير عيرق، ائتنيک، دين، و اينانج منسوبلارينا وئرمکله گئرچکلشديريلير.

ايراندا فارس اولمايانلارا قارشي سيستئملي بير مارکالاما و پروفيللشديرمه پروسئسينين اولدوغونو آپاريجي مئديا اورقانلارينين يايينلاري، تی وی پروقراملاري، فيلملري، و حتّي خالقين گونده‌ليک ياشامدا اوزلشديگي نومونه‌لرله گؤرمک مومکوندور. عوموميتله، بو پروفيللشديرمه دومينانت(حاکیم) ائتنيک و کولتورون دومينانتليغيني قوروماغا خيدمت ائدر.

اصلينده، تورکلرين سون گونلرده ائتديکري اعتيراضلار، بير آنلامدا دا پروفيللشديرمه‌يه قارشي اولان اعتيراضلاردير. چونکي تورکلردن ياراديلميش قاباقکي پروفيللر، ايکيلي بيلينج (ايکيلي شوعور) ياراداراق، اونلارين گونده‌ليک ايجتيماعي حياتيني بئله، تاثير آلتينا آلميشدير.

 

ايکيلي بيلينج

ايراندا فارسجاني لهجه ايله دانيشديغي اوچون اوتانان بير چوخ فارس اولمايان ائتنيک عوضولري ايله قارشيلاشماق مومکوندور. عئيني شخصلر اينگيليسجه‌ني ده لهجه ايله دانيشارلار، آما بو دفعه او اوتانج حيسيني ياشامازلار. بو حيس- ايکيلي حيس- گيزلي بير پسيخولوژي پروبلئمينین ايشارتيدير.

آمئريکان سوسيولوق ویلیام ادوارد برگهارت دوبوآ-نین "ايکيلي بيلينج" (Double Conciouseness) تئوریسی بو مسلله‌ني آنلاماقدا يارديمچي اولور. بو نظريه‌يه گؤره، اؤزلليکله راسيزمين ياراتديغي پسيخي تاثير آلتيندا اينسان اؤزونه بئله، باشقا بيريلرينين گؤزو ايله باخيب، اونلارين وئرديگي اؤلچولرله اؤزونو ديرلنديرير و بئله‌ليکله، پارچالانميش کيمليگي پسيخو-سوسيال بؤحران ياشاميش اولور. آزليقلارا منسوب اولان اينسانلارين فارسجا دانيشديقلاري حالدا ياشاديقلاري حيس لر، اصلينده حاکيم کولتورون ياراتديغي گؤزلوکله اؤزلرينه باخديقلاريندان قايناقلانير.

سوسيال و ايجتيماعي عدالتسيزليگين اولدوغو توپلوملاردا دومينانت قروپا منسوب اولمايانلارين آراسيندا يايغين اولان بو ايکيلي شوعور اينسانلارا سوسياللاشما پروسسئسينده تحصيل سيستئمي، مئديا و ساير واسيطه‌سيله وئريلير. بو اوزدن سوسياللاشمانين ايلکين آدديملاريندا اولان اوشاقلار اوچون حاضيرلانان وئريليشلرده، عيرقچيليک و آيريسئچکيليک مضمونلو وئرليشلر اونلارين حياتينا دايمي ايز بوراخا بيلير.

بئله‌ليکله د، "فتيله" پروقرامي، ايکيلي بيلينج ياراتما پروسئسينين مئديادا تظاهورو، آذربايجان تورکلرينين اعتيراضلاري ايسه آيريسئچکيلييه معروض قالميش بير توپلومون اؤز بيلينج (Self Conciouseness) مؤوقئعييندن مودافيعه سي اولاراق ديرلنديريله بيلر.

 

رنگ-کورو عيرقچيليگي

راسيزم پروبلئمي ايله باغلي غريبه تراژيک سير واردير. هئچ کيم، هارداسا هئچ کيم، اؤزونو راسيست اولاراق گؤرمک ايسته مير؛

 آما هله ده راسيزم جيديت و عينادلا داوام ائدير.

آلبرت ممي


سون گونلرده تورکلرين آکسييالارينين آردينجا فرقلي ياناشمالار اورتايا چيخدي. بو ياناشمالارين ايچينده ايران صنعتکارلاري و ائليتلرينين ايفاده‌لري وار ايدي. داها چوخ هاميني بير گؤزله گؤردوکلريني، ائتنيک فرقليليگين اونلار اوچون اهميت داشيماديغيني و بئله‌ليکله، او پروقرامدا دا هر هانسي بير ائتنيکه قارشي تحقير حيس ائتمکديکلريني ايفاده ائدنلر اولدو. بعضاً ده بير سيرالاري، ائتنيک سؤزونه ايشاره ائتمه‌دن اينسانلارين برابرليگينه اينانديقلاريني سؤيله‌ديلر.

بو تيپ ايفاده‌لر ظاهيرن موثبت ايفاده‌لر اولسالار دا، بير چوخ سوسيولوقون فيکرينجه، رنگ کورو راسيزم (Colorblind Racism) کاتئقوريياسي آلتيندا يئر آليرلار. چونکي عيرق و ائتنيک برابرليگینين اولماديغي بير توپلومدا ائتنيک و عيرق نئيترالليغي(خنثی لیق) پرينسيپيندن يولا چيخماق، اصلينده برابرسيزليگي قوروماغا قالخماقدير.
ايجتيماعي و سياسي شراييط دييشديکجه راسيزمين ريتوريکاسي(ادبیاتی) دا دييشير. رنگ کورو راسيزم (Colorblind Racism) آديني داشييان راسيزم تيپي ده فرقلي ايجتيماعي-سياسي شراييطين محصولودور و داها چوخ آچيق راسيزمين (Overt Racism) مومکون اولماديغي شراييطده اورتايا چيخير.

بو دفعه داها هانسيسا ائتنيک و يا عيرقين اوستونلویوندن دئييل، اينسانلارين برابرليگيندن دانيشاراق برابرسيزليگي سوردورمک ايسته‌يير.
نئيترال ريتوريکا، داها چوخ ايجتيماعي حرکتلرين گوجلنديگي مرحله ده اورتايا چيخير.

اگر راسيزمه قارشي اولان ايجتيماعي حرکاتلارين گوجلنديگي واختدا رنگ کورو راسيزمينين و نئيترال ريکتوريکانين اورتايا چيخماسينا شاهيد اولوروقسا، فئمينيست حرکتين گوجلنديبي توپلوملاردا دا جئندئر نئيترال (Gender-neutral) ريتوريکانين جئندر عدالتسيزليگيني قوروماغا چاليشديغيني گؤره بيليريک.

بو اوزدن ايجتيماعي عدالتين اولماديغي بير توپلومدا ايستر "من، اينسانلارين ائنيکلريني گؤرمورم، اينسانلاري گؤرورم" کيمي ائتنيک نئيترالليق گؤسترمک ايسته‌ين راسيست ايفاده اولسون، ايسترسه ده "من اينسانلارين جينسيتيني دئييل، اينسانلاري گؤرورم" ريتوريکاسي اولسون، وار اولان عدالتسيز وضعیتی قوروماق ايسته‌ين ريتوريکادان باشقا بير شئي دئييل.

عئيني ريتوريکا، "فتيله" کومئدييا وئريليشي اطرافيندا يارانان ياناشمالاردا اؤزونو گؤسترميش اولدو.

آزادليق راديوسو